以前未有口水禧之前，每年我同禧爸多數都會揀11返香港，因為美國有感恩節大假（其實都係得嗰兩日咁大把啫！），11月天氣唔太熱又唔太凍，重可以著短袖，唔洗著大褸攪到「褸褸憂憂」咁「論盡」。加上禧公公同禧婆婆都係11月之星，所以就可以順道陪埋佢地過生日啦。
自從有左呢件小粉皮之後，我同禧爸變左農曆年先帶埋口水禧去香港發個新年財，兼且同嫲嫲過生日添。當然，自從口水禧呢位人兄上左幼稚園之後，我地已經度唔到期返港啦，真係不知相會在何時。
所以已經都好幾年無同呀公呀婆過生日啦。
適逢今年呀婆o係呢度，咁就要搵啲野攪攪佢啦。除左食飯送禮呢啲指定動作，就梗係唔少得切蛋糕啦，我同口水禧係唔會放過任何一個可以食蛋糕嘅機會。
口水禧上左小學之後，因為打破左語言障礙，同同學多左好多溝通，講聽寫睇英文完全無問題。之但係隨之而黎嘅亦學左唔少同學仔啲騎呢野啦。有日去佢課室做野，見到有個男仔扭羅友，個情景好「面善」喎？頂！唔怪之得呢排口水禧扭羅友嘅技術變得咁出神入化啦，原來學嗰個同學嘅！重有啲騎呢神情同動作呀，全部喺佢課室都可以搵到答案。
生日嘅主角無啦啦變左做老臨，比件攝石人搶晒鏡，睇下呀婆幾咁無奈！
影完呢張之後，本來我想同呀婆整張合照，點知……
早唔攝遲唔攝，係要禧爸嗌到３嗰下佢就衝過黎！
呢個ganache cake應該會係鍾意食朱古力嘅人嘅首選！用黎做生日蛋糕嘅話就要早幾日訂先買到。不過基本上我地屋企嘅蛋糕無論任何味道都會被我同口水禧以光速攪掂，不過近期嘅至愛就梗係ganache cake啦。所以，增磅係有原因嘅……
呀婆今年嘅生日好開心，因為有佢個honey陪佢呀嘛，佢個honey晨早就唔係呀公或佢兩個女啦，七年前轉左目標啦。
佢許左個咩願，我完全唔記得左佢有無講出黎定係講左出黎我唔記得左，呢排我啲失憶好似嚴重左。
下次，我會準備好條大麻繩紮實呢條友先影相！
究竟係邊個生日呀？
重有三年都唔夠，我就四張野啦。人到中年，其實都唔會再奢想啲不設實際嘅願望，例如咩青春常駐呀，身材好呀（呢個從來都無降臨過喺我身上，所以唔洗諗呢個），中六合彩呀嗰啲。我諗面前「芳齡」70嘅#007應該都同我諗嘅差唔多，生活足夠就夠，有食有住，身邊嘅人安好就好，自己健康唔大問題就還得神啦，其他嘅野，有就有，無都無所謂，比上不足，但比下有餘就已經值得感恩！
好開心你開番blog呀~
多謝你！
祝婆婆生日快樂，身體健康，心想事成！(好似同新年講嘅差唔多！)
同我向婆婆問好，祝佢身體健康，心想事成亞吓！(好似去咗拜年咁！)
禧媽…太耐冇睇你個Blog..今日得閒就走咗去yahoo search你地…終於揾返你喇 ^^
007合皮趴地~
多謝晒！
祝禧婆健健康康開開心心事事順利
哈哈哈哈口水禧真係好鍾意mimi,去到邊影到邊都帶住佢!!!
多謝你！
係呀，口水禧去到邊都總有啲公仔玩具跟身架，好乸架佢！
禧媽，你影左婆婆咁多次，呢次佢個樣最精神wor!!
另祝婆婆生日快樂呀！要努力介口，少食多餐，多做運動，唔好亂食野。（家母都有糖尿）
呢次佢最精神？梗係啦，黎左個幾月之嘛，重未比佢個孫玩謝！遲啲就會同我差唔多咁謝架啦！
your mom put her arm around Colin in every pic. Otherwise, Colin would have run away (haha)
唔會，呢期我仔好屎忽鬼成日搶住出鏡呀！佢係唔會放過任何攝位嘅機會！
原來百友七十大壽, 恭祝身體健康! 以當年嚟講, 睇嚟佢都年紀比較大至生你兩姐妹, 算少有喎.
明顯係佢嘅溝仔技術欠佳啦！
祝百有生日快樂
! 確係，人大左，又老左，快樂同健康身體已經萬幸 
!
? 哈哈，成日睇到我好似青山出走咁，笑咪咪睇住個芒 
!
By the way, 百有睇你 blog d 「設計對白」焦鬧你咩
佢呢期邊有時間睇我個blog呀？所以我先可以亂噏廿四都唔驚囉！
禧禧’s facial expressions are so funny!! 禧媽 is pretty!
Happy Birthday to 禧婆婆!
哇！多謝你呀，一次過笠咁多頂高帽比我地咁多個!
暑假最長假？ 我以為就黎聖誕D學校會放長假 （咁幼稚園會長D ？ 定呀呔仔細細自己放自己假如？？）
暑假係最長嘅學校假期黎架啦，聖誕加新年都係兩個禮拜，spring break 或感恩節都只有一個禮拜咁大把咋！呔細佢地讀緊preschool未係正式公立幼稚園，要交學費嘅，學校唔會理你返幾多學，最緊要有交學費呀嘛。公校唔同，段人頭計收政府錢，你返少一日，學校就收少一日政府因為你而發比學校嘅錢，學校梗係唔鍾意學生唔返學啦。
祝禧婆婆生日快樂! 口水禧長高了不少呢!
多謝！係呀，口水禧過左個暑假地獄式練水後高左好多！
生日快樂呀禧婆婆! 祝妳: 福如東海壽比南山!
多謝你！
禧婆婆生日快樂！
多謝！
祝007生日大快樂！身體健康！福如東海！壽比南山！
多謝！
祝007生日快樂!!!!!!!!!
最緊要每日開開心心, 身體健康!!!!!
多謝你先！
Hey! Happy birthday!
Wish 禧婆婆health and happiness and wealth and many many more.
呢幾日正好諗起你呀大姐！搵日打比你得唔得先？
007, Happy Birthday. Wishing u Good health & all the very best in the coming years. In every photo, 007 looks so contented with Hei Hei.
多謝多謝！等我明早比佢睇下咁多人祝佢生日快樂先！
Happy belated bday to 禧婆婆!
Your mother still paints her nails? I don’t think my mom has ever painted her nails in her whole life.
係呀，我地好鍾意去逛啲「姣屎燉篤」野架，證明我地兩個都係seafood 痕之友！
呀,有樣野成日唔記得講,你老公好似總司令「幟哥」~
佢有幟哥嘅look但無佢嘅廚藝……
禧禧第一,二張相係好難揾到不同之處架,哈哈
佢就無，但呀婆有嘛！
我都係自從个仔返咗學之後返香港呢個項目就遙遙無期,我一家四口暑假d機票貴到呕,我住喺東岸,d機票仲貴d,其實好想同佢請假返HK玩下,但我个仔間學校幼稚園+小學+初中係同一間學校,佢家陣係讀紧kindergarten,唔知係咪因为喺正式學校返kindergarten 嘅會嚴d嘅原因,學校老師唔比d學生冇端端請咁耐假,同埋佢地日日都有小小功課,我驚我帶佢返HK嘅一時快樂會令佢返嚟之後上堂一舊雲,細女出年9月開始返Pre-K,我真係好想返HK呀~
公立學校係以學生嘅出席率黎問政府攞錢，所以學生越請得多假，學校問政府攞到嘅錢就更少，咁學校咪唔鍾意學生係唔係都請假囉。就算係病都好啦，如果無發燒都要照返學架，話之你係咳到肺甩都要返。
我頂唔順香港夏天太熱啦，加上口水禧泳隊喺夏天嘅時候勁多比賽，又唔可以參加得太少喎，所以暑假唔會返去。聖誕又貴，又得嗰兩個禮拜嘅假期咁少，真係時差未tune好又話要返歸啦。唉！真係度唔到期返去呀！
我個仔明年返public kindergarten 啦, 但我個妹明年九月係香港結婚, 撞正學校返學, 諗住扮病唔返兩日學, 遊飛機河參加婚禮, 得唔得架? 學校寫明三日病假要醫生纸! 但驚細路唔識講大話爆響口, 但直說又变咗unexcused absence documeted on file, 點算好?
祝禧婆婆生日快樂
身體健康 
佢拎住個公仔係咩名堂？
乜口水禧升左小學後學左咁多盞鬼表情
多謝多謝！我唔止係佢嘅勞改教練，重係佢嘅代言人添！
口水禧由細到大都時不時會面部肌肉抽筋咁好多表情，但勢估唔到佢啲同學激發左佢嘅潛能，令佢嘅面部表情更上一層樓！
佢手上嘅公仔無乜特別名堂，所有貓一概都係叫mimi。