今年係呀婆第一次喺度過萬聖節，亦都係口水禧升上小學後嘅第一個萬聖節，轉個九萬幾個造型idea之後 最後扑鎚今年以佢呢期嘅至愛出擊……
估到佢今期至愛之選係咩未？我盡晒力架啦，佢係都要搵本書擺喺前面，真係無計！對佢黎講，鬼呢樣野係咩呢？恐唔恐怖就唔知，但應該係面部肌肉失調導致個口永遠都合唔埋就係口水禧心目中對鬼嘅印象啦。（如果係咁，啲鬼嘅牙「較」都好攰下喎！
）
喺呢度，口水禧早喺preschool時已經被教育關於「鬼」呢樣野。當然啦，老師係唔會講話鬼即係人瓜左之後嘅野咁深奧啦，講左啲細路都唔方會明。對於啲細路黎講，”ghost” 咪即係白色嘅，一劈野嘅，無腳嘅，飄嘅，有眼同口嘅（對口水禧黎講，鬼嘅口要擘大嘅添啦！），就係咁多。
o個日為左萬聖節呢個節日，呢條傻丙個口一直都係咁嘅狀態，真係戥佢個口攰！但後生仔呀嘛，佢樂在其中，咁樣整一日，怕且我對法令紋會由個鼻哥窿”the” 到去鎖骨咁濟！
如果佢出世嘅時候，淨係個頭出左黎嗰陣以呢個面部表情黎見我，我會比佢嚇到親自塞返佢入去然後落床返屋企。
唉，有子如此，我已經無野可以再講啦！恭喜我啦！
今年無咁多義工野做啦，我淨係認頭左幾樣，影相、圖書堂、同埋電腦堂嘅義工工作。除非有啲咩無人認頭啦，我先至最後嗰刻出現幫手，費時人地覺得我霸晒啲野黎做。今年多左啲家長做義工，唔似舊年咁差唔多要喺學校寄宿先掂。不過我都重有同舊年嘅班主任有聯絡，老人家呀嘛，多得佢口水禧今年先入到班好班，搵到個適合佢嘅班主任。
可能有人會覺得家長係靠去學校幫手黎換取老師嘅特別關照，在我黎講，我幫輕左佢，佢調返轉想幫返我，將口水禧派去佢認為適合佢去嘅班有乜問題？講真，家長多啲參與學校嘅活動亦都等如多啲機會了解學校嘅運作、老師教學嘅方式、班中同學嘅情況。因為我無喺度讀過書，所以更加要了解學校嘅事，咁樣我就可以提點下口水禧，鞏固佢個底，讀上去都容易啲。怪獸家長？睇出發點啦……
講到自己有幾驚個老師，同人合照個陣又唔見佢正經啲喎。 我真係好佩服佢對擘大口嘅堅持！
終於都不敵人體嘅極限，肯合埋張嘴啦佢！
今年嘅萬聖節無往年咁凍。記得每年嘅呢日夜晚迎接啲嘩鬼之時，我都要開住個火爐，但今年完全連陪口水禧出去攞糖都唔洗著大褸，所以啲細路攞糖都攞得奔放啲。口水禧攞左成桶返黎呀，其實佢都唔係好好食糖，我諗啲糖都係等捐架啦。
口水禧起初人地黎敲門攞糖，條cheap友比一粒人地！後來經我地強迫之下，佢識得捧住個兜比人任攞。佢有啲世人話嘅獨生子特質現現地形，所以要及時糾正佢，我唔想以後佢做獨家村嗰陣，個個走黎賴個做呀媽嘅唔識教仔呀！
早幾日比佢發現我捐左佢個毛公仔，嘩！發我爛乍發到佢丫！無奈有呀婆嘅「架娘」症發作，我嚴懲唔到呢件口水禧粉丙！
豈有此理，而家持住有人撐腰，我比平時要更加勞氣，真係丙完佢我要坐低回下氣頭暈暈，真係驚有日嬲得濟會爆血管！老人家成日做「架娘」，教仔嘅任務比正常嘅困難要更艱難，真係唔該比條生路我行下啦呀媽！
唔經唔覺開左學就黎三個月啦。嘩！原來小一唔止日日有功課，重個個禮拜默字同測驗添。呢度小一嘅測驗大多係無得溫嘅，全靠你平時做功課同上堂聽書有無記住架啫。例如每星期都有嘅英文閱讀測驗，除左測你識唔識睇字之外，重有啲邏輯思考題比你歎！每星期都有嘅限時數學測驗，３分鐘做３０題加減數咁樣等等。其實對比香港嘅小學程度，啲測驗題目真係淺到爆，而家都重測緊個位加減。但邏輯思考個單野就真係靠天才波啦。
唔好以為咁淺應該個個都識做，係個個都識，不過唔係個個都會冷靜小心咁做呢！雖知有啲人特別粗心大意，有啲人心思細密，大家都無得溫靠打天才波，為何人地會啱而自己又錯呢？係咪唔睇清楚題目就做呢？係咪無諗就做呢？係咪無記住老師教嘅野呢？係咪平時無細心觀察四圍嘅事呢？你有是但一樣以上嘅特質都好容易領野。口水禧就有啦，上星期份數學文字題功課完全唔睇題目，見數字就加。見佢做出黎嘅答案真係唔嘔足十幾桶血都好頂住度氣！
我真係好想快啲見到佢份測驗卷派返黎滿江紅，全部都係因為唔小心唔睇清楚題目領野嘅大教訓呀！都係嗰句啦，你提佢小心，佢當你癡筋；佢仆一穫甘，包佢以後小心！
小朋友大都係要錯下先大!! 錯左一次以後就會醒醒定定!
)
禧媽,完全同意你最後個句說話
(口水禧真係有無比堅持,佢個口keep住擘左幾耐..
佢骨格精奇，絕對係練武嘅奇才！
無錯，我都唔個口水禧扮乜，因我無睇果套野！
另： 100 LIKE最後果句金句！！！
最後具金句係警世名言黎架！
全宇宙嘅呀媽都啱用！
睇晒成篇都唔知你個仔扮乜..(我認我好失敗)
我仲以為你會開估…
佢扮despicable me 2 裡面紫色嘅minion呀！
你提佢小心，佢當你癡筋；佢仆一穫甘，包佢以後小心！ Ha Ha Ha
唔好顧住ha ha ha 呀你，你都小心啲呀！
請問，對眼睛係咪一定要死魚咁樣先為之一套？？禧禧都夠consistant, 由頭帶到尾都係呢對眼同呢個咀
佢嗰份堅持同執著確實令我好欽敬佢！至於對眼嘅演譯啦喎，我覺得佢係想表達我30年之後嘅眼。
不嬲都淨係睇, 好少留言, 今次真係忍唔住喇!! 禧媽你寫得好好笑, 係公司偷睇, 一路睇一路忍唔住笑! 對面個同事以為我傻左!
你提佢小心，佢當你癡筋；佢仆一穫甘，包佢以後小心！ <– 呢句我最like!!
得閒就上水換下氧氣筒啦！你對面個同事靚唔靚仔先？靚仔嘅就多啲上黎呢度扮睇blog，實則對住人地微笑囉！唔靚仔點算？er……
將我句金句獻比你老細啦，可能佢即刻升你！
哈哈!! 由頭睇到尾, 終於係最尾合番個口, 我都睇到攰, 我地d老野真係唔敢敢做.
禧哥,你係得既!
我仲未經歷有人做”嫁娘”, 希望我阿媽會好好同我配合, 哈哈!!如果唔係我同你一齊嘔血
到你嘔血嘅時候，我怕我已經嘔凸無野可以嘔啦！
其實呢度D數學文字題真係幾難, 寫哩好多廢話, 分散D細路注意力. 唔知係咪母語講廣東話, 要細路應付那些問題真係幾吃力
啲文字題衰陰濕囉，遇正好似我仔咁嘅「癱盪盪」（眼唔睇好似癱左咁，四圍盪飄飄下咁）型學生咪發揮到陰濕嘅功效囉！
How big is Colin’s class?
I try to attend my son’s school activities when I can. My son loves it when mom/dad shows up in class. Also, I want the teachers to know that we care about our son, and school isn’t just a babysitter.
全班31人，都幾多人下架，個課室都記迫下！
其實細路係好鍾意家長去睇佢地上堂（至少小學嘅時候都重鍾意嘅），自己爸媽去睇自己上堂佢地寧舍興奮雀躍！就算自己嘅父母唔去，人地個父母去都好丫，有個外人喺度，覺得老師要鬧都比啲面丙得輕手啲。（我細個嗰陣係咁諗。
）
老師見到學生嘅家長關注自己個小朋友學業上嘅事就更好啦，因為對於嗰啲完全唔理但又要求學校要教好佢個仔嘅家長，做老師嘅真係R晒頭唔知點算，屋企唔配合，學生唔交功課，測驗唔識食全蛋，你話做老師嘅可以點做呢！