闊別勞改生涯有年幾嘅呀婆１０月中又自動獻身黎進行地獄式嘅勞改生啦！（呀婆：邊個話我傻呀，我最傻！邊個話我笨呀，我最笨！）
洗衫、煮飯、買餸、掃樹葉淋花樣樣有，正所謂，用得唔好嘥！（呀婆：比雷劈呀你個衰女包！
）講笑啫，我唔驚有報應，都驚出街踩屎啦！之但係，呀婆黎左之後，確係多個人幫手，家務都做得快啲啦。我去睇覆診又唔洗帶住口水禧，方便好多架！之前每年一次嘅婦科檢查，撞正暑假，要禧爸特登請假喺屋企睇住禧哥，我先有得去咋！你話幾煩呢！
由於呀婆喺香港屋企有人幫佢做家務，所以呢位呀姐係唔郁嘅，結果咪啲血糖指數周不時都唔理想囉。加藥都唔係解決問題嘅最好辦法，所以佢黎之前，我已經預告左比佢知，佢呢次黎美國會無啖好食，唔准食白飯，只可以食粗米加黑米；唔可以餐餐都食飯，有時食沙律或甘薯（sweet potato)；無白麵包食，要食就食麥包；每朝一碗水煮麥皮，麵包同雞蛋加一杯咖啡；醃製品咩鹹酸菜呀，梅菜嗰啲，
NO！無得傾！！！每日出去公園散步做運動；每日最遲六點半要食晚飯，口水禧唔練水嗰日要五點幾就食。夜晚十點半前去訓，朝早五點半同我一齊起身，最多口水禧去左返學後比佢訓一陣補一補先出去運動。經過兩個禮拜地獄式勞改嘅生活，我以勞改中心第一把膠椅嘅身份宣佈，勞改犯人#007禧婆婆嘅血糖指數幾次空腹篤手指驗血都保持喺四點幾嘅水平，比起香港嘅七點幾呀，八點幾呀，有時甚至係十或以上，減左差唔多一半呀！我自己？
噓！咪講埋啲衰野啦！暑假過左都跑返步架啦，係唔小心加返少少磅啫！
咁我唔會一尾地獄式訓練呀婆嘅「巴di」嘅，週末咪比佢放肆少少囉。每逢星期六、日，我地都會出去搵地方行下散下步，比口水禧放下飛機玩下。朝早有時喺屋企食左個勁嘅早餐先出去或喺出面食。喺出面食就無得控制得咁嚴謹啦，所以咪靠平是閒日儲quota囉！
哇，呢啲咪叫苦盡甘來囉，食都食得滋味啲架！不過面頭嗰一大篤cream真係比佢嚇窒！影呢張相前經已撥走左九成，啱啱上檯嗰下篤野有成篤牛屎咁大篤！美國人食cream真係食得豪呀！相比起我地喺屋企食嗰篤cream真係豪食同窮食嘅好大差別！
得來不易，份外珍惜！幾乎鼻頭有一滴嘅話，佢都會lam埋佢唔好嘥！
今日係萬聖節，但其實好多人好早就佈置好晒。食肆同鋪頭梗係唔執輸都要攪下野攞啲綽頭啦。尋日#007出去散步返黎話見到我地有個鄰居擺左兩副棺才喺屋企門口，其中一副重打開門有條鹹魚作勢要爬出黎咁樣。#007左一句「啋！」右一句「撞鬼咯！」，我話分分鐘有人會喺入面爬出黎嚇人添呀！我諗佢都好期待今晚出去trick or treat時有乜野睇！
食完野就梗係要付出少少勞力啦。轉戰公園，不過呀婆嗰日行左唔算多路，帶左佢啲玩意去公園開工，佢話就咁坐喺度曬個背脊都好喎。唉，見佢平日都算好合作去散步運動，偷懶一日半日都唔緊要啦。
口水禧喪玩時，佢阿婆就喪織。我都巧忙架，除左影相之外，我都有野要做架，做咩？
登登登凳！！！！我又織埋一份囉。
實情係咁，口水禧上年幼稚園個老師周不時都會寄舊衫去烏克蘭比啲孤兒院或窮鄉僻壤嘅村莊嘅，我都捐左好多舊衫比佢寄去。聽佢講，o個度o的人窮到養唔起小朋友就會掉佢地出街或去孤兒院。佢見過有個細路幾年黎身上一件衫都無，只有一對絲襪褲著住咁大把。訓街o個o的會縮o係街邊o的坑渠窿入面過冬，日頭出黎乞食，夜晚縮返入個窿度。大把會凍死o係街度。所以我諗住有衫捐衫，無衫捐就自己去買o的平冷織頸巾捐去比o的細路，雖然一條爛鬼頸巾邊度夠暖，但好過得對絲襪丫，係咪先？呢樣我重負擔得起，當係做好事時又訓練下自己個腦，等佢唔好咁快退化囉。已經呈商呀婆出手幫拖架啦，佢織梗係快過我織啦，多個人幫手，咁就多個細路有頸巾過冬啦。
暫時用幾日織左一條，呀婆教我用粗冷織會快o的。平時等口水禧放學成粒鐘坐o係車或等佢練水就係我地開工之時，附近嘅人已經見怪不怪呢兩母女手不離針，好似想破世界紀錄咁款。
就快冬天啦，又係我頭痕時。你地都睇過呢個blog架啦，某人夏天就係鐵布衫，但一到冬天就變左件底衫架啦嘛，所以襯天氣重未凍到去唔到公園時要多o的帶佢跑跑跳跳，希望增強體能，唔好咁易比人惹病，請得多病假攪到我又接學校警告信。校長今年開學迎新日特別呈清話o的警告信唔關佢事架喎，叫大家唔好找佢晦氣，唔知係咪舊年比我寫封電郵插佢一穫，佢驚今年再比我恐嚇，所以急忙要呈清下呢？
玩玩下又會去左個滑梯上面架呢？好彩地下鋪晒軟膠，就算跌都唔會好甘。呢o的年紀整損少少都可以好誇張，刮甩左1/4個一毫子嘅皮，佢都要黐塊o卑牌咁大嘅膠布，所以我個袋入面消毒葯膏同膠布係唔少得嘅。呢條友周身郁無時停，賴野嘅機會實在多不勝數。
加條尾比佢，其實同馬騮無分別。
佢同呀婆講話佢係o係呢隻蛋度爆出黎架喎。
究竟佢係邊個星球黎架？
無論去到邊都可以隨時變身做織婆女嘅佢，對手係唔可以閒放嘅。
往年呀婆總係萬聖節前就離開美國返去香港，今年終於可以見識下咩係Halloween啦。佢咁大個女都係第一次見到身後兩個有如梳化咁大嘅南瓜咋！佢開頭重以為係假野，我地話佢知年年呢度都有南瓜鬥大比賽架，啲南瓜係堅架！
某個週末帶呀婆去Sausalito 海邊行下，見到呢個叔叔o係度砌石頭。呀婆話佢用膠水黐，但好多人圍住睇架喎，如果真係用膠水黐嘅話，咁有乜好睇呢？
我地企左都有十分鐘，即場呀叔重叫左兩個細路試砌，其實佢話最緊要係揀啲石頭嗰度要小心，平面多而又夠大嘅就做個底，「岩岩饞饞」嘅就放上面用黎勾住其他石，咁就好容易砌得高架啦。
小朋友試砌，呀叔現場指導。我估因為係海邊，海水侵蝕加埋日曬雨淋又風蝕，啲石頭唔係勁硬，呀叔隨時可以揸住舊石係咁中個地下就改變到少少石頭嘅形狀，鑿到個形狀適合砌上堆石柱為止。所以無可能係用膠水啦，蝕都蝕死佢呀！
起初睇極呢張相都硬係覺得有啲怪怪地，經過細心研究，個怪處黎至我同呀婆各人頭上嘅帽！明顯我頭頂嗰隻係黎至比較有米嘅星球；呀婆嗰隻就……比較節儉囉……美德黎嘅美德黎嘅，不過唔係真係好遮到太陽之嘛！
睇下我頂帽，一秒變形，快過移形換影！（唔該自己起如來神掌音樂）天下武功無堅不摧，唯快不破！
（收嗲啦，妖！）
我對眼霎時入左黑洞（立即變黑，快過X源髮彩！得左）……喂))))))))) 返來囉……呀婆繼續粉紅飛碟笠頭。
是日精選，無野好講啦，佢贏晒啦！
再去種mimi嘅地方，有人依然相信mimi係可以種嘅。為何此人嘅智商同佢身高成反比架呢？可能佢以為自己都係「被種」出黎嘅。
死心不息，再種mimi。
衰仔，你係都應該幫老豆呀媽種左銀紙先啦，養你真係未種到銀紙就已經燒晒啲銀紙先啦！
此女子今趟過黎合作非常，除左願意去練佢個「巴di」之外，又肯著波鞋啦，曬太陽啦。最重要係唔敢做太多「架兩」撐佢粒寶貝孫，除左係因為過黎之前比禧公公同肥玲洗腦式教育之外，黎咁多日都已經見識到為何我成日都要勞氣丙穫件麻煩友，呀婆由成日都話「細路仔係咁架啦！」變到而家都識講「我有你比媽媽鬧！」！大進步，very good!咁……
我其實應唔應該多謝口水禧呢？
妹妹高左好多，哥哥應該亦高了不少罷！
嘩？真係個個戴黑超，唔駛眼超超噃！
有媽的孩子像個寶
, 替禧媽開心呢!
)
(實情應該口水禧開心啲, 多個亞四, 嘻嘻…
伯友, 要身體健康喔!
多謝你呀！哇，飲完蜜糖呀你？把口咁甜！
Hi Hei Mother, this is my first comment in ur blog though I watch it for a long long time. I like ur blog. I enjoy reading ur descriptions on daily life events. And I learn a lot from it as ur writings are full of gentle humours & intelligence.
I really admire u having such a good relationship with ur mother & son. My beloved mother passed away some twenty years ago & I still deeply missed her so much.
All my very best to u, Hei, Hei father & auntie.
多謝你！我相信伯母無論o係邊度都希望你開心過每一日！雖然唔可以相見，但佢永遠活在你心中都係一種幸福！
有信仰嘅會相信他日o係天堂相見；或來生有緣會再做一家人，呢啲緣份會一路延續落去。
我地呢家人日日都係胡胡鬧鬧咁過日晨，生活迫人，唔搵啲野調劑日子好難過。好彩我地都黐黐地線，瘋瘋顛顛嘅人日子最快樂。所以有呢個blog ，希望大家黎呢度放鬆下，同我一齊發下神經，輕鬆過後再「沖厠」！哈哈！
arhahahahahahahaha經過禧媽你地獄式勞改,#007番到香港應該都繼續keep到d好習慣!!!
(祝禧婆身體健康!!!!)
同埋,我好鍾意口水禧頂熊貓帽,當堂得意左!!!!!!
頂帽係幾年前喺海洋公園買嘅，估唔到大頭禧重啱戴喎！
#007喺香港就係唔運動囉，呢啲咪就係敬酒唔飲飲罰酒囉，睇黎佢終生都需要接受我提供嘅勞改訓練架啦！
I m lost track! 點解種Mimi?
http://blog.yahoo.com/_MN3E2FDN464WIX4IAAFB6QSW5M/articles/1425332/index
Man, you are micro-managing everyone (including your own mom)?!?
I bet that she’s a housrkeeper aka a control-freak
我係control freak黎架！我鍾意連隔離嗰啲人都管架！你今日屙左屎未呀？屙左幾多次呀？靚唔靚呀？
haha……真係笑死我了…第日口水禧咁樣寫番你就知.. :P
佢點會寫我丫，有時間都去左溝女啦！我同禧爸一人買張冷板凳坐好過。
最尾個張相好搞笑，口水禧同婆婆個表情和打扮好一致！
粉紅襯粉紅；動物襯動物，原來taste呢尾野可以隔代遺傳嘅！
好正呀!! 007!!
哈哈!! 記住好好特訓佢, 等佢身體健康呀!!
佢好快就有前有後重有條黃蜂腰架啦！
做得好, 咁你又點先, 哈哈!!!!
我咪恭喜佢囉，唔係你想點先？
#007為左見個孫真係去到好盡喎~
完全係拋個身出黎嗰隻咁徹底！you jump I jump嗰隻！
禧婆婆會唔會被口水禧恰佢呀?
你有無聽過慈婆多敗孫呀？
個美國VISA未過期？？ 以後見呀禧婆每年到美國一遊喇～ （我鐘意果句： 我由你比媽媽鬧）
個visa１０年架，佢有排黎勞改呀！
呀婆都放棄做「架涼」，你話個衰仔幾離譜丫！
嘩!hahahahhahaha
笑死人咩hahaha
你襯呀禧婆泥左美國日日見住口水禧,
唔洗供上泥blog睇, 幫佢起埋編號#007呀
btw, 祝禧婆&你地一家都身體壯健
佢完全唔會上網，我寫乜佢都唔知架！
撞鬼咯…禧婆婆做左幾十年人…到頭來比你冠名為勞改犯人#007…
健康就好了..
007喎，幾型呀！又唔係# 167, 169咪叫做算係好有佢孝心架啦！
第一張相你同你媽個眼神好夾！
空肚有4.幾度好靚仔wo！加油呀！
#007個黑衫黑褲粉紅袋+帽既look簡直yo爆！（唔會係你咁孝心幫佢襯掛）
其實你自己寫blog會否一路笑唔停呢？
我戴住副超你都見到我嘅眼神咁犀利？我嘅係堅定而銳利，呀婆係R底兼無奈！
有幾日偷食左禁品高返少少，６點幾又有，８點幾都有，睇黎地獄式都未夠，要18 層地獄式先得啦！
重有呀，你唔好誤會我先得架，我點會同佢襯黑衫黑褲加粉紅帽咁好死呀，比著我幫佢襯的話，佢肯定上左電視啦！
我寫blog唔會笑，因為啲格式有時會走黎走去，寫到火起就真！
點解禧公公唔過嚟見下個寶貝孫？
呀公同肥玲要比心機搵錢，新年先會過黎囉。
你就爽啦，阿媽又嚟幫手，真係痾督屎都輕鬆啲！
屙’care’唔輕鬆架，要用力架嘛！
禧媽，見到禧婆婆嚟左美國渡假探你哋感覺真幸福呀
身教非常重要的，禧禧長大後有能力一定會受到你哋嘅影響，好積極咁幫助有需要嘅人啫 
同埋覺得你同禧婆婆嘅心地真係好好，平時湊禧禧咁忙仲花時間織頸巾捐俾有需要嘅小朋友，善心爆棚
呀婆佢唔係黎渡假，佢係黎勞改架！佢黎練好佢嘅「巴di」，做個健美小姐嘅！
唏，我地都係手痕兼盡下綿力而已，反正戇居居坐喺度等口水禧放學或練水都悶啦，咁咪一邊吹水一邊織野囉。口水禧？希望佢明白我同呀婆做緊乜啦，佢到而家都係緊張玩具多。