B for Bitch (此 blog不適合兒童觀看 )

平常寫這個 blog我都用書面語 ﹐ 因為有些親友不會看廣東話 ﹐ 不過這篇 blog要例外了。因為用廣東話加些英文會比較傳神 ……

好喇 ﹐ 轉返去廣東話 channel先。

話說頭先我同口水禧去嗰間屎人新開嘅華人超市買野 ﹐ 雖然佢已經無第一日開張嗰陣咁多人咁墟撼勒 ﹐ 不過我入親去無時無刻都要打醒十二分精神 ﹐ 因為裡面買野嘅人真係唔講得笑 ﹐ 個個殺氣騰騰 ﹐ 無禮貌就唔在講喇 ﹐ 嗰 D貪得無厭嘅衰樣真係想大巴大巴咁刮到佢個嘴都飛去佢個後尾枕咁濟 ﹗

行下行下我哋就去咗凍肉部 ﹐ 我要買豬頸骨吖嘛。咁我咪企喺個凍肉櫃擺豬頸骨嗰隔嘅前面囉。喺呢個時候 ﹐ 櫃面有我同另外一對夫婦喺度。咁佢哋嚟先 ﹐ 就梗係佢買先喇。

呢個時候 ﹐ 有個貌似 HK黃 X蕙嘅呀嬸走嚟我面前問我﹕ 「 Are you buying something here?」 (留意 ﹐ 佢個樣係超唔友善咁串緊我呀下 ﹗ )

我心諗 ﹐ 我唔係喺度買野 ﹐ 唔通貪 D生豬肉好得意企喺度望咩 ﹖ 定係佢覺得我喺暗戀是但一個肉臺呀叔要企喺度凝望 D呀叔呢 ﹖

真係想答佢 ﹕ 「關你叉事呀 ﹐ 八婆 ﹗ 」不過 ﹐ 我都係好有禮貌咁答佢 :「 yes」 (儘管我知道我塊面嘅肌肉開始唔聽話想藐佢。)

佢跟住重要繼續豬 o翁喎﹕ 「 I want to buy this (指住幾隔嘅肉 ) can I stand here (示意要企喺我架購物車前面 ﹐ 當時我架野係泊住個玻璃櫃咁擺嘅 ﹐ 因為我唔想學其他 D蛋散咁將架野劈喺條路中間 ﹐ 大佬 ﹐ 我個仔坐喺架車上面架 ) and take a closer look at the neck bone?」 (即係串我好將架車擺喺個櫃前阻 Q住佢睇肉囉 ﹗ ) 佢廢 o翁緊呢堆說話嘅時候仍然係嘴藐藐 ﹐ 好似想鬧爆我咁款架下。

其實佢當時企嘅位置都唔係離佢想睇嘅嗰堆肉好遠 ﹐ 大概兩尺咁上下喇。

我心諗 ﹐ 「你不如將你個死人頭伸埋入去個櫃入面聞下 D肉 ﹐ 再 Lam下咩味先決定買邊塊喇 ﹐ 低 B﹗ 」但係我都扮無野咁讓呢個 seafood 鬼埋去睇飽佢喇。心裡面就媽緊佢架喇。

好勒 ﹐ 嗰對夫婦買完之際 ﹐ 呢個 seafood 鬼就無喇喇唔知幾時死咗去企喺對夫婦隔離 ﹐ 我已經心諗 ﹐ 你個 cheap精 ﹐ 係咪想打尖呀 ﹖ 點知我都未諗完 ﹐ 佢真係打咗我尖。當時我幾乎爆到出口叫佢收皮﹐ 點知個肉臺呀叔都見到我怒睥緊佢哋 ﹐ 好醒目咁即刻叫多個人嚟 serve我。咁我就照買我嘅豬頸骨。嗰個八婆頭先又話買豬頸骨嘅 ﹐ 但係家下佢係揀緊肉排喎 ﹗ 咁頭先又咁緊張話要望真 D舊肉 ﹖

算 ﹗ 唔好理人哋嘅事。喺個呀叔幫我切緊舊豬頸骨嘅時候 ﹐ 我就有幸聽到呢個 seafood鬼喺度玩野勒。大家唔知有無見過外國賣肉嘅肉櫃呢係將每一種肉一搭搭咁擺嘅。咁你要買邊種肉就最多喺嗰搭野最上面或最多下一層嘅肉裡面揀囉。呢個 seafood鬼竟然要求個呀叔逐層巢 D肉排出嚟比佢研究下先。嗰度大大話話都廿幾三十塊肉排 ﹐ 搭咗都有十層八層咁多 ﹐ 要人巢到落底 ﹐ 你話佢係咪唔記得食藥喺樹發顛吖 ﹗

咁個呀叔面有難色咁拒絕佢喇 ﹐ 呢個時候 ﹐ 仍然係口黑面黑﹐ 嘴藐藐嘅 seafood鬼就爆咗句 ﹕ 「 bring your manager here!」個呀叔當堂呆咗 ﹐ 個 seafood鬼又繼續發難話: 「 I want u to show me the bottom one, I’m paying money. I want to see it! Show me the bottom one or bring your manager here.」

佢哋糾纏咗好耐 ﹐ 我猛聽到個八婆係咁叫話要見個 manager。個呀叔好無奈咁望住我 ﹐ 我心諗 ﹐ 「做咩望住我呀 ﹖ 我又唔係 manager!唔係想我幫口呀嘛 ﹖ 」

其實我真係好想搭嘴 ﹐ 最衰我個仔喺度。如果呀叔有個 handfree駁住我個電話 ﹐ 我真係會叫佢同個 seafood 鬼講 ﹕ 「 go back home and raise your own farm, then u can choose whatever u want, bitch! Now, f*ck off!」

人哋大把客喺度幫襯 ﹐ 洗怕得失你一個麻煩友咩 ﹗ 你家下係買肉排咋 ﹐ 你估買緊玉嘴咩 ﹐ 要舊舊都睇過先 ﹗

但係我都比咗個會心嘅斜睥嗰個八婆以示我都支持呀叔咪鬼睬佢喇 ﹗ 你話若果頭先唔係叫多個人嚟 serve我 ﹐ 我咪要等呢個八婆睇晒 D肉排買埋發完花顛先到我買 ﹖ ﹖ ﹖ ﹖

喺呢個時候幫我切骨嘅呀叔亦都返嚟勒 ﹐ 比咗袋骨我 ﹐ 我就乘機問佢點解無咗個派籌機 (其他分店係有嘅 ﹐ 雖然 D人仍然係打尖 )﹐ 佢話無架喎。咁我就好大聲指住嗰個騎呢女人同個呀叔講 ﹕ 「 u know, people just don’t line up here….」但係個女人掛住睇肉 ﹐ 都唔知係聽唔到我插佢定係佢真係唔知我插緊佢。個呀叔都好無奈咁笑 ﹐ 咁我就走人勒。離遠重見到個女人喺度驗緊屍 ﹐ 但係就變咗頭先 serve我嗰個呀叔服侍佢勒。原來 serve我嗰個就係個 manager嚟。我就唔信個呀叔有巢到落底比佢勒。既然係咁頭先就唔好玩野喇 ﹐ 八婆 ﹗ 喺同一隻豬度切出嚟嘅肉 ﹐ 除咗話頭頭尾尾會有 D偏差之外 ﹐ centre cut嗰 D舊舊都差唔多架喇 ﹐ 大姐 ﹗ 係咪第一次買餸定無帶個腦出街呀 ﹗ 你話呢 D人係咪變態吖 ﹐ 先嚟串我 ﹐ 跟手就鬧呀叔玩野 ﹐ 豬肉檔嘅呀叔都夠膽鬧真係連個死字點寫都唔知。人哋揸刀揾食架嘛 ﹐ 你玩野玩到咁大要見 manager﹐ 比著 D躁狂嘅人就一刀劈瓜咗你九世喇 ﹗ 比嗰幾蚊雞就點到人陀陀擰 ﹐ 真係唔知如果佢買鑽石嗰陣係咪要人張成座礦山搬返嚟比佢逐舊驗下先 ﹗

重有我都好憎 D人揀粟米時要將一條好好嘅粟米剝皮 ﹐ 扯甩 D鬚 ﹐ 又係驗屍咁驗 ﹐ 重要係揀幾十條都係咁剝咁扯 ﹐ 跟手掉返低唔買。喂 ﹗ 大佬 ﹐ 條條都比你咁樣糟質過 ﹐ 嗰兜粟米就好似比人強姦完咁衣衫不整 ﹐ 披頭散髮咁 ﹐ 重要連 D粟米粒都比人因為大力咁齒 D皮同鬚甩到一岩一蠶咁 ﹐ 是問人哋點買呢 ﹖ 你想買靚野唔係唔得 ﹐ 但係人哋都想買靚野架 ﹐ 條粟米比你齒到不似粟形咁人哋點要得呀 ﹖ ﹖ ﹖ ﹖ 你估自己係 the centre of the universe咩 ﹖ 有 D公德心好唔好 ﹗

唔該唔該 ﹐ 功德無量 ﹗

B for Bitch (此 blog不適合兒童觀看 )

禧媽

Leave a Reply Cancel reply