馬路如虎口﹐豬兜四圍走

一見廣東話就知我又係谷鬼氣喇﹗

自問我手車唔係勁﹐但未至於係豬兜。(以呢度嘅準則呀下﹗

我自己覺得……)但係有時見D人揸車真係激到X都滾咁濟。無辦法﹐呢度考個車牌路試真係易到爆炸﹐D考官要求唔嚴嘅﹐我嗰陣時考可以喺條路度就咁U turn要個考官抽返我糖o太返嚟,禧爸離遠望見我喺條街度舞龍咁架車行S步都比我嚇C﹐諗住我實肥佬喇﹐大佬﹐要個考官出手抽你糖o太喎﹗點知都pass到喎﹐你話係咪好搞笑先﹖但係我U turn係有原因嘅﹐第時有時間先講。

講返呢度D蛋散先。D人成日講外國揸車好容易﹐因為D人好禮讓。無可否認﹐呢個確係事實嚟嘅。但係唔代表D人揸車有帶個腦出街吖嘛﹗而家有口水禧喺度﹐我可以喺屋企忍住唔爆粗﹐但係揸車嘅時候真係喪失理智﹐不過好少XYZ人哋﹐多數都係鬧人低能白痴嗰D。如果要我開金口嘅話﹐嗰個人應該係犯咗彌天大罪﹐若然我有支炮嘅話就實射瓜咗佢架喇。

講下今日嘅一個例子﹐雖然唔算係激到爆嘅事﹐不過都有D火滾囉。

話說我同口水禧去完超市買野(今次係鬼佬超市呀)。嗰個超市嘅停車場不流都令人精神緊張嘅﹐又窄又多人﹐撞正中附近一間中學放學就更加恐怖勒。特別要話比你哋知﹐呢度D行人好似大晒嘅﹐佢哋無論係過馬路又好﹐架車泊街邊要喺行人路行出馬路上車又好﹐係老奉唔睇車嘅。唔知HK法例係點﹐呢度即使係個行人自己衝出馬路﹐司機撞到人係一定個司機錯晒架勒。所以D行人係大安旨意將佢自己條命交晒比D司機嘅。完全無諗過比車撞斷腳﹐撞到變白痴嗰個唔係個司機呀﹗過馬路唔睇車﹐揸車嘅亦都唔睇人哋架車﹐佢對眼淨係望到自己架車同自己架車前面幾尺範圍嘅野架啫。

我哋買完野﹐我都撻著咗架車兼著咗退後嘅燈十世咁耐﹐當時我隔離有架車岩岩泊緊﹐咁我就等佢扭返直糖o太先喇﹐與此同時我喺倒後鏡望到另外一邊有架車喺度都好似等緊D乜咁。見佢好耐都唔扭入嚟泊位﹐咁我諗佢應該唔係泊位喇﹐應該係等緊佢前面嘅車行佢就可以直行喇。咁隔離架野泊完勒﹐我就退後喇。喺我忙到一路退一路望D倒後鏡嘅時候﹐突然有人好慘烈咁bid咗我一野﹐嚇到我以為撞到人或者撞到後面架車﹐但係心諗無理由我後面有車我個parking senser會唔響架﹖﹖﹖﹖﹖正喺我周圍望咩事嘅時候﹐突然喺我另一邊嘅隔離有架車頭入緊我隔離個位。我停低望佢想點﹐嗰個八婆女司機重同我鬥bare﹐真係火都嚟﹗

唔知佢係無帶個腦出街定係佢呀媽整蠱佢生漏咗比佢﹐定還是佢個腦一向都坐住嘅。整佢個制吖﹗我對退後燈著咗N年喇﹐你睇唔見就除咗你副黑超望清楚喇﹗雖則唔係話我著咗退後燈就一定係我退先﹐咁我頭先喺樹等緊隔離車嘅時候你喺度做乜呢﹖嗰度起碼都有成分鐘咁耐﹐巴士都泊咗入嚟重有剩時間比你抹乾淨副黑超喇﹗硬係人退嗰陣佢又爭住泊﹐咁你睇到我都退咗半架車出嚟咯﹐係咪可以比我退埋嗰半架先﹐然後你咪有兩個車位比你慢慢泊飽佢囉﹗點解一定要我退退下特登停低比你泊先呢﹖你係邊位呀﹐呀嬋﹗

我架車又大過你﹐高過你﹐我又唔係樣衰過你﹐點解要我讓你呢﹖你呀媽有無教你分先後架﹖你教車師傅係唔係教你喺人哋退緊車嘅時候先好搶住去泊車同人死過呀﹐PK﹗重有呀﹐我都停低咗讓你咯﹐你有無家教架﹐識唔識打個手勢當唔該呀﹐重要bare到我行一行﹐我家下爭你架咩﹗痴Q線﹗所以我退好架車之後亦都還咗個巨響佢嘆。跟手都有一野bid還返比我﹐我都費事睬佢﹐趕住返屋企喇。你話呢D人係咪多舊魚吖﹖(我醒佢嗰下bid都係多舊魚架喇﹐不過度氣頂住吖嘛﹗

)

除咗呢D咁嘅停車場事件﹐喺高速公路都大把豬兜四圍走架。話說呢度嘅highway普遍係大約65mph不過同常行呢個速度嘅人係會喺慢線嘅。事關快線嘅人起碼都行75-80mph。LA嘅司機重快呀(唔塞車嗰陣﹗)﹐閑閑哋人哋係行90mph架﹗超速故之然係no good 喇(我認我都有超嘅

)﹐之但係你若果行少過40mph一樣會食牛肉乾架喎﹗皆因人人行緊六十幾﹐七十幾嗰陣﹐你就蟻lan咁慢﹐唔單止會阻塞交通﹐重會好危險添。

點解行得慢都危險呢﹖

我哋呢度嘅highway出同入都喺右邊嘅。當你喺小路上highway嘅時候﹐highway上嘅車個個都fung fung聲her her聲咁衝緊﹐所以如果你唔想比人炒羅友嘅話就要喺上緊highway嘅時候盡量加速﹐以keep到自己同highway上行緊嘅車差唔多速度﹐咁你攝入去人哋條線嘅時候人哋就唔洗急剎嚟就你(剎到就你咪算你好彩囉﹗剎唔到就~~~~

)。但係總有D懦夫成日喺呢D關口舉旗不定﹐行下又停下﹐架車行得慢就唔在講喇﹐行下停下﹐後面跟嗰架咪又係要同佢一樣行下又停下囉﹗但係呢D highway entrance嘅長度有限﹐出唔到就唔該入返去local揾過第二個entrance喇﹗所以有時跟著呢D豬兜真係好火滾。試過一次我又係要入highway﹐前面嗰位c9呀姐﹐揸住佢架戰車喺個highway口行下又停下﹐喂﹐我架車大半架出咗highway架喇﹐後面D車fung fung聲衝緊埋嚟﹐佢若然唔係喺我前面咁我就踩油快D行人喇﹐最慘佢又當住我﹐隔離條線又快我又轉唔到線﹐望住倒後鏡睇住D車嚟緊喇﹐就bid前面嗰個人入喇(我都幫佢當住D車咯﹐都唔知佢驚乜鬼﹖)點知佢入咗highway之後bid返媽我好bid佢﹐我揾到機會轉線之後﹐經過佢架車﹐佢重鬧我添﹗呢個時候﹐bid佢都無謂﹐just give her a finger>>>>即刻「o拿」佢喇﹗真係痴線架﹐呢D司機就係最自私嘅一種勒。淨係故自己唔理其他人。再講吖﹐我唔係揸林保堅尼呀﹐我揸嗰架由0-100mph喺入highway嗰幾秒係做唔到架大佬﹗我亦唔係揸貨櫃車架﹐比人衝住埋嚟咁炒﹐我成車人都會變屎餅架﹗

若然係咁懦夫就唔好上highway﹐行local喇﹗

重有一次真係幾乎炒。話說有日上咗highway之後就梗係快D踩油等自己同其他人差唔多喇﹐後面D車嚟緊喇嘛。去到中線嘅時後突然前面唔知做乜幾架車急剎。嚇到我鼻哥窿都無肉。好彩剎得切﹐但係當時好亂呀﹐有D車想轉線﹐但隔離線又有車﹐想轉線嗰D又唔理人喇當然﹐所以搞到轉線嗰D幾乎比人炒喇。真係好驚險﹗後來我都轉走咗喇﹐費時跟住堆傻人喇。比我見到龍頭有架超超超超超))))))))慢嘅車喺度遊街咁﹐個女司機重喺度同佢隔離位嗰件傾緊計添。呢位呀姐唔係呀婆(通常我哋見到慢車係老人家司機都會比下面轉線就算﹐都唔怪得佢哋嘅。同埋D老人家好識DO會行慢線﹐唔會阻住個地球轉嘅)你話嗰個女司機係咪五行欠打吖﹗

揸車掛住傾計已經錯﹗(重要係個頭都拎埋去望住個乘客喎﹗)﹐重要後面成隊車跟住自己都唔知﹐即係無留意倒後鏡喇﹗有D係明知都特登嘅﹐咁呢D咪叫賤囉﹗揸車唔係淨係理自己架﹐要一眼關七架大姐﹗條highway五條線發生嘅事隨時都關你事架﹗好似我上次喺highway見住架車打白鴿轉﹐由highway中間飛咗去最右邊撞牆再飛返出嚟去左邊呀﹐你話如果你喺佢側邊你係咪賴野先﹖所以見到有D唔妥嘅車就要行遠D避開佢﹐有顛佬喺樹亂颷又要避開佢﹐咁你唔周圍望又點知身邊發生咩事呢﹖淨係望住同你傾計嗰個託咩﹗發生交通意外嗰陣咪一齊落下面傾飽佢囉到時﹗

講開揸車嘅事我就收唔到口。比我講埋呢次喇~~~~

嚟咗呢度先有車牌嘅我﹐咁多年當然遇過唔少無賴喇。以前我係去學生屋企教琴嘅。個個禮拜六都要揸車架喇。咁返屋企嘅時候就少不免係會揸快車飛返屋企。唔知係咪男司機永遠都覺得女司機係好不濟嘅﹐所以如果比女司機扒咗頭呢佢哋真係要爆血管嘅。有一次﹐當我喺快線行緊嘅時候﹐覺得前面架野實在係太慢喇。講過架喇﹐快線通常都行至少75-80mph﹐但係呢條友呢就行六十幾﹐直頭係超級帶隊嗰隻。咁我咪抽頭﹐先去隔離條線﹐跟住再cut返入條快線囉。我去咗隔離條線準備想入返去快線嘅時候﹐嗰架帶隊車突然踩油加速﹐咁我咪都比D油囉﹐唔係咪盞又去返佢後面比佢再帶隊﹗點知呢個粉柄又學人加速﹐我諗佢係睇C我唔敢再快。咁佢真係唔好彩﹐撞著個顛嘅女司機……我以前揸車確實係無帶個腦出街﹐所以成日都會離譜地超速。(而家無呢支歌唱喇載住個仔~~~

)最後我係要踩到上120mph再喺佢車頭同我未轉線之前嘅前面嗰架車嘅車尾之間攝返入去條快線﹐超驚﹗若果有後生仔新牌仔喺樹睇緊呢篇blog﹐千其唔好學我

﹐呢個係超危險超唔負責任超顛嘅做法。

真係罪過罪過﹗趴咗頭之後梗係即刻減速喇﹐落返去80mph就算。不消一分鐘﹐後面條帶隊粉皮已經連塵都食我唔到勒﹐即係佢又變返帶隊囉。咁頭先為乜又要同我鬥快呢﹖係咪要迫到人哋炒車佢就安樂呢﹖點解唔比人哋快過你啫﹖我之前又無琢佢尾﹐完全係好正常咁轉線趴頭﹐咁係咪唔比人哋急kare趕住返屋企疴呢﹖不過﹐我咁樣超速係錯。咁危險都好錯﹐所以呢part唔再剷落去~~~~~

記得我初初攞到車牌之後﹐當時得廿零歲﹐確實係無乜忍耐力。亦都無諗過有咁無賴嘅人。有一次我喺highway嘅慢線﹐重有1miles就要出highway﹐同時亦有架野要入highway。咁佢係小路出大路吖嘛﹐理應係佢要睇大路嘅車同讓咗大路嘅車先。我明明喺倒後鏡見到佢架車﹐係成架車喎﹗咁即係我架車係比佢前。我哋兩個條線係行行下會merge埋變一條嘅。咁我喺前面就梗係繼續喺前面架喇﹐好正常啫﹐係咪﹖點知去到條線變一條嘅時候﹐我突然見到隔離有架車同我平排﹐幾乎炒埋一碟﹐我梗係剎制喇﹐佢就dum行油門cut我車頭﹐離晒大譜﹗係咪痴線架佢﹖﹖﹖﹖﹖當時好火滾﹐我bid咗成條街咁長嘅時間。條友當然係玩野又豎中指又玩剎制行下停下咁陰我喇。跟住佢要上橋﹐我就繼續向前行喇﹐佢上咗DD橋又突然向住我架車衝返落嚟咁款﹐但結果佢都係繼續上橋嘅﹐直至到嗰一刻我重係bid緊佢嘅﹐佢向住我伸埋條脷好賤格咁窈我。我頭先比佢咁樣整一整﹐D車o太真係幾乎剎到出煙咁濟先無同佢炒埋一碟咋﹗返到屋企打電話比禧爸嘅時候個心重跳到爆炸﹐手震到控制唔到添呀﹗若然以前我帶槍出街嘅話﹐揸車嘅時候應該fare低咗幾件﹐家下睇怕都重食緊皇家飯呀﹗

平時嗰D打左燈cut右線嘅已經見慣不怪架喇。衝紅燈幾乎炒落我度嘅亦唔少。博大霧應停唔停嘅大有人在。阻住條路當自己條私家路就日日都見喇。我同行人都嗌過交。佢話我剎得急好似想撞佢﹐實情我喺離開佢成架巴士咁遠嘅距離剎停架車讓佢過馬路﹐佢都覺得我會撞到佢﹐企喺條路中間唔行﹐bare爆我。等我泊好架車﹐佢失驚無神唔知喺邊樹捐出嚟鬧我。我當時趕住街市閂門之前去買魚咋﹐唔係鬥長氣睇下邊個收嗲先﹗

最後一次喺highway亂飛係當時我又係喺快線﹐有架車cut過嚟我條線﹐講明先﹐我係無嬲嘅。但係因為佢慢咋下﹐我之前都行緊80mph喇﹐佢行70mph。咁當時大家都上緊斜路吖嘛﹐咁我諗住我同佢嘅距離係有足夠時間比我就算唔踩剎制架車都唔會撞到佢嘅﹐因為上斜架車你唔比油就自然會減速架喇。曾經有幾秒﹐我架車係比較近佢車尾﹐但都肯定有幾尺嘅距離﹐跟手我架車都減咗速喇自己。好勒﹐前面條蛋散嚟料勒。佢梗係以為我頭先故意琢佢車尾喇﹐咪又係特登行下停下玩野囉。算﹐我轉線避開佢﹐佢即刻又轉﹐重要cut我車頭﹐然之後又行下停下。我再轉多條﹐佢又係咁cut我車頭繼而又行下停下。唉﹐比你係我﹐你火唔火先﹖﹖﹖﹖轉多條線踩到地板油咁濟﹐佢轉唔切去我車頭喇今次﹐於是死追﹐同我平排。但係喺嗰一剎那﹐好奇怪﹐好似有個message突然喺我個腦出現﹐同我講﹕「低B﹐呢D咪就係魔鬼囉﹐想盡辦法激嬲你﹐等你發顛﹐可能係想引你去死架﹐你再同佢鬥快﹐一陣炒車瓜咗﹐佢可能就會變咗團煙飛咗去﹐你自己賴野之嘛。如果你炒瓜咗﹐咁佢會好開心﹐你唔止無咗條命﹐你令你父母傷心﹐你以後都養唔到父母﹐但係嗰隻魔鬼係無損失嘅。」就係咁﹐我就無再踩油門喇﹐轉咗去最慢嗰條線避開嗰個seafood鬼。之後亦唔知佢死咗去邊勒。

自嗰次之後﹐我無再飛車喇。雖然都重有超速﹐但係係安全地超。比人cut車頭﹐我忍。最多喺車入面鬧爆佢。唔同人鬥快喇。人哋想去C﹐唔通我又跟埋去C咩。比人琢車尾﹐我忍。我忍住唔同佢鬥快咋﹐但係一樣會鬧爆佢架﹗佢去咗我前面我會用高燈照爆佢架﹗對上一次做D咁嘅野係前年11月。好似個blog都有寫。而家淨係喺D超市同D思奶呀嬋C過囉。