醫藥分家

係呀﹐又係廣東喇……

琴日同Terry傾過電話覺得用杯嚟代替口罩去吸D擴氣管藥效果唔係咁好之後﹐今日食完早餐﹐就同口水禧去屋企附近嘅藥房揾口罩﹐希望等佢吸藥嘅時候可以盡吸D藥﹐盡快搞返掂個問題先﹐唔係一陣再拖變咗真係哮喘我就要撼頭埋牆喇﹗

出門口之前已經熱好咗呀仔D飯﹐重霎好咗隻蛋添﹐諗住買個罩啫﹐應該唔洗一粒鐘﹐莫講話揸車喇﹐行都行到返屋企喇﹗點幾兩點出門口﹐去到藥房﹐問個藥劑師有無baby inhaler with spacer and mask﹐個藥劑師話有就有﹐不過要醫生紙喎。「

o下﹖﹖﹖﹖買個罩都要醫生紙咁誇﹖」我真係咁問個藥劑師﹐佢笑笑口話係。真係想問埋「咁買衛生巾洗唔洗都要醫生紙再搭封家長信呀﹖」

係咪顛架﹗藥就話驚人濫藥啫﹐我買個罩返屋企煮嚟食咩﹐乜都要醫生紙﹗

美國嘅醫藥分家就有呢度衰﹗乜Q都要醫生紙﹐睇一次醫生唔平架﹗我哋有保險就話啫﹐無保險嗰D分分鐘要傾家蕩產都唔掂呀﹗最衰就係要個病人睇完醫生重要走去藥房配藥。好哋哋唔係好緊要嘅病就無所謂﹐有時真係病到行都無力﹐重點可以揸車去藥房﹐埋去最篤篤嗰個位比張醫生紙個藥劑師﹐重要同佢講下D保險問題﹐保險包幾多﹐自己要貼幾多。然後重要等起碼幾個字添﹗有D藥房多客嘅話分分鐘要你等成個鐘頭﹐你話個病人係咪隨時死喺間藥房吖﹗真係黐線架﹗

好喇﹐既然唔見醫生紙就唔比個罩我﹐咁我都要去揾口水禧個醫生整張紙先得架。兩條茂利就盲摸摸中咗去醫生度喇。去到個姑娘好似見鬼咁樣望住我﹐梗係以為我顛咗喇﹐尋日先嚟過﹐做乜今日又嚟呢呀C奶﹖﹖﹖﹖

咁我都唔理咁多拿拿聲道明我嘅來意係要張醫生紙。都唔知係我D英文表達能力有問題定係佢哋隻耳有問題﹐搞咗好耐先知我想點。但係都要等醫生寫紙先得架。咁我見口水禧隻右眼係咁標眼水﹐心諗還掂一場嚟到咯﹐順便掛埋號叫醫生睇下喇。明明尋日滴咗眼藥水都唔得嘅話我就知唔慌好野喇﹗一陣聽日又嚟過﹐個醫生真係以為我暗戀佢都似﹗

痞咗大半個鐘終於見醫生。佢話口水禧隻眼發炎喎。衰仔﹗成日喺地下周圍摸完唔洗手就捽眼捽鼻﹐塞手指入口。教又教過﹐鬧又鬧過﹐嚇都嚇埋都重係咁。喺廚房煮緊飯睇少眼就嚟料﹗真係激到我爆炸﹗

我成日好似有嚴重潔僻周地咁抹都係因為佢咋﹗做到我幾乎五十肩咁濟﹐手都抬唔高呀家下﹗

無錯﹐支眼藥水當然都要醫生紙喇﹗無醫生紙那怕你對眼就嚟盲都好﹐陷膿陷到黐埋對眼都好喇﹐藥劑師唔見醫生紙係唔會做野嘅﹐sorry!

攞咗醫生紙又要颷返去頭先間藥房。點解一定要去嗰間呢﹖因為一直都喺嗰間配開藥﹐有晒我哋D保險卡嘅資料﹐如果茂茂然就去第二間嘅話﹐除咗要由頭填一大堆form之外﹐分分鐘重會搞錯野(我指藥房D人呀﹐唔係我呀﹗)﹐最後賴野嘅都係個病人。

但係……而家發現原來去返去開嗰間都係會賴野嘅。

排咗一輪隊終於到我哋。隊咗兩張醫生紙比個藥劑師﹐見佢好生面口下﹐都知會有麻煩。再望下個counter裡面有幾件都生面口嘅﹐心諗﹕杰咯今次﹗

我同口水禧一大一細一肥一瘦棟喺個counter面前幾個字﹐個藥劑師重喺樹揾緊我哋D保險卡資料。真係企到腳都軟﹗搞咗好耐﹐個藥劑師話我嘅保險要下年一月先生效﹐家下乜野都唔保喎﹗

我第一個反應係

﹐繼而心裡面已經媽緊。點會咁架﹖﹖﹖﹖﹖﹖邊會有真空期架啫﹖﹖﹖﹖﹖真係火都嚟﹗梗係之前禧爸公司要佢哋員工搞2010年嘅保險plan時搞錯野喇﹗妖﹗D美國人做野真係好鬼唔小心架﹗頂﹗今次已經唔係第一次架喇﹗成日都係咁﹐真係好麻乜煩﹗又要打電話去嗌一輪交解釋一萬九千幾次D低B customer representative先明﹗﹗﹗﹗

咁點呀﹖唔通叫個仔今日唔好吸藥﹐再喘多日氣先喇咁呀﹖都要硬食買咗個罩先架﹗盛惠USD34!!!!買個胸罩都無咁貴﹗

就係呢個爛鬼罩呀﹐要我左騰右騰﹐晒時間晒油錢﹐重要自己比晒錢呀﹗真係唔知有乜咁巴閉賣幾廿蚊美金嘅膠口罩﹗﹗﹗﹗顛架﹗﹗﹗﹗

但個仔條氣管貴過USD34﹐點都要買架喇﹗好﹗算﹐我比﹗

好喇﹐跟住又搞咗一輪先話我知無醫生嗰支眼藥水。重夠膽問我聽日先有貨﹐可唔可以等聽日喎﹗呢下真係火都燒上頭殼頂﹗我指住我個仔(當時佢隻眼重標緊眼水標到開咗水喉咁)﹐我問個藥劑師﹕「你睇佢隻眼標眼水標成咁﹐我點等聽日呀﹐大佬﹗發緊炎呀﹐老細﹗」佢聽完自己都唔好意思笑一笑﹐真係唔知有無帶個腦返工架﹗

佢見我個樣都就快殺人咁款﹐就問我洗唔洗幫我check下其他分行有無貨。最近嗰間分行揸車去都要半粒鐘喇﹐嗰陣已經下晝四點幾﹐D人放緊工好塞車架嘛﹗分分鐘一來一回唔止一粒鐘添﹗我都費時去嗰度﹐寧願去屋企附近間Target裡面個藥房好過喇﹗

咁佢就淨係收咗我個罩嘅錢叫我等一陣﹐D人攞緊個罩出嚟。望到個鐘先醒起﹐shit!!!!口水禧未食晏架喎﹗陰公﹗成四點幾五點﹐又無得瞓晏覺﹐唔怪之得猛要我抱喇﹗唉﹗見佢咁慘﹐五十肩咁痛都死頂抱住佢先喇﹐又餓又眼瞓好陰公架嘛﹗

睇見遠處有個藥劑師攞住一包幾大包嘅野﹐心諗應該係個罩喇。點知個藥劑師望一望個盒就藐藐嘴丟咗個盒去佢身後嘅一個箱裡面唔Q理喎。我真係牛咁眼bare到佢哋定一定﹐心諗﹐你唔攞嚟我唔Q行開﹐你都唔洗旨意serve第二個客呀﹗比個罩我洗幾多時間呀﹐離晒譜﹗好彩另外一個藥劑師即刻執返上嚟叫咗我去第二個窗口度等。去到嗰個窗口﹐點知原來係嗰個丟我個盒個蛋散負責比野我。我已經睇佢唔順超﹐佢重想質咗比我就算﹗平時D藥劑師比藥人要順手話埋比人知食幾多﹐點用D用具架嘛﹗嗰個死人頭想就咁隊咗盒野比我就算﹐我即刻叫住佢同佢講我唔Q識用呀﹗係吖嘛﹐我又無哮喘﹐點知點用呢D野啫﹗佢就死死哋氣咁拆開個盒攞個罩出嚟。點知佢哋執咗個比BB仔用嘅size我﹐佢自己都一路拆個盒一路好懷疑咁望住口水禧﹐覺得個罩應該唔岩佢size,但係竟然話我可以即管試下喎﹗個罩僅僅遮到口水禧個鼻哥窿咋﹐點試呀﹖我唔肯要呀﹐佢唯有問其他人有無medium size﹐D人真係白痴低能兼弱智﹐大一大個medium size喺度重話無貨喎。後尾都係比咗個medium size我喇。搞咗我咁耐﹐成五點喇﹐頂﹗重要去target配支眼藥水呀﹗又唔知要等幾耐﹗

好彩之前喺醫生度去咗廁所咋﹐唔係口水禧實賴咗喇﹗

去到Target差唔多天黑喇﹐又一輪衝風咁入去颷去個pharmacy度喇。頂﹗得一個藥劑師﹐重要serve緊一個長氣婆。唉﹗又要等。嗰個女人唔知係咪有問題﹐喺個counter度同個藥劑師研究用邊張卡碌錢過數都研究咗幾件字﹗個藥劑師又陪佢顛﹗我見個仔又餓又眼瞓真係好火滾呀﹗搞亂晒我哋嘅schedule﹐重要個小朋友挨餓﹐頂﹗幾時先肯死埋嚟serve我呀﹗﹗﹗﹗﹗﹗﹗

傾傾傾﹐傾完未呀八婆﹗是但攞張卡碌喇﹐妖﹗

卒之到我哋喇﹐兩條友都散咁濟。又要填form喇。藥劑師話要等幾個字D藥先ready。我真係唔Q等落去喇﹐個仔真係要食飯喇﹐大佬﹗我慣咗下晝餓到五點先食野啫﹐佢唔慣架嘛﹗打個電話叫佢老豆一陣去攞藥﹐我同個仔返屋企比飯佢食先喇。想佢食完快D沖涼早D瞓呀﹐今日四圍騰無瞓晏覺﹗

返到屋企﹐pat pat都未坐落梳化電話就響勒。target個藥劑師打嚟﹐都係同一翻說話話我無保險喇。嬲到屎都滾﹗

打去個保險公司又收咗工﹐頂﹗都唔理喇﹐唔通叫個仔繼續流眼水等盲咩﹗唯有自己比晒先﹐聽日打去吵大獲喇﹗

一節手指咁細支﹐扁tet tet嘅眼藥水﹐多謝USD80幾蚊吖﹗

今日喺無保險嘅情況之下就派咗USD百幾蚊比藥房勒。如果我係美國人無保險又無錢嘅話﹐我有病真係自殺算把喇﹗

美國D醫療真係顛爆﹗D野咁貴根本就係送錢比保險公司同埋藥廠。你唔買保險就比藥廠﹑醫生﹑牙醫斬爆你個荷包﹔你有保險就比保險斬爆你個荷包﹗私人買醫療保險係超貴嘅﹐重有好多condition唔包呢樣唔包嗰樣﹗通常公司嘅保險會全面D﹐差唔多乜都包﹐不過個病人都要夾D錢。生口水禧嘅時候﹐順產住咗三日兩夜醫院﹐一個人房(我諗佢哋係無多過一個人嘅病房)﹐埋單USD四萬幾﹗﹗﹗﹗﹗﹗﹗﹗﹗﹗﹗﹗﹗﹗﹗﹗﹗

但係我有個勁保險﹐最後我只需比USD4XX就埋到單勒。至於醫院同保險臺底盤數係點我都唔知﹐亦唔想知。

錢係一回事﹐要我走走笛笛又係一回事﹗今日我哋兩母子由天光搞到天黑先返到屋企﹐四圍咁混吉﹐真係激C﹗口水禧上落幾次車同car seat我真係抱到手都斷﹗

重要趕住返屋企煮飯架嘛﹐前日買咗D才料唔整就會變壞架喇﹐大佬﹗趕頭趕命索晒氣﹗重要比晒full price﹐嬲得我吖﹗