學校 I

香港嘅教育機制我唔評論喇﹐事關每個地方嘅教育都總會有甩甩漏漏嘅野架喇﹐美國嘅教育都唔係完全perfect無野唔好架。不過我又無喺呢度讀過書﹐個仔又未開始身受其害﹐所以暫時都無野可以發表。一連幾個blog我都係想講自己讀過嘅中學﹐各位同窗﹐假如你認得我就係呀邊個邊個衰人/八婆/豬兜咩都好喇﹐我講嘅野只係代表我自己諗架啫﹐就算你覺得我唱衰自己間母校咁反骨嘅野都做咁賤﹐搞到你心情低落嘅話﹐I am sorry!但係我都付出咗幾年青春喺嗰度痞到F5吖﹐點解會淨係痞到F5呢﹖都係其中一個令我憎恨呢間野嘅原因。假如你唔同意我講嘅野﹐勿插。同意嘅﹐心照﹗

五年嘅中學生涯我用個捱字嚟形容係無講多咗嘅。你覺得我唔念下間學校同D老師都叫做教育咗我幾年﹐無功都有勞吖﹐家下反轉豬肚係咪唔係咁好呀﹖或者係喇。應該咁講﹐如果唔係呢五年嘅時間裡面我喺呢間學校經歷嘅事﹐我今日湊仔﹑教仔﹑同佢揾學校就唔會多咁多野諗。或者都會好似其他嘅家長咁梗係揀間至勁至出名嗰間送個仔去讀喇喂﹗但係讀書以外重有好多野比讀書更加重要﹐可惜都比人忽略咗甚至覺得無乜所謂﹐我就係唔想個仔變成嗰D人咁樣呀大佬﹗

好難逐件事逐年咁講起﹐如果要嘅話﹐真係要寫本書咁濟﹗我只可以講D我印象深刻嘅幾件事架咋。講邊件好呢﹖就講D輕微D架喇。

我讀嘅係一間女校﹐嗰間學校係我小學派位嘅第一志願嚟嘅﹐嚴格嚟講應該係我呀媽同我小六個班主任佢哋兩個嘅第一志願至o岩。嗰陣我哋邊有發言權架﹖呀媽同個老師話入女校唔洗驚我會讀緊書時走去學人拍拖﹐派位嘅機會又因為無咗男生一齊爭﹐咁就少一半對手喇。唉﹗就係咁﹐我咪賴野囉﹗我建議假如閣下都有咁嘅諗法﹐唔想仔女早拍拖呢﹐你不如揾個荒島隊個仔/女去喇。好過送去女校或者男校。事關間學校無男同學啫﹐唔代表間學校周圍係無男學生架嘛﹗要拍﹐咪一樣可以拍到拖﹐你吹得佢脹咩﹖不過﹐我嗰五年中學係無拍拖嘅﹐呀媽﹐你放心﹗但係﹐放學嘅時候有無人喺校門度等呢﹐我就唔包架﹗(拿﹐我唔係曬命呀﹐我坦白咋﹗)所以拍唔拍﹐唔係淨淨係因為有無男同學呢個原因﹐重要睇下個人係點嘅。我呢D嗰期鍾意食齋嘅話﹐你揾港男企喺門口都無用喇﹐無胃口食就唔會食架喇喂﹗

返學﹐未課室之前﹐個個都要留喺下面操場度hea。間學校係唔夠凳坐嘅。D學生好多都要坐地下﹐咁全部都係女仔吖嘛﹐劣高條裙又好﹐露底又好﹐都係乸望乸﹐有乜所謂。但係學校好唔鍾意D學生坐地下﹐驚我哋坐得衰相啩﹐咁我哋咪著條PE褲喺裡面打底囉﹐又話咁樣日日著唔衛生。大佬﹐想點呢﹖唔通由七點返到學校就咁企到八點個鐘響走去排隊重要聽D人早會講幾個字野然後上課室先坐呀﹖你D先生喺樓上個教員室坐喺度嘆冷氣梗係唔覺有D乜唔舒服格﹐你落嚟同我哋一齊企吖笨﹗坐地下都可以坐滿間學校每一個角落﹐除咗操場﹐行到邊都見到一對對嘅大脾﹐全部人企晒喺度嘅話真係有D似遊行咁款呀﹗讀咗五年﹐唔覺有任何改善。我坐地下坐咗五年。朝早坐地下﹐中午食飯又係坐地下﹐我個pat pat同塊石屎地簡直係perfect match﹗我唔明點解唔可以比人喺課室等上堂﹐要早會咪打咗鐘叫人落禮堂囉﹐有乜問題﹖點解唔比上課室先﹖驚人偷野﹖我預科間學校朝早都係喺課室等上堂架﹐個個櫃桶都係書或者係臭到冤嘅PE衫褲鞋﹐邊個會偷呀﹖﹖﹖﹖﹖再講喇﹐邊個咁低能留低D貴重野喺櫃桶就抵佢比人偷喇﹗唉﹗

女仔多﹐難免會~~~~~~~~~~~~~~~嘈。我間學校係有小學同幼稚園嘅。大部份嘅同學由幼稚園都識得嘅。只有我哋幾件喺第二間學校派入嚟嘅ET外星人係唔識人嘅。咁佢哋識咗咁耐梗係大把野傾喇。好似我咁多口水嘅咪搭兩嘴傾到就傾喇﹐傾唔到就揾D大家的淨係想你望我我望你嘅人做朋友囉。第二件睇唔過眼嘅事係我班中有個同學手汗比較大﹐但係佢都好衛生架喇﹐時時都有條手巾袋住差唔多秒秒鐘都抹緊手咁濟﹐但係D同學都一樣嫌棄佢。上PE堂老師要我哋跳土風舞﹐咁音樂完咗就要轉partner嘅﹐D人真係賤格﹐個個同佢做partner嘅時候唔單止唔肯拖住人哋隻手﹐重用個背脊得住人﹐兼拎轉面同其他同學大聲地表達不滿﹐驚人哋D汗淨烏糟佢哋隻手喎。又話唔知會唔會傳染咁。嗰個同學超尷尬﹐唔知點算淨係圍圈咁行。一連幾個partner都唔肯拖佢同佢跳﹐擾擾嚷嚷﹐個先生唔知睇唔睇到﹐我就覺得無理由睇唔到﹐但係無表示過D咩。有無搞錯呀﹖點解容許D學生咁衰格架﹖到佢輪到做我partner﹐妖﹗我至鍾意唱反調架勒﹐我拖﹗我要證明比D八婆睇人哋係無病架﹐唔會傳染架﹗佢都唔想架大佬﹗佢呀媽生成佢咁﹐佢唔通斬咗對手咩﹖D同學見狀﹐當然係嘈冤巴閉咁E個又話﹕「嘩你拖咗佢陣間咪掂我隻手呀﹗」「嗰個又話﹕嘩﹐你咁都夠膽呀﹖」講呢D說話嘅時候佢哋係完全無理過個同學嘅感受嘅﹐當住佢面就咁講。搞到嗰個同學都唔好意思細細聲同我講話唔好意思整烏糟我隻手。唉﹗點解要人哋咁難受呢﹖個個都F1咁大個人﹐呢D基本嘅尊重唔係唔識呀嘩﹖最慘係連成績好嘅都係咁嘅人﹐唉﹗莫講話佢隻手有無汗﹐我係咪落咗堂都會去洗手架喇﹐有乜所謂啫﹖咩烏糟啫﹖夠你班八婆把口烏糟﹖

唔單止係學生﹐連老師都係咁對佢。上針”子”堂嗰陣﹐我哋做針包﹐個老師一拎起佢個針包﹐當住全班同學面前好大聲講﹕「嘩﹗咁濕嘅﹖」D同學梗係笑爆嘴喇﹐個先生重唔收手喎﹐重要繼續問人點解會咁。個同學當住全班同學面前解釋對手係比較大汗﹐由細已經係咁。我坐佢對面﹐見到佢一路講一路隻手揸到條毛巾爛咁濟﹐佢真係好緊張呀﹗個先生重要繼續問係唔係病呀﹐屋企人有無呀嗰D無聊問題。人哋係唔係病同埋屋企有無人都係咁關你乜野事呀﹖識唔識咩叫私癮呀﹖嗰一刻我都替個同學難受。因為就算個先生問完勒﹐D同學重繼續竊竊私語繼續笑人﹐佢哋嘅竊竊私語你估真係細細聲咩﹐梗係全世界都聽到喇﹗真係慘﹗

如果我無記錯嘅話﹐間學校係有分類似精英班咁嘅野。我當年無考到分班試﹐不過就算有考都唔會入精英班架喇﹗暑假嘅時候﹐學校竟然係有安排讀精英班嘅人上暑期班嘅。其他人﹖自己搞掂啩。呢D大細超嘅事經常都發生架喇﹐我一D都唔出奇。學校雖然無比我呢D蛋散上暑期精英班﹐不過都好勁催谷我哋嘅英文。上reading堂梗係唔少得﹐重有D英文日嘅野﹐迫我哋要全日用英文講野。私底下食飯嗰陣邊有人睬佢吖﹗上堂就不流都係英文架喇﹐有咩特別﹖但係有無人教過日常生活用嘅英文/對話/書信呀﹖喺公司寫email/出公司memo甚至同外國人同事講野嘅英文完全唔係喺學校度學架。重喺度教aeroplane同ship????點解唔教flight/plane同cruise嗰D常用D嘅野呢﹖記得有一次喺度同人講我有個rubbish bin﹐我個同事笑我。話我臺底嗰個係trash can﹐屋企個大垃圾桶叫garbage bin。街嘅垃圾桶都係叫garbage bin呀﹐rubbish bin!妖﹗我唔知係咪其他國家用rubbish﹐但係我真係多數喺度聽人講係garbage囉﹗

唔緊要﹐催谷我哋英文都係想鞭擦我哋嘅英文啫﹐個出發點係好﹐但係D先生就~~~~記得F2個英文先生要我哋背幾廿個As 咩(adjective)As嘅野﹐又係背﹐家陣記得咩﹖又懶係野話教我哋D發音咁﹐佢自己D發音都有問題喇大佬﹗要我哋訂SCMP(英文報紙)﹐交讀報紙報告。講真﹐咁多功課做﹐係人都揀最短嗰D新聞架喇﹐唔通同你用英文分識財經咩﹗又鬧。交比佢改咪就咁一個tick咁囉﹐有互動咩﹖如果係有心﹐應該係睇到邊段寫得好﹐叫我哋留意﹐第時都可以咁用吖嘛。把鬼﹗一尾谷﹐點樣教先見效就唔理。

呢個真係要講。屈咗咁耐﹐唔講埋呢個點都唔收工架勒咁晚﹗講開我F2個班主任﹐到而家都想打獲佢。E個八婆由我上堂唔舉手答問題開始就得罪咗佢。成年F2加埋上半學期F3嘅我都比人虐待。英文堂對答案要人舉手答。答錯要罰﹐不過都要睇人。佢係F1教精英班嘅班主任﹐咁我班上面由嗰班升上嚟嘅人就梗係得佢歡心多D架喇。答錯係無事嘅。我哋其他人﹖哼﹗正所謂舉手答就多數都死﹐唔舉手唔洗答咪無事囉。由於我長期唔舉手﹐引起咗佢嘅不滿。咁我就係咁E都舉返次嚟答下喇﹐點知答案梗係錯喇。重要比佢腰潤到我爆。都話咗我鍾意唱反調﹐咁我咪唔舉囉。佢要脅我如果唔舉就要搬我出去課室外企﹐因為我唔舉=對班中各人都無貢獻。我繼續睬佢都生臭狐﹐偏唔舉﹐睇佢耐我咩何﹗結果我試過罰企﹑罰背書﹑罰抄﹑罰留堂﹑牛高馬大比佢dick咗去坐第一個位﹐拎轉頭收簿就屈我同人傾計﹐又鬧。F2年少氣盛格又衰真係好反叛。佢越罰我﹐我就越唔舉手。佢咪越罰我囉。冤冤相報何時了吖﹖捉裙短永遠有我份。捉gel頭永遠有我份。事實係我條裙同佢D心腹比差幾皮喇﹐班長條裙咪重短﹗gel頭﹖前一晚去完飲無洗頭﹐第二朝起身唔記得咗走咗去用水梳﹐其實都唔係好明顯﹐但係因為係我個頭﹐所以特別有問題。臨瞓前紮辮仔瞓﹐等個頭第二朝luen少少﹐佢當我電髮。唉﹗重要打電話去我屋企揾我呀媽話要見我家長。我呃佢話呀媽唔喺屋企﹐呀媽其實坐喺廳睇電視﹗話要記我小過﹐原來我犯嘅錯係唔洗記小過嘅。都唔知佢做乜。我個頭零舍黑佢憎。攞成績表迫我入埋去班房(人哋個個都係淨係呀媽入去)﹐無野嘅﹐個課室成排玻璃窗﹐等出面D同學同家長個個都知我係問題學生要跟埋呀媽入去訓話成粒鐘啫。入到去﹐佢同我呀媽就坐﹐我就企﹐佢哋插我咁耐我企咁耐﹐企企下腳痛於是側埋咗一邊身﹐即刻插我企得衰無禮貌眼超超。再插我後尾枕有條細辮仔(嗰時我係剷青頭嘅)。喂﹗校規有話唔比留辮咩﹖﹖﹖﹖﹖﹖﹖﹖無吖嘛﹗係佢唔順眼就等如我個頭有問題。佢有叫我剪咗佢﹐梗係鬧住咁叫喇﹐我唔理佢﹐重話要記過(大大話話嗰年唔知比佢兇過幾多次要記過喇﹗)﹐後尾係art個先生叫我剪﹐人哋態度好好多﹐解釋合理唔係大石擲死蟹呀﹐我梗比面佢即剪。我個班主任以為佢兇我成功重喺我呀媽面前話﹕「做野要過得自己過得人﹗」呢句說話多謝佢教曉我講﹐因為佢嘅「過得自己過得人」﹐我喺返屋企嘅路上比呀媽插到爆咁濟﹗我肯定亦有頂呀媽嘴頂到爆咁濟﹐平時插我成績我無野講﹐插我行為唔好﹖叫佢收嗲喇﹗我係有講粗口﹐但係我一樣害人嘅事都無做過。有D同學自己做咗咩自己知(答問題突登答錯﹐因為唔想比其他同學知自己有個咁正嘅答案﹐咁就無人同佢爭攞高分喇﹗)。個八婆周街同其他嘅同學講唔好同我玩﹐因為我係黑社會﹗﹗﹗﹗﹗﹗﹗﹗﹗﹗﹗﹗﹗﹗﹗﹗﹗救命呀﹗咁抬舉我呀﹗配癮型眼鏡又有問題﹐點呀﹖家陣一個月入面深咗成百度近視呀﹐係咪等盲咗先配呀﹖﹖﹖﹖﹖有無常識架﹖就係咁﹐我好痛苦咁過咗成個F2。以為F3會有好日子過﹐因為我讀F3嘅時候唔係佢做班主任﹐重好似嫁咗無再教添……點知﹐呢D咪係生又累人C又累街坊囉。結婚咪結婚囉﹐唔教咪唔教囉﹐做乜要同我F3個班主任點我名啫﹖開學第一日就比人兇喇我。我都無做錯野﹐做乜無端端都要鬧我啫。算喇﹐我都慣咗。我覺得家下我面皮咁厚都係多得佢哋幫我練出嚟嘅。

我想講嘅係有教無類呢樣野根本無喺間學校存在過。我「被」懷疑係黑社會﹐所以老師針對我。一視同仁無發生過喺我身上。我唔舉手答問題﹑我留辮仔我gel咗隔夜頭﹑我裙短﹑傾計嘅時候講粗俗字﹐呢D有幾大件事呀﹖我有無影響到人呀﹖咁嗰D當住人哋面奚落人哋搞到人哋咁難受嘅八婆行為呢﹖又唔見有人出嚟講句野吖﹖懶係野喺我呀媽面前插到我飛起﹐咁又唔去教嗰D人唔好咁對同學﹖自私自利又鐘意擦先生鞋嗰D行為難道又係好嘅﹖如果口水禧第時有做以上嗰D八婆行為嘅事﹐比我知道嘅話﹐我唔大巴車到佢個嘴去到後尾枕我唔係佢呀媽呀﹗如果係有心機教﹐咁就應該睇下個學生點解唔舉手答問題﹐係咪佢唔敢﹑唔識定係乜野事喇。淨係喺度一尾迫我埋牆角有咩用吖﹖我係唔舉你耐得我何咩﹖我唔識吖嘛﹐舉嚟答錯咗博鬧咩﹗有無真正關心過學生呀﹖有無諗過幫我呀﹖有無理下人哋感受呀﹖下下都當住全班同學面前奚落人鬧人﹗邊有先生會叫學生杯葛學生架﹖我係黑社會﹖如果係你重出到學校門口﹗

重有一次有兩個同學上堂嘅時候喺我張臺前排緊隊等先生﹐咁佢兩個企到咁埋﹐又一路傾一路搞我D文具﹐我好難唔理佢哋架喎。唔知講緊附近間男校嘅野﹐我淨係愕咗一下頭望下佢哋啫﹐兩條茂利好似黑社會咁同我講﹕「o靚妹﹗唔好多事﹗做自己野﹗唔好聽呀﹗」佢哋嘅神情好似傾緊有如打劫金鋪咁大嘅茶飯咁認真﹐咁我咪dup低頭囉﹐但係兩把聲係咁喺我頭殼頂上面支支渣渣﹐一路重搞緊我D文具呀下﹗我聽到佢哋嘅內容係唔知邊個鍾意咗個大佬﹐但係埋唔到身又有勁敵﹐唯有同嗰個人個「手下」一齊但又比第二間女校嘅女仔截咗﹐咁呀邊個又好慶想打獲人又唔知乜乜乜咁最慘係當中佢哋所講嘅嗰抽人﹐我係識嘅。個大佬我差唔多日日都見到嘅添。dup低頭真係笑到眼水標。我都唔知我個朋友原來係咁紅架喎﹗可能佢自己都唔知﹗~~~待續~~~~