學校 II

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好﹐上回講到嗰兩個同學扮晒野喺我張臺前講佢哋溝仔(sorry﹐實在諗唔到除咗呢個字重有咩字應該用﹗)衰咗嘅事﹐重要兇我叫我唔好偷聽。我唔該佢哋兩個唔想比人知就唔好企喺我前面搞住我D文具講喇﹗除非我係失聰架啫﹐唔係嘅話﹐我呀媽生對耳比我咁健康﹐佢兩個企咁埋﹐我擘大口就接晒佢哋D口水架勒﹐點有可能聽唔到啫﹗話時話﹐你估我好想聽架咩﹗重有呀﹐唔好企咁埋喇﹐我之所以要坐嗰個位都係比個班主任欽點架嘛﹐一陣佢睇錯咗以為我都有份傾計﹐係人都知佢會罰邊個架喇﹗

點解我唔鍾意齋校呢﹖就係因為學校裡面無男同學﹐日日返學都係對住女仔﹑女人﹑老女人或者幾個中年嘅男教師。正常嘅同學係無野嘅。佢哋係專注佢自己嘅學業同佢自己嘅事。好少出聲呀之呀jaw。但十幾歲嘅年紀青春期開始﹐有D人梗係會對異性有D好奇﹐驚驚哋但又想知多D男仔野。所以有D同學對於嗰D出面識咗D男仔嘅同學零舍仰慕﹐覺得佢哋好勁呀﹐食lunch都有得約男仔一齊食。有D拍埋拖就更加係叻喇﹗如果個男仔係某間名男校嘅人嘅話呢就重不得了喇。(你話我小人之心咁諗都好喇﹗有無人夠膽話完全無吖﹖)所以因為咁﹐有D同學好鍾意喺學校裡面耀武揚威﹐講到自己出面識幾多人又有幾多人追呀咁。但係﹐嗰兩條茂利喺我面前講佢哋D威水史又好失戀史又好係無用架﹐我愕高頭望下佢哋就以為我好有興趣聽﹐梗係諗住﹕「傻婆﹐呢D野你肯定無試過喇﹐講你都唔明架喇﹐返屋企哺蛋喇你﹗」﹐之但係我係男女校升上嚟架﹐我見過男仔呢種生物架喇﹐大姐﹗我都有男性嘅朋友放假約埋一齊男男女女舊同學嚟我屋企BBQ架﹗所以我唔會聽完之後覺得你好巴閉架﹐唔該。

拿﹐女校D人唔好插我呀下﹗我真係唔明先咁講架咋。完全無歧視或者踩嘅成份架下﹗即係咁﹐我覺得喺五年嘅中學裡面(我有D同學由幼稚園開始已經係女校)日日都淨係見住女同學﹐屋企無細佬或哥哥又無男性朋友嘅嗰D同學﹐第時到大學甚至出嚟社會做事嘅時候先有機會接觸到異性會唔會唔知點或者唔習慣同異性相處溝通架呢﹖我自己係個例子。我中六嘅學校係男女校﹐讀完五年女校入咗呢間男女校預科嗰陣﹐開頭真係唔知點同D男同學溝通。周身唔聚財咁﹐大佬呀﹗我五年都習慣周圍都係比女圍架咋﹐突然咁多男仔喺我附近﹐有D驚佢哋但又唔知驚D乜。所以我都好想知其實係咪我自己低能咋﹖有無人都係咁架呢﹖

講過話學校要催谷我哋嘅英文﹐F2嘅時候reading堂整本深到嘔電嘅小說嚟教。嗰本野真係﹐一行字10隻有9隻係一定要查字典嘅。睇一頁真係要成笠鐘咁耐。因為你不停咁睇一粒字又放低本書﹐跟手就查字典﹐再攞支筆寫返個解釋落去本書度﹐唔係一陣間問書唔識答我咪又賴﹖咁如是者又睇又放又查又寫再睇再放再查再寫……查晒成行字又要由頭睇過先至明成句野o翁乜﹐你話勒﹐睇一頁要一粒鐘係咪唔算過份吖﹖本野D字又細﹐D行又密﹐D解釋真係寫到就嚟要加紙先夠位﹐成頁野花到無老花的幾乎有老花﹐唔係我一個人咁樣覺得架﹐係好多同學都覺得本野真係難啃架。後尾個先生有無教晒我已經唔記得勒。英文真係有得谷架咩﹖唔係教架咩﹖你唔好攞本英文財經叫我哋讀吖笨﹗痴線﹗係人都知要培養睇英文書嘅興趣應該由淺入深架喇﹐你一下子攞本高幾班嘅書嚟叫人睇﹐唔好話成本書喇﹐睇一頁我都想死喇﹗個故事又悶又唔知講乜﹗我本來有心想學好D英文都比你嚇走咗喇﹗

講開reading 堂﹐我諗起一件事。話說我哋嘅reading堂係分兩樣野嘅﹐一樣係學校指定要睇嘅小說﹐另一樣係你自己借嘅小說。借嗰本睇完要做D問題卡咁。指定嗰本要做D乜我已經唔記得咗勒。指定嗰本係每堂都要睇﹐老師會教書咁教嘅。不過﹐教吖嘛﹐即係佢入到嚟自己好似開著咗收音機咁鬼食泥咁係咁讀D字﹐讀完一段就用廣東話解一次囉。你話唔瞓就有假喇﹗但係﹐我無瞓。唔記得咗我拉頭馬坐頭位咩﹖邊敢瞓吖﹗嗰陣重識得咩叫比下面﹐用牙簽都要撐大對眼頂住喇。個先生讀讀下﹐我打咗個喊路﹐唔記得用手遮住個口﹐就係咁﹐唉﹐又賴。個先生咁o岩愕高頭望到我打喊路﹐一怒之下叫咗我企出去課室嘅中間面向住全班同學﹐佢話我無心機上堂﹐老師教緊野我就瞓覺。叫我將嗰個chapter講埋落去。慌佢唔係以為我上堂都瞓實係無備課喇﹐呢次重唔C﹗弊在我暑假嗰陣喺屋企已經pat pat痕睇晒成本野喇﹐連個結局都知埋喇。好﹐佢叫我講吖嘛﹐咁我咪講囉。講講下講埋下幾個chapter嘅內容﹐個傻婆梗係自己都無備咁多課喇﹐都唔知我講緊乜﹐喝鬼住我問我講到邊。咁我咪話佢知我已經講到下幾個chapter喇。佢接都接唔到口﹐唔知點算﹐唯有鬧住叫我返埋位﹐話下次我再嘅話﹐就出去課室罰企。頂﹗做乜個個都咁鍾意叫我出去課室罰企架﹐曲街﹗我又做錯咩呀﹖打個喊路啫﹐唔夠氧氣咪打囉﹐成班裡面有邊個咁戇居會好似我咁睇晒成本書呀﹖喺佢柄完我嘅同時﹐落堂嘅鐘就響勒。咁佢梗係拿拿臨揾舊豬肉去拜神咁雞咁腳閃喇喂。我嗰下真係好Q慶呀﹐無端端比人剷一獲。嬲到書都撕開兩邊丟埋落垃圾桶。好彩個friend幫我執返咋﹐唔係真係要放學死死地氣喺垃圾桶度執返本書喇﹗慶到出煙去廁所洗面。撞到同班坐後排嘅同學﹐佢哋問我發生乜野事﹐點解我會企咗喺出面嘅﹖原來佢哋頭先瞓晒覺﹐都係比個先生鬧我嘅嘈音嚇醒嘅﹐以為個先生鬧緊佢哋。點知一擘大眼就見到茂利>>>我﹐企咗喺出面講書。佢哋完全唔知發生咗咩事。我打喊路咋﹐盲柄﹐瞓覺嗰D喺後面呀﹐又唔見個先生罰佢哋﹗妖﹗其實D先生識唔識分好同唔好嘅學生架﹖定係我真係咁樣衰咁運濟﹐獲獲都係我嘅﹖

中三個班主任開頭因為聽咗中二個八婆嘅貼士﹐我梗係喺佢個shit list裡面排頭喇。有一次做緊測驗﹐走埋嚟一手揸住我D劉海﹐叫我即刻去廁所洗頭﹐洗唔甩D gel唔好旨意入返嚟課室。雞咁腳就去洗頭喇﹐大佬﹐份卷重有好多未做完架。喺廁所真係自己同自己講野﹐洗洗洗﹐洗乜叉野頭呀無端端﹗知唔知gel加水D頭髮會重硬D架﹖我肯定我唔係wet look嗰隻頭﹐只係用咗好少嘅gel等前面執野唔好遮住對眼啫。係呀﹐我係有用gel呀﹐咁測完驗先洗頭係咪會死架﹖我梗係唔會真係洗喇﹐係咁E用手撥到散咗咪入返去囉。比人驗完屍咪繼續做埋份卷囉。佢對我都算係咁喇。有個同學年中穿咗耳環﹐都經已唔敢戴耳環返學架喇﹐用D好似針咁嘅野塞住個耳窿驚埋口吖嘛﹐點知早會喺操場排隊嗰陣太陽光射落佢對耳仔度反光﹐比個班主任見到﹐上到課室當住我哋面前剷到個同學喊到豬頭咁款。亦因為嗰個同學﹐兼且我參加嘅女童軍好衰唔衰係我個班主任lead嘅﹐咁多咗接觸了解我多少少之後﹐我下學期開始脫離個shit list。班主任繼續努力用佢嘅一隻手指尾捽C嗰個同學。唉﹗嗰年梗係佢犯咗太歲勒﹗

八婆低能野太多﹐真係不能盡錄。不如講我點解會無得喺嗰度讀F6喇。

係咪以為我唔夠14分呢﹖唔係。我夠分有凸呀。我係文科人嚟嘅。除咗中英數之外﹐主要係讀中/英國文學﹑中國文學史﹑地理同西史嘅。因為係教會學校﹐所以會考要考埋宗教科添。我嘅地理同西史呢就真係好屎﹐得D。成張cert最見得人係中文﹑中/英文學﹑中文文學史同埋宗教。中六只有一班文科同一班理科。中五嘅時候有一班理科三班文科。咁中六嘅文科班就梗係收唔晒三班嘅人喇﹐於是我哋就要填D資料﹐好記得要填宗教科攞咩野分。我攞嘅係B但我唔係天主教徒。填嘅時候個sister都即刻眼望望下邊個茂理宗教攞B呀﹗重比個會心嘅微笑過我添。填好晒之後喺學校等公佈入選中六張名單。我重心諗我嘅分數唔差吖﹐宗教連sister都睇到我有B架喎﹐應該會入得返原校讀F6架。點知等咗成粒鐘﹐張名單出咗嚟﹐sorry,無我個名囉。我個名喺waiting list第一個呀。嗰下O晒嘴。唔係呀嘛﹖我入唔返﹖﹖﹖﹖﹖跟手重要知道有個同班同學入得返﹐但係佢會考得8分囉。8分呀﹗我多佢兩倍有多呀﹗點解我無得讀佢有嘅﹖重要我去waiting list﹐唔慶就假喇﹗禧婆婆到今日都重話緊我當年係因為鬥氣所以後來即使學校打鑼咁揾我話有位返去讀我都唔返去﹐其實係我覺得好侮辱就真﹗咩學校嚟架﹖有無公平呢兩個字架大佬﹖你收晒D人﹐高分嘅低分嘅都收係唔收我﹐好勒﹐嗰D30分嘅有咁高分人哋都去揾過間好D嘅學校喇﹐睬你咩﹗好喇﹐走咗D人嗰陣你就諗起我呢條蛋散勒﹐周圍叫同學揾我。我係喺我預科間學校度撞到D同學﹐嗰陣我都交晒野報晒名等開學咁款喇﹐D同學見到我追住話﹕「喂﹐你去咗邊呀﹖學校打鑼咁揾緊你呀﹗你有位返去喇﹗」我已經慶到上咗頭學頂喇﹐我寧願一世都唔知學校揾過我叫我返去﹐而家咁樣我覺得有D呼之則來揮之則去。重記得禧婆婆嬲到爆炸﹐喺嗰間預科門口剷完我之後用手指指住我話﹕「我再問你一次呀下﹐你返唔返去﹖你唔返去唔好後悔﹗」或者嗰刻呀媽覺得我玩野﹐重要係攞自己嘅前途玩野﹐因為我有好D嘅學校唔讀﹐走去讀間商科學校咁戇居。佢覺得我係文科人留返喺文科F7就會考得好D﹐入間好D嘅大學應該無問題。但係因為我揀咗自己讀都無讀過嘅商科嚟玩﹐F7考到一撻糊塗﹐所以先入唔到佢想我入嘅嗰D大學。

但係﹐呀媽唔知道我唔係單單為咗呢件事而唔返去讀。重有兩件事令我睇清楚間學校D人﹐我覺得留低已經無意義﹐哀莫大於心死﹐既然都忍無可忍咯﹐當自己放自己一條生路嚟行把喇。—–待續—–