學校IV

其實佢哋都好努力想同其他嘅同學有計傾﹐唔洗話做好朋友﹐但係都唔洗話係敵人喇。不過都唔係個個同學可以接受到佢哋。不過入咗嚟無幾耐﹐佢哋就同我哋玩開班人叫做熟D喇。咁就中午一齊出去食飯﹐喺學校嗰陣又圍埋一齊吹下水咁囉。粗口爛舌就梗架喇。傾計啫又唔係走去用粗口鬧人。我覺得無問題。不過同學梗係覺得好有問題。漸漸﹐我哋亦都被一D同學認定為「唔係好人/學生」(唔知又有無人話我哋係黑社會﹖)。老師對我哋當然亦都「另眼相看」喇﹗D待遇都零舍特別D﹐捉D乜乜物物嘅尺就對我哋嗰陣係零舍嚴謹D﹐好彩﹐嗰陣我都已經無再同自己個頭玩遊戲喇﹐就咁梳條辮就返學勒﹐無gel隔夜頭喇。條裙都係咁喇﹐摺下裙頭咁囉﹐查嗰陣咪放返落嚟囉﹐但我條裙短極都係膝頭哥對上一寸啫﹐唔係咁都叫過份呀嘩﹖﹖﹖﹖書我都讀架喇﹐F3嗰陣下學期整咗張滿江紅成績表比呀媽嘆﹐梗係剷青咁剷到我上咗天花板喇﹗F4嘅時候屋企有事﹐所以個人都生性讀書。所以都無乜在入D老師嘅shit list。不過梗係喇﹐D先生都擺晒成副精神落去嗰幾件同學度落﹐我就自然要坐「冷板凳」喇﹗

記得有一次派成績表定唔知做乜見家長定還是禧婆婆自己打電話去學校揾我班主任喇﹐總之佢兩個就傾過下計咁喇。

席間我班主任就問我呀媽﹕「呀X太呀﹐你知唔知你個女喺學校係同乜野同學玩架﹖」正當佢諗住我呀媽梗係答唔知嘅時候﹐點知我呀媽話﹕「我知呀﹐嗰幾個叫XXXXXXXX嘅同學吖嘛﹐喺出面派入嚟架嘛﹐我知。」

班主任驚訝﹕「係呀﹐就係嗰幾個學生。你知唔知嗰幾個學生係點架﹖」我呀媽於是就將我平時放學返屋企爆大獲嘅內容講晒出嚟。我個班主任聽完我呀媽陳述過之後都唔知點算好﹐梗係喇﹐佢肯定無諗過嗰咋內容會比我呀媽講晒架嘛﹐直情好似比人搶咗D對白講添﹗

班主任﹕「咁你覺得你個女同嗰D學生玩無問題﹖」我已經唔記得禧婆婆exactly講過乜野﹐不過大概係佢話只要我唔係學佢哋唔返學走咗去玩嗰D﹐返到屋企又會講返學校嘅事出嚟﹐佢係唔覺得有乜問題。而且﹐呀媽相信我所講嘅其實嗰D學生唔係害人﹐只係無心機讀書啫。我個班主任好似講咗D類似無諗過我呀媽咁開通之類嘅野咁喇﹐重講埋比我呀媽知其實學校對嗰幾條友仔真係好頭痛﹐唔知點處理佢哋好。講講下﹐佢哋傾到本身學校嘅學生質素。班主任同我呀媽講其實呢間學校嘅學生成績係好﹐但係有好多學生嘅品性好有問題。老師問問題突登答錯呢個秘密係我呀媽同班主任傾完計話比我知。D同學點樣攻心計去「善」其他同學博老師歡心﹐博攞高分嗰D例子多到我個班主任都講唔晒。佢其實就睇到D學生做呢D衰野﹐但係可以點啫﹖記佢大過呀﹖所以一直都無出過聲。自己知就算喇。唉﹗點解學校嘅世界會係咁樣﹖

我真係好多謝我個班主任爆單咁嘅野比我呀媽知﹐唔好等佢重成日以為我返緊一間好正嘅學校咁荀﹗我日日都返緊一間地獄咁嘅學校呀大佬﹗真係唔顛都要去還神呀﹗

未講最後一件事之前帶開少少話題。如果你有睇過一套戲叫Scent of a Woman(女人香)﹐你就明白我跟住想o翁乜。(或者都係唔知我講乜﹗)。唔緊要﹐等我講少少套戲講乜。一老一嫩男主角﹐一件係退役兼盲咗嘅將軍﹐一件係準備考名大學嘅窮鬼高才生。一日高才生見到幾個曳學生整蠱校長﹐但校長淨係睇到一個有份嘅學生。當校長知道個高才生睇到邊個整蠱佢就用盡方法利誘個高才生爆D人名出嚟﹐事成後就會同佢寫推薦信攞埋獎學金比佢入一間出名嘅大學。高才生唔肯爆﹐校長就威脅佢屈佢包庇同黨有份整蠱校長要踢佢出校。件事搞到要全校師生家長一齊開公審。真係有份做嘅其中一個有錢仔學生都要被審。但係個有錢仔個老豆就教佢轉o太篤自己D同黨出嚟以換取自己甩身。相返個高才生就點都唔肯講。於是校長就要踢佢出校。將軍喺個公審會度為高才生講咗一番話﹐最後高才生無事留返原校。

最後一年喺嗰間學校﹐嗰幾個同學發生咗一件事。話說佢哋朝朝早都喺一間餐廳度打躉打到差唔多夠鐘先返嚟上堂。有一日﹐其中兩件一早就請咗事假同病假﹐所以都無算返學。喺餐廳度唔知邊個話去踩冰﹐有幾個就話要跟埋去唔返學。上堂嘅時候﹐老師發現同一班人咁岩又會咁多件都唔見咗無返學﹐覺得唔妥。於是就dick咗幾件無跟去玩嘅嚟問話。我無被問話﹐因為我唔係同佢哋一班。不過就做做下test個訓導入嚟問咗邊個係XXX同XXX之後就喺我同另外一個friend個位度圍住我哋轉咗兩圈唔知睇乜。(點解我次次咗緊測驗嗰陣梗有D先生嚟揾我﹐唔係叫我去洗頭就係唔知喺度望我D乜架呢﹖)。第二日就爆咗獲喇。嗰咋之前一日無返學嘅全部比人dick咗去審。因為先生已經知道咗佢哋去晒踩冰。有一件無去但係喺餐廳聽到佢哋話去玩嘅低能婆爆晒出嚟﹐重要同先生講﹕「佢哋有叫我去呀﹐不過我唔去之嘛﹗」(呢個係事後其中一個罰得最甘嘅嗰個同學講我知嘅)。所以佢哋都無得唔認走咗去玩。我唔知D先生係點樣審﹐不過梗係唔會一齊審啩﹐博下邊個唔噤嚇嘅話就會穿晒煲吖嘛。

我最記得最後一次喺學校等佢哋審完落嚟﹐其中一個之前請咗假嘅同我講話有人叫嗰幾個當日先決定曠課嘅一齊話喺請咗假嗰兩件教唆佢哋逃學。咁佢哋就撼扮唥都唔洗記大過﹐可能係D缺點呀之類。因為牽涉逃學咁大獲嘅事﹐學校亦都通知晒佢哋D家長/監護人。有人嘅父母迫/氹/勸/教自己個女跟老師嘅講法﹐屈晒落嗰兩個事先請假嘅學生度﹐話佢哋教唆同學逃學以令自己個女甩身。最後喺大家嘅「同心協力」之下﹐嗰兩個事先請咗假嘅傻婆就比學校記咗大過。其他人﹖唉。

事後﹐我真係服咗嗰幾個出賣朋友嘅八婆重可以厚住面皮扮晒可憐委屈受害人咁同我哋坐埋一齊扮愁扮慘扮關心嗰兩件蛋散。可憐嗰兩個豬麥就咁食咗死貓﹐咩咗大過喺身。我諗佢哋唔係介意食咗個大過﹐佢哋都無諗住會升F6架喇。但係我相信佢哋最估唔到嘅係朝朝日日同你攬頭攬頸嘅好朋友﹐傾心事嘅好朋友﹐以為風雨同路嘅好朋友﹐喺最危急嘅關頭會為咗自己出賣朋友。真係要講句多謝家姐﹗

你哋想唔想知女人香套戲究竟個將軍講咗咩令到個高才生喺唔洗出賣同學嘅同時又甩到身呢﹖佢話作為一間陪育領導人才嘅學校應該要知道一個領導最應該有嘅條件﹐就係無論喺乜野環境之下都唔會出賣身邊嘅人以換取一D利益。個高才生正正就係有咁嘅條件﹐但係間學校不但無珍惜佢﹐反而要罰佢踢佢出校。嗰個出賣朋友嘅有錢仔就可以得到學校嘅庇護繼續喺學校讀落去。如果間學校要培養咁樣嘅領導人才就真係大獲。

同樣﹐我間學校為咗釘死嗰兩個同學﹐竟然要其他有份逃學嘅人一齊屈人教唆自己逃學﹐係吖﹐最後個個都聽晒話吖﹐學校亦都成功記咗嗰兩個學生大過吖﹐咁又點吖﹖你養咗一班反骨無情無義無人性無思想無骨氣無腦無靈魂嘅白痴出嚟呀﹐傻仔﹗我唔會話逃學係一件o岩嘅事﹐但係我更加認為講大話冤枉人卸膊出賣朋友聽人老點虛偽敢做唔敢認不負責任比逃學大罪囉﹗嗰咋人渣﹐自己要跟埋去玩﹐做咗又唔敢為自己做嘅野負責任﹔比人嚇兩嚇就即刻搖尾乞憐傾晒條件同學校妥協等自己甩身﹔出賣咗人重要咁虛偽扮晒自己都唔想係比呀媽迫嘅乜乜物物咁將自己咁賤嘅事推得一乾二淨﹔重有嗰個博先生歡心爆大獲話人哋有叫埋佢去不過自己唔想去嗰個蛋散呀﹐唔該慳D喇你﹐呢D時間都唔放過擦鞋嘅機會﹗我望見呢班人同埋間學校﹐真係想嘔﹗

學校成日強調大家喺同一間學校就係一個unity﹐大家要互相有faith同love。同學之間係sisters﹐要互相愛護同關心(to love and to care)。學校要培養有完美品格嘅人(to build a perfect character and mind)。請問出賣朋友叫faith, love, care呀下????? 叫perfect character and mind呀﹖屈學生叫unity呀﹖成班人你篤我我篤你呀﹖成班losers!

呢件事之後我覺得嗰間學校已經唔係我可以容身嘅地方喇。佢哋要培養嘅係一個為咗自己就可以唔理人哋死活嘅人渣﹐成績名利大過天﹐人格可以出賣。講一套做一套無問題。成績好扮乖擦鞋係好學生。成績唔好再加唔係佢哋要求嘅嗰種乖就係壞學生﹐加埋講粗口就直頭係黑社會添喇﹗為咗唔想比「乖」學生比「壞」學生沾烏帶壞﹐就分化學生。well done, good job!校長老師你哋得咗喇﹐好成功呀﹗Yeah! F*ckin’ proud of y’all!

其實這些都是咸豐年以前的事﹐我再提也不能怎樣了。我祇想給自己一個警惕﹐他日替孩子選學校的時候不要光我自己喜歡就硬塞孩子進去。我不是現在來怪我媽把我送進那所學校﹐我只是覺得要是當天我想到可以跟媽媽坦白不喜歡這個學校希望讓我轉校的話﹐我受的苦掉的眼淚生的氣也許可以少一點。我的中學年代沒有歡樂﹐只有憤怒和失望。忍氣吞聲在那裡呆了五年﹐我覺得很不值。中二拿成績表的那次我真的很冒火﹐不為老師告我狀﹐我不滿的是母親沒有把我申訴的事情認真聽進去﹐只顧著一直的拿老師告我的狀猛罵。有冤無路訴是一件很悲哀的事情。我但願自己將來每當孩子跟我傾訴的時候我都真誠地聽他講的每一個字。不要妄下判斷﹐什麼事情都先相信老師怪罪自己的孩子。我跟他才是unity﹐我對他才該有faith 和love﹐作為母親﹐關愛孩子不是光從替他找間有名望的學校讓他去唸去考第一就是愛﹐最重要是他在那裡快樂與否﹐同學對他怎樣﹖老師怎樣待他才是最最最要緊的事情。要成功得靠自己﹐不是靠走旁門左道去達到自己的目的。「做人要過得自己過得人」﹐沒錯﹐但是要做得到一定要有良好的品格。要不然就會變成只過得自己過不得人了﹗卑鄙無恥﹑無情無義不可取﹔害人之心不可有﹐防人之心也不可無﹗世界上有很多父母只關心孩子的成績而忘了人格也很重要。所以他們的孩子會為了自己幹盡壞事去害人。所以我也會提醒孩子要小心。戴著面具的人更要小心。真小人與偽君子﹐我寧選前者。書唸不成一點都不失敗﹐人格破產才是徹底的loser!共勉之﹗