港式牛肉乾

凡事總有第一次。我今日正式食咗我咁大個人嘅第一張港式牛肉乾……滯喉﹗

超速比警察醒咗張大禮兼扣埋分比我做紀念。。。係我錯嘅﹐快咗少少。

原來而家已經唔會同司機講﹕「熄匙車牌身份證」架喎﹐重一路抄牌一路同我打牙較添﹗

第一個攔截我嘅警察淨係做呢個手勢>>>>﹐下半身係擘大對腳呈紮馬咁嘅裝態。到我較低窗扮”mooh look”嘅時候佢仍然係唔講野﹐好有力咁指我去佢要我泊底嘅地方。

然後另一個警察埋嚟話我知﹕「小姐﹐頭先我哋嘅偵測機check到你喺XXX超速﹐嗰度係行50﹐你行71。所以而家要比張告票你……唔該車牌。」

此時有條茂利想博大霧攞張加州車牌出嚟昆呀蛇…..警察接過張野之後>>>然後問﹕「呢張咩嚟架﹖」

茂利﹕「加州車牌囉。」心諗﹕「抄吖笨﹗」

警察呆咗幾秒先再講野﹕「咁~~~咁~~~~你有無香港嗰D呀﹖」

此時茂利心知走唔甩﹐死死地氣攞張HK車牌同身份證出嚟任警察魚肉喇唯有。

同時﹐有另一位警察上前睇下架車﹐發現我身後有一件貌似蛋散o岩o岩瞓醒嘅小茂利喺樹呆望警察。

警察﹕「E~~~佢幾定喎……做乜咁呆嘅﹖」

我心諗﹕「我比你抄牌我個樣重呆喇大佬﹗無D同情心。。。嗚~~~~嗚~~」

我﹕「係呀﹐o岩o岩瞓醒吖嘛﹗」

警察﹕「係呀﹐放學多數都係咁嘅樣架喇﹗」

我﹕「唔係放學呀﹐佢喺第二度返嚟。」(重想博下同情﹐所以扮友善嘅司機一路同警察傾計一路啜緊手上杯珍珠奶茶。咪就係咁囉﹐咁串﹖抄緊牌重飲珍珠奶茶﹗呀蛇做到無停手﹐又熱又口渴又多蚊﹐見到面前條友喺樹嘆世界咁樣重唔眼火爆繼續抄咩﹗)

警察﹕「啊﹗咁一定係時差重未掂喇﹗唔怪得知咁眼瞓﹗」講完行咗去。

抄咗我牌嗰個警察此時行埋嚟講我知要罰幾多錢。我因為未喺呢度抄過牌﹐所以想問清楚D野……

我﹕「你幾時寄比我﹖寄去邊個地址呀﹖」

警察﹕「寄咩呀﹖」

我﹕「張野囉。」

警察﹕「寄邊張野比你呀﹖」

我指住佢手上揸住嗰本告票簿。

警察有D覺得我唔知係玩野定係低能﹐佢話﹕「我而家即刻比你﹗」

我﹕「咁我去邊度交錢﹖」

警察﹕「郵局或者ATM。」

我﹕「ATM係咪即係櫃員機﹖」(我確實唔係玩野﹐我真係以為佢係指APM﹗幾乎想問係咪觀塘﹗

警察look大對眼﹐深呼吸﹕「係。」

我﹕「咁ATM點交﹖係咪輸入D receipt number?」 (虧我講得出口receipt number!)

警察側頭﹐斬咗兩下眼﹐有D似後悔抄咗我牌﹐如果唔係就唔洗答咁多問題。不過佢都教咗我點用ATM交錢。

我﹕「無野架喇呵﹖我走得架喇呵﹖」

警察深呼吸﹐再斬眼﹐有D頂我唔順嘅語氣﹕「係呀﹐你走喇。」

喺我被抄嘅中途﹐有件唔生性嘅友仔重不停問﹕「點解要比錢呀﹖」

我﹕「抄牌呀﹗」

口水禧﹕「呀﹐點解要抄牌﹖」

我都想問呀﹗

我﹕「媽媽speeding。」

口水禧﹕「點解si- v- ding?」

我﹔「媽媽唔o岩囉﹐唔踩brake。」

口水禧﹕「點解唔踩big呀﹖」

唉﹗我今晚會一直問自己架喇﹐仔﹗