午夜無人聞底時

話說我成日都喺夜媽媽﹐甚至係半夜三更先嚟摺好洗乾淨嘅衫﹐因為費時攤喺梳化度第二日唔係比口水禧丟晒落地﹐就係比Mimi攞嚟當床瞓﹐搞到又要再洗過。近日我重唔知邊樹踩親隻衰貓條尾﹐佢報仇咁報見到布質嘅野就同我斟茶遞水﹐o岩o岩洗完乾完嘅床單枕頭袋床墊﹐攤咗喺梳化諗住食咗飯先啫﹐都竟然比佢報咗仇﹗都未計禧爸新買張凳呀﹗所以而家更加要一乾咗收返嚟嘅衫就要即刻摺好擺好﹐唔得閑摺就咪攞入廳住﹐所以要乾一批摺一批。呢排又大風﹐周街都係花粉同塵﹐每日著過嘅衫﹐唔好理有無出過街都好﹐都全部著一次就洗﹐又要分顏色分種類﹐所以差唔多兩三日就要洗一日衫﹐係呀﹗三個人嘅衫要洗一日﹐你聽過未﹖我以前聽個朋友講佢洗一家四口嘅甚要洗幾日﹐我重以為佢誇張啫﹐原來係真嘅﹗所以我成日都可以有成個人咁高嘅衫堆要摺嘅﹗(問你怕未﹗)

咁點解會夜媽媽先嚟摺衫呢﹖無嘅﹐日頭有大把家務做﹐重要應酬一個除咗瞓之外係唔會停口問你野嘅口水禧﹐我已經超唔得閑。二來即使係乾衣機乾嘅衫揚嚟揚去點都會有塵﹐而我摺緊衫嘅時候﹐個衰仔就最鍾意搞我D衫﹐索晒D塵一陣又猛打核痴兼捽損個鼻﹐所以夜晚搞掂晒D豌碟廚房沖埋涼就嚟摺衫囉。

唔知大家有無一個習慣﹐摺緊衫嘅時候會攞D衫嚟聞下﹐我就有。唔係僻好呀﹐我只係想聞下嗰D就咁晾乾唔係用乾衣機烘乾嘅衫有無異味咋﹗喺香港買返嚟嘅衫我通常洗完都就咁晾乾佢唔擺入去乾衣機嘅﹐因為試過擺過條牛仔褲入去﹐長褲當堂變咗四角骨﹗

自嗰次之後就唔敢再用乾衣機烘香港買返嚟嘅衫勒。呢排就更加要聞下D衫喇﹐因為有時我真係等住有幾機衫要乾又摺唔切乾咗嘅衫嘅話﹐我就將乾咗嘅衫放喺洗衣籃度先﹐得閑再摺。即使放喺房入面閂埋門都難保口水禧或者禧爸呢兩條蛋散會開咗度門唔記得閂返架嘛﹐咁萬一mimi喺呢個時候乘機入內同我敬茶嘅話﹐我又唔知摺好放入衣櫃﹐咁我個衣櫃就真係臭過榴槤﹗

所以我摺嘅時候都要逐件索下﹐check清楚無異味先好摺。