口水禧唱雞腸歌

口水禧而家返緊嘅summer camp係教手語﹐即sign language。當初同佢報呢個summer camp嘅完因就係因為見佢唔識英文﹐諗住咁就不如比佢學返一招半式﹐就算醒唔起隻英文字點講﹐都起碼做到家手語表達到比人知佢想點吖嘛。返咗三日﹐老師教咗rainbow(彩虹)﹑around me (包圍我)﹑flower(花)﹑sun(太陽)﹑window(窗)﹑blue sky(藍天)﹑happy(開心)﹑stop(停)﹑thank you (多謝/唔該)﹑very good(非常好)等等咁多字。不過我諗口水禧淨係記得rainbow is around me點做架啫﹐因為老師日日都喺circle time嘅時候同佢哋唱首有rainbow呢個字嘅歌﹐所以口水禧特別對rainbow有印象。不過佢嘅rainbow動作做得唔正確﹐大家咪諗住照抄完就去做比識手語嘅人睇諗住露兩手呀﹐實比人笑到面黃架﹗口水禧個rainbow做到好似叫隻雞嚟啄米咁樣﹐真係R爆頭都唔知佢原來係講緊彩虹﹗

口水禧呢個禮拜返第二個summer camp﹐唔同老師教兼且有好多新同學﹐第一日返學嘅時候﹐原來老師係新嚟嘅﹐所以有D混亂。加上有好多嚟陪太子讀書嘅伴讀老書童都係新嚟嘅﹐小朋友又係第一次嚟返summer camp﹐搞到七角咁亂﹗唔知係咪咁樣﹐口水禧就成日都跟住我﹐連circle time叫佢自己去都唔肯﹐甚至會含住泡眼淚去circle time添。因為我第二日要co-op﹐所以我一早已經同佢做咗工作﹐話明比佢知我要co-op,加上呢班比上兩個星期返嗰班多兩倍人﹐所以co-op嘅媽媽多咗好多野要做﹐根本就無時間理自己個細路。於是第二日﹐口水禧嘅情況比第一日好咗少少﹐不過都有間唔中跟住我﹐去circle time嘅時候都有D眼淚。嗰日第二次嘅circle time就好咗好多﹐竟然比我聽到佢跟住老師同學唱上面嗰首rainbow歌添。就係咁﹐我返到屋企就不停咁唱﹐佢聽到我唱﹐重會跟埋我一齊唱﹔我哼嘅話﹐佢又一齊哼﹐都幾好玩。聽到佢由唔識唱歌嘅BB變成識唱D音重有歌詞添﹐真係覺得人嘅進化好神奇﹗嗰日重有一件好神奇嘅事﹐就係話說有個女同攞住個玩具電話﹐口水禧想玩﹐但係唔識同人講﹐佢走嚟問我「﹕媽媽﹐我想玩嗰個呀(指住個電話)﹐點同佢講呀﹖」我比佢嘅舉動嚇咗一跳﹐因為口水禧返咗咁多日summer camp都係獨行俠嚟﹐其實唔止係佢﹐其他年齡差唔多嘅小朋友都係咁樣﹐自己顧自己﹐好少同其他小朋友交流﹐連玩具都費事爭。會爭野嗰D通常一係私底下識得對方﹔一係就唔係第一日返學﹔一係就喺屋企做慣大佬/大家姐(有兄弟姐妹嗰D)。平時叫口水禧主動出擊去同人玩佢都唔制﹐好似人哋個身有臭狐咁﹐寧願唔玩。嗰日佢竟然為咗個電話而轉性﹐真係奇積﹗重要主動走嚟問我點樣同人哋講想同佢玩嗰個電話添﹐好彩啫﹐都叫做起碼唔會搶人哋手上面嘅野。雖然教咗佢講佢亦都同對方講咗﹐但係對方唔肯比佢玩﹐咁我唯有叫口水禧等人哋玩完先去玩囉。

題外話﹕D人成日都話獨生子女又霸道又自私﹐自我中心爆棚﹐唔同人溝通等等。我則認為係家庭教育或者係小朋友天生嘅性格問題。無可否認係有獨生子女會咁樣﹐但係非獨生嘅小朋友有呢幾樣缺點嘅人大有人在﹐所以從今以後再有人同我講﹐口水禧得自己一個人無細佬/妹會好容易有獨生子嘅毛病﹐我一定會話比呢D人知﹐如果口水禧第時變成咁﹐唔關佢事﹐關我事啫﹐咁肯定係我無好好咁教導佢喇﹐關鬼佢係唔係獨生子事咩﹗車﹗

第三日我都要co-op﹐事前亦都同口水禧講明咗我嗰日會超多野做﹐叫佢自己照顧自己﹐circle time自己去。第三日嘅表現最好﹐唔算成日跟住我﹐又肯自己出去玩籃球﹑重有個家長報料比我知話口水禧同佢講咗少少英文添。嗰日一入到學校﹐佢重自己主動同到咗嘅家長講good morning﹐之前幾日都要我踢一腳先郁一郁同人打招呼﹐嗰日認真勇氣可加﹗snack time嘅時候我叫佢自己去洗手﹐佢都自己搞掂咗﹐無玩水﹐重識攞紙抹乾對手同埋自己去有家長準備好嘅枱坐低開餐﹐換著之前幾日﹐喺廁所又嗌呀媽﹑疴尿又嗌呀媽﹑洗緊手有同學衝入去佢又嗌呀媽﹑snack time我喺廁所睇住D細路洗手﹐口水禧就喺出面大嗌呀媽﹑人哋個呀媽同佢講野﹐佢又嗌呀媽﹑circle time又嗌呀媽﹐幾乎嗌到隔離街都聽到咁濟﹗嗰日嘅circle time佢重識得跟住老師坐佢就坐﹐人哋起身佢就起身﹐老師做動作佢都有跟住做﹐老師教咗隻itsy bitsy spider,口水禧竟然跟住由頭唱到落尾(雖然D歌詞就唱到有D似以前獎門人估歌仔個環節咁)﹐但係起碼都叫做睇到佢投入咗重好enjoy添﹗返屋企嘅時候重喺車上面聽住隻itsy bitsy spider係咁唱添。希望下個星期唔洗又要從頭開始再培養過D感情喇﹗

我知道有好多嘅小朋友晨咁早就可以做到以上嘅野﹐而我就當係個仔登錄月球咁大件事嚟記錄﹐我要求低吖嘛﹐只要佢一日進步過一日﹐又或者即使係唔進步都好﹐只要佢有盡力嘅話﹐我就當佢係好架喇﹗

做佢呀媽點可以唔撐佢呀﹐係咪先﹖