萍水相逢變朋友

相中左邊四個唔洗我介紹﹐我諗大部份有睇yahoo blog嘅人都知道佢哋係乜水喇(右邊嗰三個茂利先唔知係乜水啫﹗)。上星期六﹐我同禧爸有幸可以同幾件後生仔女見面食晏﹐真係突然都覺得自己後生咗幾年﹗感覺真係好﹗

我同禧爸嚟咗美國10年了﹐會成日見嘅朋友一隻手數晒。其實嚟嚟去去都係得winnie一家(重要winnie係一隻狗嚟添﹗)禧爸嚟美國係因為winnie嘅主人﹐所以理所當然﹐我哋兩家人就差唔多個個禮拜都會見下﹐食下飯。D節日都會一齊慶祝﹐因為佢哋喺度同我哋一樣都無屋企人喺度。所以我哋次次都人丁單薄咁過時過節﹐幾丁友食下飯就算。

歸根究底﹐我諗我哋兩個都唔算黑人憎嘅人啩(我自己覺得喇)﹐不過D同事住得唔近﹐個個都有家庭同埋自己嘅朋友﹐假日都同屋企人過喇。我哋兩個自閉仔又唔係主動去結交朋友嘅人﹐所以真係夠膽C喺度咁耐都無乜朋友會放假一齊去街食飯。(都係嗰句﹐除咗winnie一家咁大把囉﹗)唔知係咪咁﹐我以前成日比禧爸話一開口講野就停唔到口嘅人都會變咗唔識同人溝通嘅人。試過一次喺街撞見blog友﹐我同人哋握完手就淨係識傻笑﹐上車之後﹐禧爸都話我頭先超呆﹐成個傻婆咁(小米媽﹐真係唔好意思﹗)。所以我更加唔敢叫blog友見面﹐驚唔知會唔會悶親人喇﹗一係就狂熱得濟嚇親人就唔好喇。上次喺香港本來都想約幾個blog友見面﹐點知我同口水禧由落機就食藥食到返嚟先好返﹐所以喺香港嗰陣唔敢約人見面﹐都唔想傳染人哋﹐更加唔想惹到比人哋嘅小朋友喇﹗

點知…….有一日﹐有個傻婆(唔係我呀﹗我係顛婆咋﹗)留咗電話比我﹐話不如約食飯喇。我梗係lur飯應喇。就算我哋兩老自閉﹐都唔想個仔都一齊自閉架﹗加上對方嘅兩個小朋友我都想見好耐架喇﹐咁就留返電話比人﹐重話嗰幾日會得比人添。誰不知﹐人老真係有D無記性﹐竟然過咗幾日都未打比人。突然有一日見到電話有miss call﹐重走去留回應比人問人係咪頭先call過我﹐點知﹐人哋話﹕係有打過電話比你﹐不過係幾日前喇傻婆﹗傻婆﹖叫我做傻婆﹖應該叫懵婆吖嘛﹗miss 咗call幾日都唔知﹐重要走去問人係唔係頭先打比自己﹐呢D唔係懵係咩呢﹖我覺得呔媽超好耐性﹐事關佢之後都打過幾次電話比我﹐但係我都係miss call﹐然後幾日後先發現嘅﹐其實我真係應該自己跳落堆填區算數﹗我重同人講好彩我唔係報案中心做﹐如果唔係﹐真係人哋報案嗰個香咗幾日我先發現人哋有報過案﹐打比我報案都唔及走出街大嗌救命咁有效﹗

傾過兩次電話﹐原來呔媽同我一樣係口水婆﹐雖然話三年一個代溝﹐我同呢個後生女幾乎有兩個代溝添﹐不過傾落又唔覺我老過人喎(收唔收到呀呔媽﹐即係話你老我後生呀﹗)好驚訝嘅係覺得自己同緊楊千嬅講電話﹐因為佢把聲好似楊千嬅﹐講兩句又一大笑﹐呢隻style我鍾意呀﹐因為咁就唔顯得我顛吖嘛﹗

約咗食飯﹐呢兩個年青人(我同禧爸背後係咁樣叫佢哋)真係好。約去邊度食之前﹐佢哋重話我哋出去city揾佢哋遠﹐不如佢哋揸車入嚟我哋呢度喇。喂﹗大佬﹐佢哋拖住兩個細嘅﹐梗係我哋就佢哋喇﹐不過我好開心﹐呢對年青人咁識得為人著想﹐家下無乜幾多個後生會咁樣架喇﹗去到食飯嘅地方﹐佢哋未到﹐我哋坐低之後就睇下D menu先﹐禧爸竟然話有D緊張﹐我話﹕「女嘅已經嫁咗人架喇﹐男嘅﹐我諗你唔好嗰樣啩﹖緊咩野張啫﹖」人年紀大咗係咁﹐識新朋友係有D驚唔知人哋會唔會嫌我哋兩個老坑悶。禧爸重問驚唔驚我會好似上次撞見blog友咁超呆﹐我確實係有少少驚自己會咁﹐因為我嘅外表同內裡真係爭好遠﹐一陣亂講野﹐唔覺意爆咗句粗嚇親人哋就唔好喇。所以講野都要小心D﹐如果唔係人哋下次都唔想再見到我哋喇。

無幾耐﹐四件蛋散就喺我哋面前出現勒。

帶頭行先係呔媽推住手推車上嘅車仔﹐後面係呔爸weak7拖住呔仔。後生果然係後生﹐離遠望重以為呔媽化咗妝﹐我心諗﹕「C勒﹐自己成個街市婆咁添﹗」原來人哋係天生麗質呀﹗唔化妝都似化咗妝﹐我呢D先叫化咗妝都唔似有化妝﹔無化妝又似化咗妝喎﹐不過係halloween萬聖節嗰D妝呀﹗

呔仔一下子見到三個陌生人﹐重有個霎熟頭嘅呀嬸係咁E起排牙對住自己笑﹐當然有D緊張。細佬好D﹐因為坐喺手推車上﹐角度問題﹐睇唔清我哋幾個。坐低之後唔知吹咗一輪水都未介紹大家﹐認真搞笑﹗呔爸一坐低好乖﹐佢話﹕「呢個係我師姐﹗」係呀﹐我哋係同一間小學嘅學生﹐不過我大佢幾年﹐佢入嚟讀小一嘅時候﹐師姐都就嚟畢業。本來想問多D佢小學嘅野﹐不過驚悶親另外兩件﹐所以都係講咗少少鎖碎事﹐不過已經夠我笑到想賴尿﹗

野食嚟到﹐我屋企嘅口水禧真係失禮﹐玩野唔多肯食﹐搞到要成檯人氹佢食﹐真係丟假﹗反而呔仔自動波自己食﹐重食完再要求添D﹐口水禧真係好執笠﹗因為口水禧哥哥嘅超慢﹐人人食完佢重喺度誓緊願﹐細佬已經唔耐煩要跳車﹐叫口水禧快D食喇﹐佢重喺樹誓願﹐真係「有少少想中佢﹗」(唔係有少少鍾意咗佢喎﹐唔好誤會﹗)結果一邊誓願一邊要禧爸餵先食完面前個豌仔嘅烏東﹐大湯豌入面嗰D比禧爸搞掂咗。

因為口水禧玩開嘅小單車唔o岩佢玩﹐於是將架前7比咗呔仔。重有少少衫都比咗呔仔﹐玩具就無勒﹐因為口水禧嘅玩具好特別﹐唔係無頭就係無腳﹐有殼就無餡﹐有樣就唔識行﹐你話點好意思比人啫﹖甩皮甩骨咁﹐叫人哋點玩呀﹖如果早少少識呔仔一家﹐嗰陣細個玩嘅玩具就好D﹐大D識掉野嘅時候﹐真係乜都掉落地﹐幾乎呀媽舉得起嘅話﹐佢都想掉埋落地﹗

雖然係咁﹐年青人竟然買咗盒玩具比口水禧﹐重同我爭單搶比錢找數﹐估唔到﹐一條麻甩仔竟然爭贏咗個C9﹐枉我去買咗咁多年餸同D八婆C9批開踭都會爭輸比呔爸﹐真係無面見人﹗不過﹐年青人﹐下次我D真功夫唔會錫住你架喇﹐你都係坐埋一邊把喇﹗

食完飯我哋移咗去一條巷等呔仔試車﹐口水禧個衰仔﹐平時喺屋企又唔見佢咁狂熱地玩架單車﹐係有人爭嗰陣先扮晒野。重要有少少蝦呔仔細過佢唔夠佢嚟添﹗(真係無家教﹗)後來呔仔坐咗上去試車﹐我哋叫技安口水禧哥哥推佢﹐呔仔心諗﹕「今次重唔報返仇﹗繼續推喇傻佬﹗」就係咁﹐口水禧一老推一路口黑面黑咁﹐幾衰﹗經過今次﹐我終於發現呢個人原來係會蝦細過自己嘅小朋友﹐同齡或者大嗰D佢就即刻扮晒鵪鶉咁﹐所以返屋企之後就不停要落藥﹐教佢對細過自己嘅小朋友唔好咁粗手粗腳﹐唔好大聲同人講野等等。不過問佢鍾唔鍾意同呔仔玩﹐佢話鍾意喎(梗係喇﹐人哋比佢蝦完都無聲出吖嘛﹐技安﹗)

呢對年青人真係好﹐D人成日話80後嘅一代唔掂﹐其實都係睇人架啫。至少呢兩個就係討人喜歡嘅嗰種。有禮貌又搞笑﹐照顧兩個小朋友可以話係無微不至﹐其實係我要同佢哋學野先o岩﹐對小朋友超有耐性﹐呔爸話呔仔試過半夜瞓瞓下覺叫老豆起身播歌佢聽。佢哋一坐低就同口水禧玩﹐睇口水禧嘅反應係絕對唔抗拒同佢哋玩﹐雖然呔爸之後想氹口水禧同佢去買波﹐口水禧叫極都唔肯去﹐呔爸猛話﹕「我係好人嚟架﹐我送咗盒野比你﹐我係好人嚟架﹗」口水禧不為所動﹐派咗個檸檬比叔叔食﹗

有D人你同佢相處過會知道佢同自己o岩唔o岩key;呢兩個年青人係未見面﹐齋睇blog都覺得佢哋好易同人相處﹐得人鍾意﹐唔係個blog點會咁多人睇﹐咁多人鍾意佢哋﹖佢哋個blog我日日都睇﹐好鍾意睇﹐禧爸問點解咁鍾意睇﹐原因好簡單﹐咪就係佢哋寫嘅野影嘅相好真好簡單囉﹐係真真正正寫低生活點滴嗰種blog而唔係又想寫但又曬命嘅嗰種囉。(原諒我扮晒老pat pat咁呀之呀左﹐我喺度見得人少吖嘛﹐一次過見四件係多野講D架喇﹗)

其實應該係我多謝呔爸﹑呔媽﹑呔仔同細佬同我哋過咗個歡樂嘅週末下晝﹐下次玩咩好呢﹖