唔洗驚﹐無人犯法被送去勞改﹐係講緊我去口水禧學校返嚟之後眼瞓到爆﹐好似被人拆咗棚骨咁啫﹗
嗰度真係一個集訓練與懲罰於一身嘅地方﹐專治我呢D細時激到呀媽生蝦咁跳嘅人。禧婆婆成日都話我細個曳到爆炸﹐今時今日比口水禧嚟幫佢報仇係我罪有應得嘅。而家陪埋佢去返學﹐除咗服侍口水禧之外﹐連埋佢D同學都要一齊勞役我﹐太陽底下叫我同佢哋推韆鞦﹐佢哋就爽喇﹐搖嚟搖去﹐D風吹得佢哋不知幾涼﹐枉我企喺度推﹐一手一個﹐曬到我個頭殼放隻蛋都煎得熟咁濟﹐重要推完一件﹐第二件埋嚟接住又要推﹐想飲啖水都唔得。
今日重要華氏九十幾度(攝氏34度)﹐真係乜肥油都煎晒出嚟喇﹗
以前對得細路多﹐真係怕咗佢哋﹗除非我有無窮嘅精力﹐否則根本唔係佢哋對手。生咗口水禧之後比佢地獄式訓練咗幾年﹐家下同佢去返學﹐可以攞D本事出嚟同佢D同學過幾招﹐發現其實都係唔夠佢哋嚟﹐究竟D細路食乜架﹖咁多精力嘅﹖
老師叫佢哋掛D蜘蛛上去﹐呢班友仔﹐個個都好唔專心咁做緊野﹐對眼又望住其他野﹐究竟係咪嚟做臥底無間道傻強架﹖
老師整咗D蜘蛛比佢哋掛﹐班友仔就拆返晒D腳出嚟齋掛D蜘蛛腳上去﹐你睇﹖全部係腳﹐咁個身呢﹖個先生真係有少少想中佢班友﹗
學校目前為止最吸引口水禧嘅有兩樣野﹐就係
同籃球。Clara聽到嘅話都咪話唔hurt爆﹗
唔知幾時學識咁樣坐落個籃球度﹐重要自覺咁樣坐好有型添。
呢個樣﹐我係clara都怕咗你喇﹗今日clara老豆呀媽都有嚟﹐睇過呀女嘅boy friend仔之後﹐結果放學嗰陣﹐見clara走咗去尋日拖手仔張相裡面衝向口水禧同clara嘅嗰個男仔度。重同嗰位男同學拖到實一實﹐口水禧摺埋都得喇﹗
失戀中……
為咗幫助口水禧第時circle time唱歌仔嗰陣唔好發呆﹐我今日問老師借咗佢嘅CD返屋企抄多份﹐等禧哥喺屋企都可以聽到D仔﹐聽熟咗佢就會跟住唱﹐到返學circle time嗰陣就會投入D﹐無咁痴呆。口水禧聽到屋企播平時喺學校唱嘅歌好開心﹐不停叫我唱比佢聽﹐我喺筋疲力盡嘅情況之下都要唱佢聽喇﹐既然佢都唔嫌我D歌喉咯﹐咁我都要應酬下我唯一嘅忠實fans喇﹐係咪﹖
仔﹐好快你學識多D英文﹐你就可以同後面嗰幾個蛋散一齊玩架喇﹗呀媽支持你﹗
一個禮拜連續三日嘅勞改日﹐可以將一個平時可以瞓好少覺嘅我搞到送咗個仔去瞓覺之後﹐自己都不支攤喺梳化瞓著﹐瞓到好似人哋去咗咁款﹗完全無晒知覺﹐摺埋劈咗喺梳化上面。有時一粒鐘之後我會自己扎醒﹐但今日就兩個鐘都唔識醒﹐係口水禧喺房度叫我﹐我先比佢叫到扎醒。迅速喺梳化坐返起身﹐戴返副眼鏡之後就一個翻身落地直奔大少間房報到。
鯉魚翻身呢招﹐相信無乜邊個湊開仔嘅人會唔識嘅﹐身手分分鐘好過龍虎舞師﹗無論係日頭﹑夜晚﹑半夜﹑睇緊電視﹑食緊飯﹑講緊電話等等(我諗排緊毒嘅話會有D難度﹐點都要清潔咗先出得嚟架﹖﹖﹖﹖)﹐任何時候﹐總之老細急call﹐我哋standby緊嘅就會自自然然葉問上身咁敏捷﹐一個飛撲﹐喺最短嘅時間「look」到老細面前等吩附。
有無發現口水禧個樣有少少唔同咗呢﹖無錯﹐個髮型唔同咗少少。冬菰頭又再重現江湖喇﹗由佢嘅私人髮型師”V兜 Balloon”操刀之下﹐將佢個頭變咗身﹐前面都還可以﹐後面有D慘不忍睹。好彩條友仔照鏡淨係識照前面﹐比佢見到後面﹐分分鐘同我脫離母子關係﹗
真係要揾個專業人士同佢修輯下先得。
無喇喇話要扮書入面架thomas個樣喎﹐你話佢係幾咁有作為﹗係咁架喇﹐我哋平時無野做嗰陣就係做埋晒呢D無聊野架喇。
真係七情上面﹐照足本書咁做架﹗睇見架thomas﹐我突然諗起上次同佢去大埔嘅火車博物館睇火車﹐呢個人問我哋點解嗰D火車無面無眼喎﹐梗係中咗thomas毒喇﹗如果D火車有眼耳口鼻﹐我寧願行斷對腳都唔搭﹗
太浮誇喇呢位人兄﹐摺埋喇你﹗
D滴水係咪有D搞笑咗少少呢﹖都係嗰句喇﹐佢照鏡唔照側面﹐所以我又過咗關﹗
呢個應該呀clara同學最鍾意﹗(如果下個禮拜又翻撻嘅話)
clara:o岩o勒o岩o勒﹐啜埋嚟喇﹗
扮野啫﹐洗唔洗咁肉緊﹐幾乎條大動脈都出埋嚟咁濟呀﹗
勞改教導所點滴片段
掛蜘蛛
一個動作跳到尾
