已經三歲半嘅口水禧﹐廣東話可謂非常流利﹐點解我會話佢流利﹖駁嘴駁舌嗰陣一D都唔會口窒窒﹐快而準駁到我好想中佢﹐由此可見﹐我已經唔需要再擔心佢講野唔叻﹐不如擔心下佢會因為口多比人圍重好喇﹗雖然G﹑K音字頭嘅字重未搞得掂﹐不過上網睇過資料﹐原來好多小朋友呢個年紀有呢D問題都好正常﹐因為呢D音雖要透過條脷後半截嘅郁動嚟發音﹐好多小朋友呢個年紀係唔知點樣控制條脷﹐所以有D小朋友讀sister會讀咗fifter﹑Miss讀咗mit﹑公公讀咗東東。不過到咗佢哋五﹑六歲嘅時候﹐就會更加知道點樣掌握控制條脷嘅技巧﹐慢慢改善D發音問題架喇。
發音可能係唔準確﹐不過口水禧用字絕對係出乎我意料之外嘅多。由以前嘅乜都喺前面加個「唔」字﹐總之我講乜﹐佢都要加呢個字嚟頂我(個肺
)﹐例如﹕
媽媽﹕禧禧﹐快DXXXX喇﹗
口水禧﹕呀﹐唔快D﹗
媽媽﹕禧禧﹐食喇﹗
口水禧﹕呀﹐唔食﹗
媽媽﹕禧禧……
口水禧﹕呀﹐呢個唔係禧禧﹗
媽媽﹕返屋企……
口水禧﹕呀﹐呢個唔係屋企﹗
我開頭以為佢係豬兜﹐淨係識加個唔字﹐於是我有時會突登冼佢﹐我用個唔字﹐睇下佢會點答。
媽媽﹕禧禧﹐唔好玩喇﹗
口水禧﹕呀﹐玩﹗
媽媽﹕喂﹐唔好撞爛我D野喇﹗
口水禧﹕呀﹐撞爛D野﹗(有時重會強調D﹕呀﹐想撞爛D野﹗)
衰仔吖﹐冼你唔到添﹗
到而家駁嘴嘅時候﹐重識用相反詞添。
媽媽﹕婆婆﹐你唔好再買玩具比佢喇﹐佢D玩車多到﹗
口水禧喺隔離聽到我同禧婆婆講電話即搶答﹕呀﹐好買喇﹐D玩具少到﹗
媽媽﹕你個臭人禧吖﹗
口水禧﹕呀﹐香人禧吖﹗
媽媽﹕快D食喇﹗
口水禧﹕呀﹐慢D食﹗
竟然漏咗最精境嗰個例子添﹕
有日我同禧爸講緊野﹐唔知講乜突然我哋講咗句「收皮」。口水禧即刻駁咗句﹕呀﹐「開皮﹗」
除咗相反詞之外﹐重會更正我講嘅野添﹐巴閉喇﹗
媽媽﹕快D食飯呀﹗
口水禧指住面前嘅麵﹕呀﹗呢D唔係飯﹐係麵﹗慢D食麵﹗
媽媽﹕唔好搞我D野呀下﹗(通常係同佢喺廁所擦牙嘅時候叫佢唔好搞面前嘅兒童牙膏﹐費時佢玩到周圍係)
口水禧﹕呀﹐呢個係禧禧嘅﹐可以搞﹗(從細我就同佢成日講﹕唔係你嘅野唔好搞﹗點知而家比佢洞悉咗另外一個解法﹕即係如果嗰樣野係我嘅﹐就可以搞﹗)
重有﹐開始識批評人哋嘅說話﹕
呀﹐媽媽整D野唔好食。(唔想食野嘅時候永遠都賴我整嘅野唔好食)
點解媽媽做野咁慢﹖(想我陪瞓覺但我話我有好多家務要做﹐佢就會出此言窒下我)
爸﹐你重唔洗手﹖(老豆去完街返屋企掛住拆信未有第一時間去洗手)
點解細路駁嘴嘅能力係咁勁架呢﹖尤其是家下嘅細路添﹗個個食咗豹子膽呀﹖我咁惡都夠膽駁﹗唔寫個服字都唔得﹗
有時真係比佢激到好想Xyz^&﹗^*^$﹗佢﹐但係比佢學咗咪盞我第時不停咁比佢問候自己﹗制唔過喎﹗
所以﹐家下佢頂我嘴﹐有時忍得就忍喇(如果唔過份嘅話)﹐忍唔到就頂返佢﹐不過唔係鬧佢﹐只係講D佢意料之外嘅說話等佢駁唔到我。例如﹐叫佢快D食飯。佢聽完一定駁﹕呀﹐慢D食﹗咁我就會即刻話﹕咁慢都要食架﹗可能佢以為我會好似以前咁即刻鬧佢駁嘴﹐所以當佢見到激我唔到﹐重比我話佢慢都要食嘅時候﹐一時之間佢完全唔知應該點駁返我﹐咁我就等如斷咗佢條後路﹐乖乖哋同我食咗D飯佢。早知呢個方法work﹐以前就唔洗死咁多細胞喇﹗
兩則笑料﹕
話說衰人禧爸喺口水禧細個嘅時候成日教口水禧叫我做海膽(話我冬天唔剃隔肋底毛)﹐我哋成日咁樣你話我係海膽﹐我又話你係海膽。耳孺目染之下﹐連埋個仔都識講海膽呢兩個字。不過始終﹐我同仔單打獨鬥嘅時間多﹐咁個仔好自然就同我同一陣線﹐兩母子一齊話禧爸先係海膽。
前幾日睇緊戀戀沖繩﹐官恩娜喺樹食緊海膽飯﹐口水禧聽到之後好奇怪望住電視問我﹕「呀﹐點解有海膽嘅﹖」於是我話佢知「海膽係海鮮嚟嘅﹐喺海裡面架。」喺呢個時候﹐口水禧爆咗句﹕「呀﹐爸都係呀﹗」(我諗口水禧連海膽係乜野都唔知﹐淨係知佢老豆先有﹐所以覺得好奇怪點解電視個姐姐會食只有老豆先有嘅海膽同飯架呢﹖)
呢D咪叫害人終害己囉﹗
佢老豆除咗無奈地笑之外已經唔知講乜應個仔好﹗
_____________________
話說尋晚洗好豌﹐我哋三個坐喺梳化玩神奇畫板﹐你畫D野我估﹐我又比D你估咁喇。當然﹐口水禧畫嗰D得佢自己知係乜。
老豆努力咁以佢有限嘅畫畫天份畫咗個足球出嚟過個仔估﹐好彩早排世界杯嗰陣我哋都成日睇﹐連埋口水禧都有睇﹐所以佢估到係個足球。
唔知大家平時有無同小朋友進行下性教育架呢﹖我就由口水禧喺BB嘅時候﹐每次沖涼就指住佢重要嘅部位﹐話比佢知嗰度同嗰度淨係媽媽﹑爸爸同埋醫生先可以掂。如果有其他人掂嘅話﹐就一定要話NO﹗同埋話比媽媽知﹗始終個仔有一日都會有機會唔喺我視線範圍之內﹐呢D野早D教定好D。(我個人認為)
而家天氣熱嘅話﹐佢都會同佢老豆一齊沖涼﹐有時佢見到D老豆有而自己無嘅野都會問老豆點解乜乜乜。有時我喺廁所換衫﹐佢想推門入嚟﹐都開始要教佢人哋換緊衫或者去緊廁所就唔好入去﹐同埋要敲門。有時比佢衝咗入嚟﹐我重未好衫﹐佢就會指住我個心口話﹕「鹹濕﹗」
E~~~~~邊個教架﹖我肯定唔會企喺個仔面前指住自己心口話鹹濕啩﹖死勒﹗唔通係佢細個重係BB嘅時候﹐我哋同佢換片嗰陣﹐實會肉緊地拃下佢周身D肉﹐口中就猛話﹕「哎呀﹗咁可愛嘅BB﹐等我鹹濕下佢先﹗」
唯有急急同佢解釋心口唔係鹹濕﹐係身體嘅一部份。好彩佢唔識英文嘅鹹濕係點講啫﹐如果唔係﹐喺學校指住老師嚟講﹐重唔比人踢出校﹗
尋晚本來畫畫下想教下佢人體結構﹐等佢知下男仔同女仔嘅身體有乜唔同喇。於是叫佢畫個JJ嚟睇下﹐點知佢畫咗以下呢幅野﹕
係唔係睇唔明呢﹖根據口水禧嘅旁述﹕
左邊係爸爸嘅J﹔右邊係口水禧嘅J﹔中間最大嘅係
媽媽嘅JJ﹖﹖﹖﹖﹖﹖﹖﹖﹖﹖
咁睇得起我呀﹗多謝晒喎﹗
爸爸﹐你檢討下喇﹐個仔日日同你一齊沖涼﹐原來你喺佢嘅心目中係無我咁大架﹗
不過話時話﹐呀仔﹐媽媽身體邊忽令你覺得我都有J﹐重要係咁大架呢﹖
