口水禧第二次洗牙記

距離對上一次嚟洗牙已經係半年前嘅事﹐嗰次重記得口水禧嘅表現算唔錯﹐都無話嗌生嗌C咁唔合作﹐有幾下都驚到流咗少少眼淚﹐不過都好聽話肯鉏大個口比人洗佢D牙。聽講有D小朋友超驚﹐驚到連張凳都唔肯上去坐﹐或者上到去一路豪哭﹐搞到醫生都無辦法做野﹐唯有叫家長遲多幾個月等個細路鎮定返少少先再嚟過。所以上次口水禧嘅表現令到牙醫叔叔同護士姐姐都讚不絕口﹐令到口水禧對睇牙醫一D抗拒都無。(基本上係鎮定過佢呀媽嘅……)

自從口水禧齊晒牙之後﹐每日就刷三次牙﹐早﹑午﹑晚一次﹐每次刷之前先用牙線清一清D牙嚹﹐咁就確保無野攝喺D牙嚹裡面搞到蛀牙喇。

好彩之前同佢轉咗用電動牙刷﹐佢已經慣晒D牙刷震動嘅感覺同埋聲﹐所以當牙醫同佢洗牙嘅時候用嘅電動洗牙儀器時﹐口水禧都無乜反應﹐因為佢已經日日都比我震慣咗﹐完全無恐懼。其實電動牙刷嘅好處係比起用手去刷更加乾淨﹐因為用電嘅關係﹐牙刷震動嘅次數點都密過同快過我哋用手刷﹐個原理有D似牙醫同人洗牙時用嗰支電動野快速兼有力清除黐喺牙齒上嘅污垢﹐等佢唔好殘留喺口腔內變咗牙石或者直頭蛀鬼埋隻牙。加上用電動牙刷嘅時候﹐我哋係唔洗自己郁手向上刷向下刷﹐有時自己重手咗都唔知﹐久而久知刷到牙肉都縮埋﹐露出大半忽牙出嚟﹐搞到食凍野又話痺﹐飲熱野又話酸。

好彩暫時口水禧都無發現有蛀牙﹐護士問係邊個同佢刷牙定係佢自己刷﹐我就話比佢聽係我同佢刷嘅。因為見佢未搞得掂點用電動牙刷﹐所以我就幫佢揸牙刷同佢刷﹐等佢熟咗我同佢刷嘅手勢之後﹐就等佢自己嚟。有時佢都好想自己刷﹐咁我哋就會一齊揸住支牙刷刷牙﹐希望佢記住次序同方向﹐刷乾淨每一隻牙嘅所有唔同面﹐咁就可能可以保住棚乳齒至換牙為止。

今次係第二次嚟做主角﹐口水禧有少少緊張﹐上咗張凳之後were到個扶手爛咁濟﹐因為護士同佢將張凳背較到成張床咁﹐茂利禧以為張凳郁嘅話﹐佢就會被sir咗落地下﹐所以C都were實對扶手唔肯放。後來對手已經無辦法再掂到對扶手嘅時候﹐佢竟然驚到用隻腳kick住個扶手添﹐慌C真係會跌落地﹐真係比佢笑爆﹗

瞓落咗之後護士就搽咗D野喺佢棚牙度﹐睇下多唔多牙石。好彩都無乜﹐所以成個洗牙過程又快又C服﹐係間唔中人哋伸條喉同口水禧吸口水嗰陣條友驚條喉﹐所以咬住人哋條喉唔放﹗真係唔知佢如果一路都咁樣僵持落去嘅話﹐人哋係咪要送咗條喉比佢担住返屋企呢﹖

洗完牙﹐護士問我可唔可以搽D fluoride喺佢棚牙度﹐但係要佢一定唔好吞落肚先得。我都唔肯定口水禧可唔可以忍住唔吞﹐於是就問口水禧可唔可以忍住唔好食咗人哋嘅fluoride﹐佢斬釘截鐵咁話唔得﹐咁我都唯有照直同護士講﹐護士都話如果口水禧都覺得自己會吞嘅話就唔比佢搽﹐因為吞fluoride落肚會令個胃唔舒服甚至會嘔添。所以一直口水禧都係用緊可以吞(但唔等如可以當糖咁吞食﹗)嘅小童牙膏。佢成日都會唔覺意吞咗少少牙膏﹐日日提佢唔好吞佢都會唔記得慣咗手勢咁照吞。差唔多要每一秒都提住佢「唔好吞牙膏呀下﹗」先得。護士話嗰支fluoride有D車厘子味添﹐細路o答o答下就好易吞咗都唔知﹗所以諗諗下都係唔比口水禧。