衰開有條路

記唔記得好多年前有個富豪喺自己架遊艇燒炭﹐之後塊面又爆咗成粒兵乓波咁大嘅瘡﹖救命呀﹗我塊面都爆咗粒大瘡呀﹐左邊面腫咗一舊野出嚟﹐如果用手「鏈」落去係會鏈到舊五蚊咁大舊嘅肉喺面皮裡面。就咁睇舊野就有青口殼咁大﹐成舊嘅野凸咗出嚟咁囉。所以我今日按奈不住內心嘅驚恐走咗去睇醫生﹐因為真係驚過多兩日塊面真係變咗個富豪咁就大獲喇﹗我唔想塊面成個蠟筆小新咁呀﹗

醫生話係粒好巨型嘅囊腫(cyst)﹐重未陷濃﹐食消炎藥同用熱毛巾敷下應該過多幾日就會無事。不過人為近住牙較﹑又近淋巴﹐所以個醫生將我塊面搓圓噤扁咗好耐﹐猛篤嗰粒野篤咗幾次﹐痛到我吖﹗點解我會咁架﹖

尋晚發現粒巨瘡都好驚架喇﹐夜晚人人瞓晒我喺廁所刷牙﹐當我刷緊嘅時候﹐我懶係野咪埋眼刷﹐到啷口嗰陣先開眼﹐一望到塊鏡突然嚇咗一跳﹐以為自己見鬼呀﹗嗰個係我自己嚟架﹐有無人真係會喺廁所比自己嚇親架﹐我囉﹗幾乎大叫咗出嚟﹐因為我當時伸咗條脷出嚟諗住刷埋條脷﹐咁個頭耷得低咗﹐兩隻眼又反晒眼向上望﹐對黑眼圈黑到自己都認唔出﹐就係咁﹐我一擘大眼嗰一秒見到鏡中嘅倒影﹐以為見到鬼﹐嚇到牙刷都想掉咁濟﹗定咗神先記得嗰個係自己。唔係誇張呀﹐係真架﹗(其實係一件慘事嚟架﹗唔好笑喇﹗)

都未黑完呀﹗自己嚇完自己都未驚完﹐洗好副眼鏡諗住抹返乾﹐點知抹抹下﹐啪一聲﹐哎呀﹗啪斷咗副眼鏡呀﹗﹗﹗﹗﹗重要係喺中間鼻樑位斷開兩邊呀﹗

點解乜都要喺我塊面﹐我個頭嗰個位置發生嘅﹖爆瘡+自嚇+斷眼鏡﹐無野吖嘛我﹖