口水禧平日對得最多嘅應該就係佢嘅母親大人我﹐好多時佢都好鍾意學我講野嘅語氣﹑小動作等等。連我鬧佢嗰陣嘅衰樣都學埋﹐重要間唔中唔覺意表露比我睇﹐真係除咗同佢講句多謝之外﹐唯有就係恭喜自己囉﹐有個咁鍾意扮自己嘅仔﹐重要扮得似模似樣嗰下先至哭笑不得吖嘛﹗
今日好晏先起身﹐三條友食咗pancake做早午餐﹐所以下午茶時間先再食野。我同口水禧食生果(有時我哋未必一定要食粉麵或飯當正餐﹐間唔中都會食下pancake﹑水果﹑多士﹑麵包﹑芝士加杯奶就一餐)﹐我同口水禧一人一個大蘋果﹐我食完都三點幾﹐催促佢快D食埋然後要刷牙瞓晏覺﹐如果佢唔瞓﹐我就肯定唔洗旨意可以專心包雲吞喇。三催四請﹐佢重食下玩下﹐催多兩催﹐條友仔企喺廚房門口﹐一隻手撐住門眶﹐對腳就XO腳咁企﹐串串貢look大對眼咁同我講﹕「你知唔知(D蘋果)好大舊架﹖」一路講重要一隻手伸出嚟好似問人攞錢咁嘅姿勢攤大手板咁﹐正正係我平時話佢嗰陣個樣同語氣﹐我笑到眼淚都標埋先扮到比佢老豆睇﹗
家下D細路真係串﹐模仿能力咁高﹐唔怪之得咁多細路走咗去做童星喇﹗
夜晚飯後﹐和哋兩件又嚟顛埋一堆﹐玩玩下佢重要突然放毒氣偷襲我﹐事先聲明﹐呢樣唔係學我呀下﹐我無呢個癖好架﹗
