窗簾嗰個mission﹐我投降喇﹗
正式成為MISSION IMPOSSIBLE!!!
無謂嘥時間嘥精神﹐攞出去比人車喇。如果唔係﹐唔知廿年後我個飯廳係咪都係無窗簾架呢﹖抑或係我哋三個到時已經夠晒資格移民去非洲﹗
留意﹐話攞出去比人車呢個唔係我嘅提議﹐係禧爸已經頂唔順﹐叫我放棄。
唔好以為我跟住就可以游手好閑喺屋企挫指甲無野做﹐我要做嘅野多如恆星﹐做到我下幾世都做唔完。題外話﹐最近走去驗身﹐因為比禧爸嚇得多話我成日食飯飲甜野﹐因住糖尿病。佢自己驗咗膽固醇「擇」界就嚇鬼埋我﹐搞到我都有D驚驚哋﹐加上人到中年﹐呢個年紀都真係要注意下有無D唔妥﹐話晒口水禧咁細個﹐我都想自己長命D可以睇到佢第時娶個乜樣嘅老婆返嚟架嘛﹐於是提起無比勇氣同醫生講我想抽血驗下(都真係好大勇氣先夠膽做架﹐呢度無人唔知我最驚打針架喇
)。哈哈﹗托賴﹐算係咁。有人妒忌都嚟唔切……
不過都真係要開始保養下自己﹐如果唔係﹐容乜易未夠40就成個60咁嘅樣架﹗上次有個朋友嚟我度睇我張全家幅﹐竟然問咗句﹕「E~~呢個係你老公個家姐呀﹖」
唔係呀嘛﹐有無咁大獲呀我﹗
(大姑拉﹐我唔係話似你會大獲﹐係話我竟然比人話我喺禧爸個家姐而唔係細妹嗰下大獲﹐唔好誤會呀﹗
)
至於我另外一樣mission係咩呢﹖
鋤地﹑擔泥﹑種野。樣樣都體力勞動﹐擔擔抬抬﹐點會有膽固醇吖﹗呢度係side yard嘅一部份﹐以前係一堆亂草。比人清除咗之後我就決定要喺呢度種返D野﹐等口水禧喺房望出窗都叫做有D野睇下﹐好過望到一堆泥咁寡喇。加上呢度係D衰racoon出入嘅地方﹐嚟親無好野﹐唔係食晒我棵盤桃樹嘅所有盤桃(係一晚之下食晒十幾二十個呀﹐整佢個制﹗我淋水﹐我施肥﹐佢哋食﹗真係無家教呀﹗
)﹐食完重要當我呢度係公廁﹐爬六尺高嘅圍欄專登嚟爆石﹐一家大細嚟爆﹐爆完再爬返個圍欄走人﹐我真係好想睇下邊度有得買真嘅地雷用嚟爆瓜佢哋﹗
(我同禧爸成日幻想如果有一日比我哋喺度買到沙炮﹑砲仗﹐吼準班PK嚟爆石嗰陣就掉出去﹐重唔嚇到佢哋縮返晒D臭臭入去再便秘幾日﹗
)我本來都唔係咁黑心﹐話晒都好愛護動物﹐但係呢班野真係太衰喇﹐周圍咁多山頭野領唔去疴﹐係都要嚟我屋企疴﹐我除咗未比錢揾人嚟捉走佢哋之外﹐咩方法都試過﹐但係都一樣嚇唔到佢哋﹐搞到我成日要同佢哋剷屎﹐口水禧出去backyard玩嗰陣我都唔知幾驚佢亂咁執野會執咗D屎嚟玩﹐racoon嘅屎係可以令到小朋友嘅腦收工架﹐你話我係咪好想爆瓜佢哋吖﹗所以諗下可唔可以喺呢個公廁嘅出入口度種幾棵大玫瑰﹐等佢哋生到人咁高嗰陣﹐睇下班友重嚟唔嚟﹐如果佢哋冒住比D玫瑰刺插到周身血都要入嚟疴嘅話﹐好﹗我同佢哋剷屎又點話﹗
(咁都要嚟疴﹐我重有咩好講吖﹗
)
除咗玫瑰﹐我重有D樹苗仔都要揾地方種落地﹐但係都唔係話鍾意種邊就種邊﹐都要睇下個位置有無陽光曬到﹐近唔近間屋(樹根太勁嘅唔可以咁近間屋﹐如果唔係D樹根生得長嘅時候就會隊我間屋企個地基﹐炒起我屋入面嘅地板)﹐重有棵樹第時生高咗之後會唔會擋住其他植物生長。於是經過考慮之後﹐決定喺呢個位置落手掘窿﹐就係用個窿隔離個剷掘﹐就咁剷重要剷唔入D泥﹐要用隻腳踩住個剷先插到個剷入D泥度掘﹐都咪話唔man呀我﹗掘下剷下就掘咗個窿出嚟﹗(我一路掘重諗下會唔會掘到D金條呀﹑鑽石呀咁就發大達喇﹗
)
放咗棵野落去就大功告成﹗生唔生得就睇佢自己造化喇下﹗
每當口水禧有得出去backyard玩嘅時候都會好似相入面咁樣﹐頭也不回直颷出去。唔講人哋重以為我一年都係將佢養喺籠入面﹗
無辦法喇﹐都要我有時間先可以同佢一齊出嚟玩下﹐跑下跳下。佢一個人又唔敢自己出嚟(暫時)﹐就算敢﹐我都唔敢比佢自己喺出面玩喇。
逃犯公然挑釁﹕嚟捉我吖笨﹗
睇你個身型都捉我唔到架喇﹐肥婆﹗
揸住武器對質
早排種咗落地嘅玫瑰已經適應咗呢個位置﹐開始出花。寄望呢四大天王幫下手﹐快高長大﹐有咁高生咁高﹐有咁密生咁密﹐有咁多刺同我生咁多刺﹐如果D racoon重嚟爆石嘅話﹐同我桔到佢哋生痔瘡﹗
比心機﹐快高長大﹐我一定會比多D肥料你哋谷肥你嘅﹗花多唔多都唔緊要﹐至緊要係D刺夠多夠密夠尖就得喇﹗我洗唔洗再剷屎就靠晒你哋喇﹗
口水禧﹕咁如果我喺呢邊走佬嘅話﹐會唔會比D玫瑰桔爆羅友架呢﹖
都係揾單車代步逃獄喇。點知說時遲那時快﹐灑水器夠鐘淋草……逃犯即時變咗sexy嘅濕身透視裝逃犯﹗
最後﹐犯人自己行返入屋﹐唔再走佬喇。
