重有咩好講﹖

上一篇blog我估都估唔到會有咁多blog友回應﹐安慰﹑賜教﹑分享個人經歷等等﹐除咗講句多謝﹐我都要恭喜蛋散口水禧呢個moh look﹐就憑佢個「冬菰頭」就令到各路人馬喺度贈幾句關心下佢同佢呀媽我﹐無野好講喇我﹐飲杯﹗(已經有D high high哋顛咗﹗)

我會努力﹐如果唔係﹐我會比好多人追九條街嚟柄。

好衷心嘅一句 – 多謝﹗(不過怕且D街數又要拖一拖……)

呢期嘅口水禧可謂多咗好多興趣﹐除咗玩車﹑玩唔玩得嘅野﹑玩佢呀媽之外﹐重鍾意咗畫油彩。要求買一份畫具過佢扮畢加索﹐於是走咗去walmart買咗D畫筆同顏料過佢畫個夠。其實都有預埋佢會畫D牆﹐佢老豆就可能未有呢個心理準備﹐因為佢少同口水禧返學﹐我就見慣學校D同學乜鬼都畫﹐自己塊面﹑人哋塊面﹑衫褲鞋襪﹑地下﹑檯凳等等﹐乜鬼都畫。所以我一早就練咗「隻眼開隻眼閉﹐你睇我唔到﹐我又睇你唔到」神功﹐百毒不侵﹐百無禁忌﹐加上D顏料係可以洗得嘅(個包裝係咁寫喇)﹐所以即使口水禧真係喺幅牆加咗料嘅話﹐盡抹囉﹐水抹唔甩咪一係補油或者直頭話之佢囉。有細路嘅屋係咁架喇(禧婆婆已經同我洗咗幾年腦﹗)。

我已經連屎都唔怕佢玩咯(只限佢嘅私伙咋)﹐重有乜野會難到我吖﹗

如果有小朋友唔願返屋企嘅﹐用玩嘅野引佢哋返屋企應該幾有效。口水禧買完野就猛催住我哋快D返屋企﹐梗係喇﹐佢已經想拆出嚟玩好耐﹐好心急想快D到屋企就可以開壇鬼畫符吖嘛﹗

睇下佢嘅眼神……視線完全無離開過張畫紙。呢張相係我瞓喺地下影嘅﹐個呀媽成大件攤咗喺地下﹐佢眼尾望都無望過下個呀媽做咩會喺地下﹐呢個情況睇嚟﹐我瞓喺嗰度幾粒鐘應該可以發埋夢都無人叫醒我嘅。

兩個幾銀錢一份嘅顏料﹐轉眼就比佢挖晒。睇嚟要買成加倫嗰隻size嘅顏料先夠佢用。因為佢唔止畫喺張紙﹐佢連張檯……

甚至係地下﹐都會畫嘅。

呢幅大作叫做「樹」。同佢老豆個頭一樣﹐係無乜葉嘅。夠晒清爽﹗

未來嘅大畫家 – 口水禧 (專畫老豆個頭)

最近請咗保鑣﹐驚racoon嚟偷食同非法爆石吖嘛。

禧爸對上一次著西裝已經係07年嘅事。以前喺香港做野嘅時候日日都要著西裝﹐嚟咗呢度之後﹐莫講話西裝﹐連恤衫扯布褲都無乜著過﹐所以連點打呔都唔記得咗。過咗去嘅週末有同事結婚﹐禧爸前一晚先嚟揾衫﹐初初諗住求鬼其是但著件恤衫加條好舊嘅扯布褲就算﹐比我band咗佢。大佬﹐人哋喺city嘅酒店度擺酒呀﹐唔該揾返套老西出嚟喇﹗好彩條褲都重著得落﹐但係恤衫衫領就扣唔到鈕。霎時間去邊樹變件恤衫過佢﹐唯有叫佢唔好打呔囉﹐橫掂佢都唔記得點打。