上回講到我屋企嘅大丈夫﹐綽號「 一言九頂」(綽號啫﹐唔係變咗日本人
)呢排駁嘴已經去到乜都頂嘅level﹐除咗駁嘴之外﹐重愛上咗周街搞破壞。點破法﹖見野就掉落地﹐玩具周圍掉﹐係掉唔係放喎﹗我屋企嘅地下長期好似宇宙大爆炸後嘅場面咁周地磒石流星雨咁﹐一地都係一舊二舊一粒二粒嘅玩具﹗好哋哋一張拍好咗嘅凳﹐呀「一言九頂」大師會無喇喇一腳伸張凳等佢瞓低﹐咁呀大師就會面向天咁大笑﹗整完一張再一張﹐所以話我屋企有宇宙大爆炸一D都唔誇﹐因為D凳跌落地下bang bang聲嘅巨響已經可以令人耳鳴咁濟﹗我都唔知呢條怒火青年係咪想練下點樣掉呀媽落地﹐所以先揾幾張凳嚟練下先﹗
我已經去到就嚟我要大爆炸嘅境界喇﹐希望本野快D嚟打救我﹐亦都等我盡快打救「一言九頂」(想打救佢好耐
)﹐如果唔係﹐再係咁落去﹐盞兩母子都變晒sashimi﹐你片我我片你﹐刀光劍影﹐兩敗俱傷﹗
雖則我都好明白細路進化嘅時候係會咁架喇﹐但係都比下面唔好咁過份吖﹐我屋企嘅檯張張都有窿有花紋﹐全部都係條友仔攞D玩具車嚟鑿嘅﹔地下有地下嘅傷痕﹐係大丈夫掉野落地嗰陣撞凹嘅﹔牆上面嘅就更加唔洗講喇﹐花嘅爛嘅乜都有﹐係佢得閑無事用拖鞋練神功一腳踢嘅﹔或者係以風速嚟推玩車手推車嗰陣片嘅……唔緊要﹐禧婆婆已經將我個腦洗得七七八八﹐我知﹐有細路嘅屋係預咗要爛吖嘛﹗OK﹐無問題﹐但係特登掉野落地之後走咗去要我彎我條痛到呀媽都唔認得嘅腰去同佢執就想噤住我唔發火都好難喇﹗
得一對手都唔知做得幾多樣野﹐呢樣未做完佢又整第二壇我嘆﹐唔鬧佢﹖除非我o亞咗喇﹗
鬧得多又唔係特別幫到咩忙﹐重連聲都沙埋﹐真係蝕上加蝕﹗前日叫佢試下自己著外套﹐教嗰陣佢就望第二度﹐到佢著嗰陣就猛話難﹐唔識呀﹐繼而梗係駁嘴喇﹐真係幾乎連唔應該鬧嘅都鬧出口咁濟﹗若然唔係我個仔﹐我晨早就兜咗佢出街﹗柄咗成粒鐘﹐終於自己著到﹐但我個喉嚨都爛咁濟。話佢知媽媽係想佢第時返學如果想著外套都可以自己搞掂﹐唔洗冷親。佢話﹕「咁咪唔出去囉﹗唔出去咪唔洗著外套囉﹗」換著我以前D脾氣﹐應該已經比我鬧爆咗或者打腫咗個嘴九年喇﹗咁都得嘅﹖唔出去就唔洗學著外套﹖﹖﹖﹖有無再搞笑D呀大佬﹗唉﹗算﹐著到一件都好過無﹐放佢出廳玩。下晝洗車嗰陣﹐我都抹完晒﹐吸埋塵﹐諗住用埋玻璃水抹令D窗就可以收工煮飯﹐點知……唉﹗條友仔開住個水喉向架車嘅「內壟」fare水﹗凳﹐濕晒﹗car seat﹐濕晒﹗地﹐濕晒﹗外殼﹐濕晒﹗X100000!!!!!!抹咗兩粒鐘嘅車呀我﹐真係好想大聲鬧佢鬧到ET喺太空都聽到咁濟呀﹗﹗﹗﹗
明唔明呀﹐嗰一刻嘅火係以光速嚟颷升﹐簡直係頭幾秒呆咗唔知點反應好﹗但係即使鬧到佢顛又點﹐佢都係以一貫嘅無辜樣﹐兩隻眼霎下霎下咁望住你﹐大巴星又唔得﹐對住佢喊呀﹖咁我咪以後無位企﹗唯有快手抹返乾淨囉﹐我D血壓就係咁樣每日升升跌跌幾百次﹐血氣都咪話唔方剛﹗
重有﹐無喇喇執咗花盆入面一粒花肥嚟食話想試下係唔係飯喎﹐天呀﹗我係咪上一世推呀婆落海﹑非禮隻豬﹐無惡不作嘅大魔頭﹐家下揾個大師級人馬嚟同我「開皮」呢﹖我覺得我D皮已經都開晒架喇﹐放過我喇﹐好嘛﹗
無辦法喇﹐成日鬧都唔可以幫到忙﹐唯有帶佢出街去消耗佢嘅能量﹐轉移大家嘅視線﹐減少磨擦﹐咁大家都長命D﹐心情都好D。於是今日下晝同佢去行下水塘﹐等佢發洩下喇。真係一放就雞咁腳閃咗去﹐頭也不回係咁向前行﹐去喇去喇﹐我唔阻你﹐你發洩你想發洩嘅野﹐我都要抖下。日日咁谷氣都唔掂﹐一陣爆咗血管變長抖就慘喇﹗
佢係完全唔驚我哋兩個會掉頭走咗去架﹐自己係咁向前行﹐走上山坡又走返落嚟。佢話自己係巴斯光年﹐心口有個制﹐一噤就會彈對翼出嚟飛上天﹐猛咁對住個水塘講To Infinity and beyond!
(C低能﹗)人哋行過重以為有咁細個嘅顛佬﹗
但係未行到一半就話叫我抱佢﹐咁o岩朋友叔叔打嚟約我哋去睇花﹐咁就喺40分鐘之內就離開咗個水塘喇﹐原先重諗住比禧爸行下減下肥燒下脂添﹗嘥料﹗
去到人哋屋企先發現睇花嗰度閂咗門﹐咁咪唯有喺叔叔屋企玩咗幾粒鐘然後先大伙兒一齊去食晚飯囉。有人見Winnie跳咗入個噴水池﹐佢問都唔問媽媽有無同佢帶衫嚟﹐一野就跟埋Winnie 去you jump I jump﹗好彩我真係有帶衫啫﹐唔係嘅話﹐我諗佢都要赤裸咁去食飯咯﹗
玩咗一輪水﹐結果要去姐姐個廁所沖涼換返乾淨嘅衫。但係佢之前嘅忘我﹐連鞋襪都未除就跳咗落水﹐我又無帶乾淨襪同鞋嚟(邊有諗過佢會咁激架﹗)去食飯嘅時候唯有抱住佢入餐廳囉﹐咁大家明我條腰點解會痛喇﹗
唉﹗都係嗰句喇﹕屋企有小朋友係咁架喇﹗
