喘氣

呢幾日超大風﹐重要city嘅人喺我哋後面條去水道嘅兩邊係咁鋸樹﹐通常有鼻敏感嘅人一有人鋸樹就會賴野架喇。鋸樹嘅木碎夾雜埋塵﹐隨住風吹周街飛﹐嗰D鋸樹師傅重要一路鋸一路用架剷泥車喺條下水道裡面剷D鋸咗落去嘅段枝﹐一剷又係塵土飛揚嗰隻﹐於是我估就係咁樣﹐口水禧就中咗招喇。

其實尋日已經帶咗佢去睇醫生﹐但係夜晚聞咗氣都重係條氣唔順﹐瞓喺佢隔離好似有隻雀喺度唱歌咁「hehe huhu」﹐臨瞓前我問咗隻雀幾次要唔要飲水﹐佢係都話唔飲。點知我差唔多瞓著嘅時候﹐佢突然叫我攞水比佢飲。真係好眼瞓呀﹐嗰陣應該已經四點﹐唉﹗都要起身去斟水比佢飲喇。飲完水﹐又就快差唔多瞓著嘅時候﹐大爺又話未搽潤唇膏﹐又要飛落床去攞﹐唔攞我邊有得繼續安靜中瞓吖﹗搽完潤唇膏﹐我又差唔多瞓著嘅時候﹐隻雀就開始越唱越大聲﹐頂唔順呀﹐再落床去攞藥比佢聞。聞完都唔見好轉﹐但係總算叫做瞓返著﹐嗰陣已經天光咁濟﹐我對眼皮亦都再開唔到要合埋。

朦朦朧朧起下身睇下口水禧有無踢被﹐自己又瞓又醒之間﹐突然有個男子棟喺我床邊﹐真係嚇Q死我咁濟﹐原來係禧爸﹐佢想話口水禧D 歌聲嘈醒咗佢﹐問我洗唔洗再比藥佢聞。其實頭先我上床瞓嘅時候何嘗唔係比佢兩仔爺煎熬我吖﹐一個鼻鼾﹐一個HE-HU﹐仿似置身喺動物園一樣﹗+++++何其壯觀呀﹗

由於比咗藥佢聞無幾耐﹐我唔敢再比佢聞喇﹐諗住唔知係咪支藥無乜剩要換﹐所以唔乜效力。好彩尋日去醫生度攞咗醫生紙﹐如果唔係D藥房話之你HE-HU到爆肺都好喇﹐係一定唔見醫生紙唔比藥你嘅。喺禧爸嚇完無幾耐﹐我又差唔多瞓著﹐雀仔哥就起咗身喇。假日朝早嘅七點四十分呀﹐有無再攞命D呀﹗真係眼瞓到唔識形容﹐禧爸幫我頂咗一陣﹐不過都係要入嚟同我講話要去買藥﹐因為口水禧唔掂﹐越唱越大聲﹐拿拿林起身﹐比咗野佢食再比藥佢食同聞。一個鐘後都係無乜效﹐所以打比醫生。但係今日係星期六﹐邊有醫生吖﹗原來嗰個醫生同其他醫生係有個網絡嘅喎﹐即係如果我哋睇開個醫生放假或者半夜小朋友有時﹐個網絡係可以安排到其他兒科standby隨時做野嘅。

姑娘聽見我話我個仔聞咗藥都係唱晒歌咁﹐於是叫我哋下晝三點去醫院診所見醫生。即刻個心都定D。

都估到佢去到醫生度又要做幪面超人架喇﹐上次喺香港都試過SEI-MA-LU-SHAKA……上次喺香港醫生個診所度﹐合我﹑禧婆婆同禧公公三個人嘅力都搞唔掂奮力掙扎嘅口水禧﹐都唔知佢咁大反應做乜﹗好彩今次佢無乜反抗﹐可能喺屋企都有聞過藥﹐所以對佢嚟講﹐呢個只係個勁D嘅藥啫。

聞完藥﹐醫生再嚟聽佢呼吸﹐話條氣管鬆咗﹐無事喇。叫我哋返屋企繼續比佢隔四個鐘聞一次。醫生話可能係細菌感染(經已連學都無返喇﹐街又無點出過﹐都唔知點感染返嚟﹗)﹐又可能係敏感﹐又話睇到耳仔有感染﹐我心諗「唔係呀嘩﹐尋日先見完醫生咋喎﹐醫生檢查咗都無話耳仔有野嘅﹖﹖﹖」真係R爆我個頭﹗嗰個醫生重話我比開口水禧食嘅藥勁得制﹐佢唔鼓勵﹐之但係唔食嗰隻藥﹐口水禧連瞓都瞓唔好﹐鼻塞到爆﹐咁樣唔掂喎﹗有時呢個醫生咁講嗰個又唔係咁講。口水禧睇開嘅兒科重叫我一日比三次佢食﹐另加鼻敏感藥同聞嘅藥添。

其實聽過好多媽媽講都係鍾意聽老D嘅兒科醫生嘅建議﹐覺得佢哋經驗多。我就無乜所謂﹐邊個方法可以解決問題嘅就用邊個囉。最起碼比佢瞓好D﹐瞓得好精神好就會食得好﹐食得好自然身體好喇﹐係咪先﹖

聞完氣條氣順返晒﹐重有氣吹風車添﹗好彩醫生話檢查咗佢身體入面嘅氧氣成份好好﹐我諗即係就算喘氣喘到唱歌咁樣﹐佢都呼吸到啩﹖﹖﹖﹖初初重覺得佢心跳加速﹐嚇得我吖﹗不過醫生話如果今晚再係咁喘氣﹐每分鐘多呼吸多過四十下嘅話﹐聽日就要去聞多次氣喇。大佬﹐咪玩野﹐比我瞓一晚好覺﹐好嗎﹖

條氣順晒﹐兩老謝晒﹐頂唔順去咗食晚飯。五點幾就去開飯喇﹐因為想早D返屋企吸塵。係呀﹐我係有D變態呀﹐一日到黑呢度吸嗰度吸﹐禧爸話我係病態潔癖狂﹗唔係咁可以點呀﹖又想夜晚大合唱咩﹗

口水禧令我諗起以前有個麥記廣告﹐有個小朋友自己order野食好自豪。所以我都比口水禧試下﹐得咗。