你無睇錯﹐係口水禧生咗啫﹐唔係佢呀媽﹗
家陣瘡就有得我生﹐其他野就無喇。
有日﹐當我喺廁所刷緊牙嘅時候﹐突然聽到口水禧喺廳度鬼咁大聲嗌話﹕「媽媽﹗我生咗兩個老婆呀﹗」幾乎笑到吞咗牙膏﹗本來都無咁好笑﹐見埋佢包住兩個老婆走嚟廁所門口比我睇﹐簡直係頂佢唔順呀﹗再問佢仔定女呀﹖好彩佢都知老婆係女﹐重話兩個老婆有三十磅添﹗就係咁﹐我就喺三十有四嘅年紀做咗「嫲嫲」兼「奶奶」喇﹗嗰兩個「孫女」兼「新抱」重要係我個仔生出嚟嘅添﹗如果唔知口水禧D「老婆」係乜野嘅人聽咗我哋嘅對話﹐可能會以為我哋成家的有問題﹐顛顛哋﹐係嗎﹖
口水禧出世重喺醫院嘅時候﹐護士已經未得我同意就塞咗個奶嘴比佢嘆﹐自嗰日起﹐口水禧瞓覺同食奶都要用嗰個奶嘴。當時我哋叫嗰個奶嘴咗口水禧個girl friend﹐梗係喇﹐除時飛甩佢架嘛﹐所以個銜頭就淨係girl friend囉。
除咗girl friend之外﹐口水禧重有個攬枕﹐其實係幾個先o岩。不過佢只係對其中一個情有獨鍾﹐其他嗰堆妾侍都只係愛嚟當圍欄咁圍住佢嚟放架啫。我都唔知點解佢對嗰個枕頭咁o答糖﹐瞓親覺就要攬。即使無咗girl friend都好﹐攬枕係不能無嘅﹐所以我哋好耐之前就叫嗰個攬枕做老婆。梗係喇﹐老婆喎﹐瞓覺梗係攬老婆喇喂﹐重要係大婆添﹗
唔好以為可以揾第二個攬枕代替佢﹐就算黑到伸手不見五指都好喇﹐佢齋摸就可以分辨到邊個係大婆﹐你哋話勒﹐girl friend可以轉到唔知邊個打邊個﹐但係老婆呢就摸下即知真偽﹗
有D小朋友係唔比人洗佢哋平時愛嚟瞓覺過癮(過手癮﹑過口癮﹑過味癮……)嘅寶物﹐因為通常嗰件野都會充滿小朋友嘅味道﹐聞住摸住嚟瞓特別好瞓D。口水禧半夜都會咪埋眼兩隻手周圍揾老婆﹐揾到之後就會將老婆頭頂嘅花邊塞入口去「妹」﹗「妹下妹下」又瞓返。有時唔係「妹」嘅話呢﹐就會用手指摸摸下又「了了下」D花邊﹐細個飲奶﹐大個睇電視都會間唔中過下手癮﹐好彩佢都比我每個禮拜同佢D老婆洗下衫。
我好似口水禧咁大嘅時候都有個攬枕。不過一次去咗禧婆婆嘅朋友屋企瞓完漏低咗之後﹐個阿姨竟然掉咗我個攬枕。於是我自製咗個私伙野﹐就係揾個枕頭袋嚟代替個攬枕。個枕頭袋角比我玩殘晒因為我係用佢嚟瞓覺嗰陣捽下巴嘅﹐成日都捽到甩晒皮﹗有時會塞入口添﹐所以個角係黑猛猛兼有我D口水味。
由於我唔想禧婆婆洗咗D味﹐我成日起咗身之後將個枕頭套收埋喺針頭底﹐驚禧婆婆趁我返咗學會攞咗去洗﹐不過當然喇﹐呀媽要洗野點會話揾唔到架﹗次次曬咗太陽之後嗰晚真係瞓得差D﹐因為無晒D味﹗要幾日先可以復元架﹗如果禧婆婆換咗我個枕頭袋﹐我就再整多個。總之好過攬枕﹐因為我唔識整攬枕﹐但係整爛個枕頭袋角就話都無咁易喇﹗
禧公公同禧婆婆成日都話﹕「我睇下你第時嫁咗人係咪都重攞住你個臭枕頭袋嚟瞓覺﹗」
我話你知﹕係﹗
點止嫁咗都用呀﹐嚟美國嗰陣帶埋嚟添呀﹗
我有諗過如果海關搜行李搜到出嚟問我係咩﹐我咪答佢﹕「呢個係我嘅老公囉﹗隔離嗰件(禧爸)係二公﹗吹咩﹖」
自從口水禧出咗世﹐個枕頭袋已經比我收埋咗喇﹗無錯﹐重喺世上﹐不過已經退咗役喇﹗比我勞役到穿晒窿咁慘﹐比佢休息下喇﹗
另外一個唔洗再用佢嘅原因……咪就係家下都比口水禧勞役到嘔晒白泡咁濟﹐唔洗枕頭袋﹐企喺度都瞓得著喇﹗
