話說口水禧喺呢度除咗最近相識嘅呔仔同細佬﹑去咗東岸嘅北極熊三個小朋友之外﹐佢係未接觸過比佢年紀細嘅人類﹗所以佢係完全無任何概念細過佢嘅細路即係乜野嚟呢﹖直至見過北極熊之後﹐叫做有D知知哋呢個世界重有人係細過佢嘅﹐不過佢都唔係好睬D小小朋友。試過喺香港嘅時候﹐喺街有D細過佢嘅小朋友飛撲埋嚟一個大熊抱攬住口水禧﹐佢係成個呆咗﹐傻笑﹐唔敢郁﹐好似比人點咗穴咁。當然人哋一鬆開手諗住同佢揮下手打咗招呼嘅時候﹐口水禧已經閃得無影無蹤﹐好似人哋有傳染病咁。
一直以嚟﹐我都覺得口水禧係唔鍾意同其他小朋友玩﹐可能係佢日日都係同我哋大人一齊﹐所以佢試過同我講佢唔鍾意小朋友﹐鍾意大人。我估除咗因為見得少之外﹐重有就係佢怕人嘈﹐怕人動作大同埋太熱情。睇下Clara攻嚟攻去都攻唔入口水禧嘅心就知。
令我感到意外嘅係佢竟然又鍾意同呔仔同埋細佬玩喎﹐呢個我真係估佢唔到點解。呔仔同細佬係口水禧到目前為止我見過佢會主動去同人玩﹐跟住人哋走嚟走去嘅唯一兩個小朋友。而且重係唔洗好多時間熱身就可以埋欄﹐無語言嘅情況之下都可以一齊玩嘅小朋友。兼且重會人哋返屋企之後﹐口水禧重會日提夜提嘅小朋友。我估係因為呔仔好蝦﹐手上面玩緊嘅玩具比口水禧懶醒搶咗去扮晒話教人玩其實係搶咗去玩﹐但呔仔一D都無還拖無反抗﹐自己走去攞過第二件玩具玩咁隨和有關﹗正所謂同個肯比自己蝦嘅玩好過同個自己比佢蝦嘅人玩過癮D喇﹐係咪﹖
今次最後一個嘅summer camp係比D第一次返學嘅小朋友報讀﹐口水禧當然都有去。但係班入面大多數嘅同學仔都係得兩歲幾﹐比口水禧細成年咁多﹐情緒同動作都未控制得好好嗰種。口水禧企喺佢哋當中成個大舊衰咁﹐所以佢都唔係好鍾意返呢個summer camp﹐因為小朋友年紀太細﹐老師無咗個circle time﹐口水禧無得唱歌跳舞之餘﹐呢D小朋友嘅年紀正值係唔同人溝通嘅年紀﹐所以想揾個人嚟傾下計都無。除咗一個就嚟夠三歲嘅韓國女同學之外﹐其他小朋友係唔多同人講野嘅﹐除咗爭玩具打交嗰陣先叫做有D交流咁。
今日﹐喺我偷拍口水禧玩煮飯仔嘅時候﹐無意中竟然意外多個收獲﹐就係影到佢同一個細過佢嘅小朋友有交流喇……不過唔洗開心住﹐個交流係口水禧話個細路玩開燈閂燈阻住佢整pancake﹐笑爆我個嘴咁濟﹗重無意中發現口水禧識用英文叫個細路停玩個燈制添﹗不過好彩﹐口水禧暫時都係動口不動手嘅小朋友﹐個細路無理佢繼續玩個燈制﹐口水禧都無話即刻立野打人或者鬧人﹐都算係咁喇﹗
