開放日

今日係口水禧學校嘅開放日﹐每個班級都有特定時間比D學生同家長嚟學校參觀下﹐見下D同學同埋班主任。我諗係比D小朋友嚟探下個場﹐熟習下環境﹐等佢哋開學嗰陣唔好一下子接受唔到咁大嘅轉變而失控爆喊啩。

對於口水禧嚟講﹐學校已經一D都唔陌生﹐六月到而家大大話話都返咗幾廿堂summer camp﹐學校大部份嘅地方都有佢留低嘅腳毛﹐所以佢一去到學校就好自然咁衝埋去一個喺地下玩緊玩具嘅同學度﹐一手老笠咗人哋玩緊嘅玩具。(「火羅」﹗)嗰個同學O晒嘴﹐睇住面前個大舊衰搶咗自己手上面件玩具無聲出﹐老師見到即刻出手將個玩具比返嗰個同學﹐我同禧爸企喺側邊真係有D尷尬﹐個仔幾無家教﹗曾幾何時﹐口水禧比人搶玩具後嘅反應就好似嗰個同學仔咁O嘴但唔反抗﹐我諗都無諗過家下係佢去搶人哋個玩具咁技安嘅﹗真係要時時提醒佢千其唔好再係咁﹐唔係嘅話﹐真係無朋友架喇佢﹗

雖然口水禧好熟個場﹐不過之前比我哋話咗佢一輪搶人玩具﹐佢好似有D條氣唔順定係未瞓醒﹐喺學校個backyard行嚟行去﹐唔肯去同D同學玩。我哋呢D跟班咪唯有跟住佢四圍騰囉﹐一陣又攞野淋水﹐成個呀佰朝早瞓醒耍完太極之後就做下園藝咁。當然喇﹐都係亂咁淋咁囉。

之後話要打千鞦﹐o拿﹗望下禧爸個反應係見到D千鞦上面濕濕哋有霧水﹐佢就叫口水禧唔好打﹐下次先打咁。口水禧梗係唔肯過你喇﹐打千鞦係口水禧嘅「飛佛」嚟架﹐叫佢唔好打喎﹐佢賴C都唔肯行開喇﹗

喺呢個時候﹐平時訓練有數嘅呀四就即刻幫老細抹好個千鞦喇梗係﹐唔想撈咩家陣﹗睇我呢D熟手技工咁款﹐就知我平時喺學校係比D少爺小姐點勞役架喇﹗手腳慢D都會比人話架﹐抹好一個重要快手抹埋另外一個喎﹐如果唔係﹐D小姐同少爺就會爭打千鞦變咗「小童群揪會」(嘩﹐呢個名相信80後係未聽過嘅)會員架喇﹗

抹好咗個千鞦之後﹐口水禧想開始打﹐奈何個男工人實在太懶﹐連扶個老細上千鞦都嫌費事﹐老細谷鬼氣自己嚟。

上到一半kick住咗唔上唔落﹐再次求救於偷懶男工人﹐呢下個工人先曉郁咋﹗

有無覺得口水禧有D似嗰D朝早起身去放狗開大細嘅狗主咁款﹖不過人哋放狗﹐佢放雞﹗

前一晚﹐佢又話瞓唔著﹐我叫佢快D瞓喇﹐第二日要去學校。佢話唔去﹐想起身玩唔瞓覺﹐我同佢講話﹕「唔得呀﹐D雞梳靚咗個頭同D腳毛等緊你架﹗」佢見D雞咁大陣將﹐為咗佢竟然梳頭梳腳毛﹐於是好合作地瞓返低繼續試下瞓唔瞓到。你話學校D雞喺佢心目中係幾咁有地位呢﹗今朝臨返學嗰陣﹐我又要同佢帶呢樣嗰樣﹐執緊嘅嘅時候﹐佢重要催我話﹕「快D喇﹐D雞等緊我架﹗」

迫完隻雞埋牆角﹐佢轉眼又跳咗入去沙池玩。佢唔肯除鞋﹐寧願D沙入晒鞋都唔除。

留意口水禧身後嘅媽媽係一路餵緊人奶一路影緊相﹐禧爸唔知係特登定扮野行埋去人哋身邊﹐搞到人哋本來已經好忙咁顧嘅幾瓣野都要伸隻手出嚟同佢握手﹐真係服咗我個老公﹗更加服咗個媽媽咁勵害﹗

玩咗一陣﹐呢云輪到口水禧比人搶玩具﹐但係今時又點同往日﹐口水禧唔會再眼白白睇住人哋嚟搶自己手上面玩嘅野都唔出聲或者反抗﹗我同禧爸企喺一邊睇下佢哋點收科﹐互相拉扯一輪﹐嗰個小朋友邊度夠口水禧大力吖﹐加上口水禧又省咗句”Please Stop”過個小朋友嘆﹐小朋友好無奈地停咗手。我相信喺呢一年裡面﹐口水禧講得最多嘅應該係Please Stop呢兩個英文字勒。

爭贏咗之後一臉得戚咁埋嚟話煲沙係比我食架喎﹗乜咁客氣呀﹐仔﹗

今日我哋係無遲到嘅。代價咪係烏眉恰睡咁款囉。尋晚早瞓﹐不過都係嗰隻喇﹐半夜醒幾次嗰種囉。其實我係咪已經進入咗老年嘅階段呢﹖早睡但唔會瞓好多個鐘就會醒一醒﹖

口水禧呢個姿勢似唔似有D土豪驅趕人群恐嚇人哋再唔走就潑C咁嘅樣呢﹖

媽媽個早晨樣實在好出呀﹗各位﹐我平時都係咁上下樣走出街嚇人架喇。嚟咗呢度咁耐﹐漸漸已經無咗想扮靚嘅心態﹐衫褲鞋秣頭+樣都係一瞓醒係點樣就點樣。我唔介意人哋話我似40歲或者以上﹐因為我自己都覺得似。其實有嗰個心情去扮﹐都無時間同條件去扮喇。你叫我而家著裙呀﹐我寧願唔出街﹗叫我化妝呀﹐我都寧願唔出街。如果唔係要出去﹐我連隱型眼鏡都唔想戴。唔係懶﹐係化埋妝嘅話已經太晏喇﹐直情唔出得街添喇﹗今日去mall同口水禧換過套衫嘅碼﹐行過H&M見到好多靚衫﹐望完心諗﹕「唉﹗而家無你份呀﹐算喇﹗」對於我嚟講﹐係無問題嘅。我本來就鍾意爛達達咁樣﹐以前返工﹐爛極都有個譜﹐家下話之佢喇﹐我係覺得爛先有型呀嘛﹗

唔講唔知﹐我大學嗰陣穿咗幾個耳窿﹐家下一個都無晒lu。因為以前要抱口水禧﹐佢個頭成日撞到我個耳環﹐我驚D針會刮損甚至吉到佢個頭殼﹐所以就無戴。無戴一輪想戴返嘅時候已經太遲lu﹐埋晒口無得戴。慳返。上次喺香港想穿返﹐諗諗下都係算喇﹐我咁驚打針﹐無謂又嚇到自己一額汗喇﹗唔係誇張﹐手錶都係今年先戴返咋﹐都係同一個理由喇﹐費事整到口水禧D嫩肉喇。(或者係我粗手粗腳﹐所以成日會刮到個仔囉﹗)