車+呔+禧BBQ兼出水芙蓉

如果見到怪字﹐狂refresh到出返正字為止喇。

見呔家出咗blog﹐咁即係我都寫得喇。之前正值佢哋屋企有D事﹐我諗都唔係好適合寫D同佢哋吃喝玩樂嘅野﹐所以等到家下先嚟寫。都係老規矩喇﹐無相呀﹐連去盜版偷相都懶得偷﹐問你怕未﹗想睇相﹐自己去禧家BBQ呔仔個blog度睇喇﹐禧婆婆﹗

家下兩家夾埋有五條仔(3仔+2佬)﹐我同呔媽變咗少數﹐簡直係陽盛陰衰呀﹗

第時D細路大咗之後﹐我哋就有三個壯男兩個老坑服侍我哋喇﹗

(妄想下啫﹐D仔大咗重識我哋D老野係老鼠咩﹗嗰兩個老坑就梗係跟埋D仔出去睇後生女喇﹗

)。第時D仔變晒聲嗰陣﹐幾把鵝公喉(加埋我喇梗係﹐我咁man﹐點少得我呀﹗)就真係壯觀囉﹗

我從來都無懷疑過呔家嚟我度係當去trip咁去嘅﹐我呢邊熱到可以落水玩﹐佢哋嗰邊就雪雪凍。所以我呢度都幾有resort feel架﹗嚟親呢度都可以著短袖短褲兼踢拖﹐家下重著埋泳褲添﹐就當係去咗東南亞一日遊囉﹗

嗰日呔家四口下晝塞完車嚟到﹐細佬o岩o岩瞓完覺有D呆呆哋。呔仔入到嚟經已有D熟架步﹐走咗去玩玩具。口水禧唔知點解好鍾意黐實呔仔嚟玩﹐不單止係咁﹐佢連晏覺都興奮到瞓唔著﹐知道呔仔就快嚟到嘅時候直情唔Q瞓﹐由房走咗出嚟﹐再比我夾返入去﹐不過當佢聽到呔家到咗之後﹐就攬埋個老婆即刻由房裡面飛出嚟迎賓。小朋友真係幾搞鬼架喎﹐知道有朋友仔嚟會開心到瞓唔著﹗

我諗呔仔都無諗過有個傻仔係咁期待自己架喎﹗

起初就喺屋企面玩玩喇﹐玩玩下正當禧爸諗住開個池仔比D細路落水玩嘅時候發現係無泵嘅(個池係問朋友借嚟用嘅)﹐於是襯住大家唔為意嘅時候溜咗出去附近Target買。好彩﹐最後都起到個池。口水禧呢個鄉下仔好似未見過水嘅就梗係第一時間飛咗落池玩喇。重立咗呔仔個水泡添。嗰個水泡係呔爸用口吹嚟諗住比呔仔用嘅﹐點知呀禧哥一個唔該都無嘅情況之下就攞咗去用勒。

起初呔哥都唔肯落水﹐咁我哋唯有揾野引誘下佢﹐比D波佢掉落個水池度玩下。最後熱咗身兼連埋老豆都落埋水嘅時候﹐呔仔終於都落搭肯濕身勒。細佬就點都唔肯落﹐喺池邊睇都有D面有難色想喊想喊咁樣﹐換唔同人抱都唔肯落水﹐隻手重要齒住我哋D衫﹐超驚我哋會出賣佢掉佢落水。

無計可施亦都無謂嚇到佢夜晚發噩夢兼將我同禧爸入落黑名單﹐唯有比返細佬入返屋入面玩算喇。淨返四個男子組喺出面慢慢玩飽佢。

呔媽要同班「仔」影相﹐屋入面得返我同細佬。開咗口水禧以前愛嚟送飯嘅baby einstein嚟消磨下時間﹐細佬真係好湊(我諗無濕疹嗰陣

)﹐完全唔怕得返自己一個同個金魚auntie喺間屋度。佢有佢睇電視玩玩具﹐金魚auntie喺佢側邊抽水抽油細佬都話之我﹐重間唔中同我笑下添。口水禧細個邊有咁厚待我呀﹐如果佢肯好似細佬咁坐定定﹐嗰套baby einstein就唔會喺我哋屋企出現喇。十隻DVD入面得一隻肯睇住嚟送飯﹐重要係快速餵嗰隻﹐一樽baby food未食晒就想落地玩﹐喺張high chair度跳晒扭腰舞﹐嗌到扯蝦咁制﹗通常都係咁架喇﹐個個呀媽都覺得隔離人哋個仔好湊D。

其實我哋呢度就算天氣熱到爆炸都好﹐水龍頭D水都好似凍水咁凍﹗所以出面玩水嗰幾件玩咗一陣都覺得凍凍哋﹐口水禧重要凍到口震添。於是呔仔先入嚟沖涼(因為有個鄉下佬好似未喺過自己個backyard玩咁樣C都唔肯入返嚟﹗)﹐呔爸呔仔搞掂咗之後﹐因為我趕住要整好D野食比已經喺出面燒緊野食嘅禧爸燒﹐所以諗住口水禧身上面都係水啫﹐整好D野先同佢去沖涼。點知可能係條友仔無瞓晏覺﹐嗰個鐘數開始想瞓又唔想瞓﹐所以有D發脾四咁款。

同之前一樣﹐都係好鍾意立呔仔手上面揸嘅玩具嚟扮教呔仔玩﹐實則係自己攞嚟玩。佢同呔爸一齊砌lego嗰陣佢連呔爸都唔驚﹐鬼咁大聲同人講野﹐真係無D禮貌﹗叫呔爸如果口水禧無禮貌就幫我鬧佢﹐點知呔爸話咁樣會破壞佢形象﹐拒絕我嘅要求。

咁唯有由呀媽我親自出嚟教仔喇。叫個衰仔唔好咁大聲同叔叔講野咁無禮貌﹐點知佢重要即可駁我嘴話唔係大聲﹐係講野啫。吖﹗幾次都喺廚房聽到佢喝叔叔﹐喺廚房忙緊整D野食嘅呀媽唔出嚟泡制下佢都唔得﹗

咁細個嘅人仔其實都知咩叫瘀﹐當住客人面前話佢呢實肯定唔認錯。唯有dick咗佢去客廳訓話。睇佢扭晒計都知佢已經開始玩野﹐加上呢個歲數嘅特點﹐同佢去沖涼都話要掉呀媽落垃圾桶喎﹗沖咗涼提佢唔可以再咁無禮貌同叔叔/姨姨講野﹐唔好搶呔仔手上面嘅玩具。當然都係聽D唔聽D喇﹐細路仔係唔可以淨係講一次架喇。

大概成八點先開飯﹐可憐呔爸媽喺sun room餓到要食西瓜頂住肚餓﹐真慘﹗終於都有野食﹐傾傾下佢哋接到屋企電話聽咗個壞消息。唉﹗果然係好為人著想嘅年青人﹐雖然佢哋極力掩飾哀傷﹐不過睇到佢哋忍喊忍得好辛苦。問佢哋洗唔洗即刻返屋企同屋企人商量下家事﹐諗住包好D野食比佢帶返去食﹐不過佢哋話唔洗﹐繼續留喺度。我諗佢哋見禧爸熱辣辣喺出面燒咗成粒鐘﹐唔想掃大家興﹐所以堅持食埋先走。不過我知餐飯佢哋真係食而不知其味喇。我好似無當面安慰佢哋﹐因為我驚講太多佢哋真係會忍唔到爆出嚟。所以大家扮無事食野傾計囉。我唔知呔爸話自己細個嘅時候係幾反斗喇﹐今日喺我哋眼前嘅佢確係非常孝順又顧家。相信太爺爺都會感到好安慰﹗

食完飯玩咗一輪﹐口水禧真係有時對呔仔粗手粗腳﹐細路唔識留力就係咁﹐佢估計唔到出咗力會大力到推咗人落地。呔仔都算係咁﹐比佢推都唔出聲﹐跌低起身話之你又再玩過。口水禧砌lego砌到好高﹐呔仔襯佢唔為意掃跌佢個lego大樓﹐幾驚口水禧會發爛咋打/鬧呔仔﹐好彩口水禧無動於衷又再砌過啫﹗如果佢郁手打呔仔﹐我點同呔爸媽交代﹗

所以客人走咗之後我哋猛讚口水禧﹐話佢個lego比呔仔整跌咗佢無發脾四係好好嘅表現﹐希望佢以後都係咁樣對朋友仔喇。重有就係叫佢要小心留力唔好太大力推呔仔﹐佢唔明點解平時都係咁樣對我哋我哋又唔會跌。解釋過佢知因為呔仔細過佢矮過佢﹐比哥哥大力推嘅話會企唔穩跌低。不過我諗口水禧都唔係好明﹐佢以為個個人/小朋友都係咁上下力水﹐自己唔係大力。

(尋晚同呔家食晚飯﹐口水禧叫呔仔唔好搞D野﹐叫唔聽急起上嚟又推咗呔仔一野﹐唉﹗

)呔仔﹐你快D學識講「唔好推我」呢四個字喇﹗如果唔係﹐都唔知你要硬食哥哥幾多野﹗