真係返學

星期一﹐口水禧嘅preschool生涯正式開始。其實對佢嚟講﹐preschool又好﹐summer camp又好﹐都無乜分別﹐咪都係對住一大群gi li gu lu嘅人﹗不過人數就比summer camp多一倍。闊別一段時間嘅circle time又返嚟喇。所以口水禧都無乜抗拒返學。其實都算好彩﹐雖然次次都要我陪佢返﹐但係佢無試過話唔想返學。返學之前無話要拉鋸一輪又喊又鬧先返到學﹐咁對我嚟講已經叫還得神落喇﹗

星期一嗰日我要早返因為嗰日我要co-op。而家多咗人返學﹐學校門前嘅停車位已經唔夠我哋咁多人泊﹐要泊出街再行一段路先返到學。co-op要比上課時間早十五分鐘到校﹐為免遲到(泊完車重要拉住口水禧行﹐想唔遲都唔得喇﹗)﹐禧爸車我哋兩條友仔去學校放低我哋﹐放學再嚟接返我哋。

當我哋入到學校﹐已經有好幾個家庭到咗﹐而家多咗人返學﹐co-op嘅人數相對都多咗。每個co-opper返到學校第一件事就係去揀自己嗰日想負責嘅單位﹐先到先得。雖然我哋係無遲到準時到校﹐不過想同外國人鬥早呢家野呢﹐就好難會贏佢哋架喇。佢哋夜晚好早就瞓﹐朝早可以四﹑五點就起身去散步﹐然後先返工返學。所以當我去到揀野做嘅時候﹐只係淨返Curiosity嘅單位。點解無人揀嗰個單位呢﹖你一陣就會知。

Curiosity嘅媽媽係負責curiosity嘅活動﹐包括玩下磁石﹑圖畫配對﹑穿下繩等等新奇野(當然係對於小朋友嚟講叫新奇嘅野喇﹐大人又點會覺得新奇吖﹗

)除此之外﹐重要負責埋出面嘅動物包括雞﹑兔﹑金魚同埋兩隻Guinea Pig (唔係豬﹐係D類似睽鼠之類嘅野)。通常小朋友都對動物嘅興趣多D﹐所以嗰日基本上我係除咗circle time同snack time之外﹐係無入過室內嘅。全程都同D雞雞同埋兔仔為伍。

小朋友入嚟睇動物嘅情緒係好高漲﹐佢哋基本上係見野就追﹐見野就伸手去扯去拉﹐完全唔知嗰D係動物係有感覺嘅生物。我嘅職責就係要教佢哋關於嗰D動物嘅野﹑同佢哋一齊餵動物﹑睇下有無雞蛋﹑保護D動物(本來應該係保護D小朋友嘅安全﹐不過我覺得D動物嘅生命受到嘅威脅更加大﹗)。嗰日由於太混亂﹐一下子入嚟七個八個細路﹐有D重要係隔離班大個D嘅小朋友﹐佢哋喺度已經一段時間﹐所以對學校嘅野都叫做好熟﹐就係因為熟﹐所以就更加難控制佢哋。搞到有D走咗去追雞﹑有D追兔仔﹑有D亂巢D正想哺蛋嘅雞(巢到毛都甩咗幾條)﹑有D走去攞雞糧質D兔仔食﹑有D周圍亂掉D雞糧落地﹑掉D雞糧落D水兜度塞住D水嘅出口﹑喺D籠底扯D已經極度驚慌嘅兔仔出嚟玩等等﹗﹗﹗﹗﹗﹗﹗

嗰一刻我覺得自己好似一個雞農或者販賣活雞嘅雞販呀珍﹐我嗰幾隻走地雞係咁喺地下走﹐我就保得呢隻又保唔到入面哺蛋嗰兩隻﹐真係人都顛﹗

有D細路玩完雞又唔洗手﹐重有個玩到鼻哥窿都插住條白色嘅雞毛添﹗(我見到嗰個細路真係想笑到賴﹗

)笑之餘拿拿臨即刻幫佢扯返條毛出嚟﹐驚佢真係索咗入去就大件事﹗﹗﹗

又驚巢哺蛋雞嗰兩個細路會比雞啄﹐真係識分身術先搞得掂呢個情境﹗都莫講話驚唔驚會踩到地下D地雷……(咁混亂嘅場面﹐我已經將踩屎呢樣野豁咗出去喇

)

所以你話邊個會想負責做curiosity呢個單位呢﹖有感口水禧呢班同學嘅家長無之前返summer camp(家下去晒下晝班)嘅家長咁熱心﹐我諗以後都將會係我繼續去販賣活雞架喇﹗

我一定要諗個好計點樣好好控制D咁混亂嘅場面先得﹗

嗰日有個小朋友唔肯參加第一次嘅circle time﹐可能係佢未熱身﹐所以淨係縮埋喺個角落頭黐住媽媽。我喺動物欄入面回緊氣嘅時候突然見到呢個小朋友自己喺度踱步﹐於是試下問佢想唔想入嚟餵下D動物。開頭佢有D驚我﹐不過佢後來都肯入嚟餵下動物。重同我講野添。之後佢重嚟參加第二個circle time添﹗重有一個喊到爆炸﹐死拉住佢呀婆唔比佢走﹐我咁o岩去攞D西芹嘅時候見佢喊到顛咗﹐於是問下佢想唔想一齊去餵兔仔﹐佢一路喊一路話想﹐咁佢呀婆就同埋佢一齊嚟餵兔仔。正當佢好投入哋餵動物嘅時候﹐佢呀婆就粒聲唔出閃咗去。但個細路都無理佢呀婆﹐掛住餵雞。我而家明白點解學校要養動物﹐原來當小朋友失控嘅時候﹐動物係安撫佢哋驚慌嘅好幫手。我相信好快﹐口水禧都會用呢個方法去擺脫同呀媽一齊返學嘅依賴。

其實我感覺到佢應該好快就可以自己去學校。我將會慢慢減少喺學校出現……

嗰日放學返到屋企﹐簡直係前所未有嘅散晒﹐真係蟻都無力踩咁濟﹗我真係好佩服生三﹑四個小朋友嘅同學媽媽﹐點湊到咁多個呀﹖唔怪之得外國人平時食野要咁求其﹐屋又唔點執﹐細路又唔點理。比著係我﹐湊住咁多件﹐真係連呼吸到無時間喇﹗

星期二夜晚去學校開家長教師會議開到八點幾先走得人。有D媽媽重要咩住個BB嚟﹐但係D BB點肯同你齋坐吖﹐個個喊到七彩﹐搞到在場變咗托兒所﹐個個呀媽喺度邊行邊聽人講野﹐場面都幾搞笑﹗

主持人一話走得﹐個個雞咁腳閃﹐梗係喇﹐嗰個鐘數佢哋夠鐘要瞓覺架喇嘛﹐有D重要趕住返屋企餵奶添﹗我嗰日撞到Clara媽媽﹐佢就係其中一個雞咁腳走人嘅媽媽﹐因為Clara個細佬BB喺屋企要食奶。我估因為佢係食人奶﹐而呢度嘅餵人奶嘅媽媽係唔洗買泵奶機餵BB嘅﹐佢哋當街當巷都係咁餵﹐所以佢哋係唔會有預先泵好嘅奶喺屋企。所以都可以理解Clara媽媽點解一路開會一路個樣好似好唔耐煩咁﹐原來係要趕住去餵奶。呢度係咁架喇﹐個個都要自己湊細路﹐除非你有錢到可以請人返嚟喺你屋企湊喇。一唔係就請baby sitter囉﹐不過就算係﹐餵人奶嗰part都無人可以幫到手架喇﹗