究竟口水禧今日做咗D乜令佢個樣望落病病哋得嚟之但係又不失有D醒神咁呢﹖之唔係今日佢第一次自己一個留喺學校……五分鐘咁巴閉囉﹗
係呀﹐得五分鐘咋﹐第一次算係咁喇﹐見好就收喇﹐係咪﹖玩得大過頭﹐一陣又好似上次我懶醒咁成三個字都未見人﹐如果又再次嚇驚咗佢﹐我真係恐防要陪佢返學返到大學畢業先收得工呀﹗
話說呢排我哋都不停咁利誘佢如果有一日可以夠膽一個人自己去返學而又唔喊又乖嘅話﹐爸爸媽媽就會送佢一份大獎。份野都揀好咗架喇﹐只欠東風架咋﹗不過大獎呢家野並係話攞就夠膽攞架嘛﹐不如先嚟個小試牛刀﹐睇下佢家下嘅程度去到邊先喇。所以我就同佢講﹐如果星期五媽媽先送咗佢入學校先﹐然後佢自己喺學校等我泊好架車再返返去學校﹐如果唔喊嘅話﹐就送佢一個三眼仔(Toy Story入面嗰個Alien﹐唔知其實香港係點叫你隻野)。為咗得到三眼仔﹐口水禧喺屋企係大大聲話搞得掂架﹗好﹗一言為定喇咁就﹗
今朝﹐如常一齊去返學﹐臨轉彎之前我重特登指比佢睇一陣媽媽會將架車泊去邊度﹐然後要過邊條馬路﹐再行一段路就會返到學校揾佢﹐等佢有個心理準備呀媽要少少時間先可以再喺佢面前出現。機乎想講埋媽媽泊S位係好唔掂嘅﹐唔知要扭幾多手呔先可以泊到半架車入去﹗不過無謂嚇到佢縮沙喇﹐盞賴野﹗
停低架車﹐落車嗰下佢重好神彩飛揚咁話要買三眼仔﹐入到學校嗰陣就開始有D眼紅﹐老師好醒目即刻飛撲埋嚟﹐我同老師講咗乜野事之後﹐老師就黐住口水禧﹐當時口水禧個樣好始跌咗幾億喺街執唔返咁嘅樣﹐老師叫我同口水禧去擺好D隨身物品先﹐其實呢個玩意最罩忌就係我雞咁腳閃﹐既然口水禧無反抗﹐咁我就梗係食住個勢落多幾錢迷藥﹐好肯定話佢知我會好快泊好車之後即刻返嚟學校揾返佢﹐得到佢同意之後先好行出門口。如果唔係﹐個情境就會好似呀媽唔要仔﹐掉咗佢一樣。
老師猛咁同口水禧講野﹐但係口水禧嘅眼神係無離開過鬆緊人嘅我﹐老師叫佢去畫野﹐口水禧就話要企定喺門口等媽媽﹐好似迎賓或者送客咁成個人棟喺門口扎行個馬步咁樣。望見就知如果我遲咗返去嘅話﹐口水禧肯定會喊爆﹐所以我一路行一路大聲向佢叫住「三眼仔﹗三眼仔﹗」定一定佢驚先﹗(順便轉移下佢猛諗媽媽唔知會唔會飛甩佢嘅恐懼)佢個樣當時已經好似行刑咁嘅面口﹐係爭在重強忍住眼淚未滴落嚟架咋﹗
其實臨入學校之前我望到門口大街有個車位喺度﹐不過點敢應承佢話泊嗰個位﹐一陣出返去揾唔返嗰個位﹐真係要泊到好遠﹐咁我咪大件事﹗點都梗係講個遠少少嘅位好D﹐預少少時間比自己萬一真係要泊遠D﹐咁我就唔算失信於口水禧喇嘛﹗早咗返重可以比佢覺得我真係有盡快架﹗
好彩﹐門口個位真係重喺度。泊好車都唔洗一分鐘﹐咁又唔好咁快入返去住﹐我想比D時間老師同口水禧相處下先。還掂我都要打電話比口水禧嘅醫生預約時間放咗學帶佢去睇醫生。所以打埋個電話我先行返入去學校﹐都唔洗五分鐘。
入到去﹐口水禧已經望到我﹐急急腳撲埋離大叫媽媽﹐對眼有D眼淚不過未跌落嚟﹐鼻有D鼻水﹐捉到我隻手實一實﹐攬到我對腳想行都行唔郁。老師跟住後面行過嚟提我要比多D讚美佢﹐老師當然亦都喺隔離讚到幾乎要頒個獎比口水禧咁濟喇﹗我見咁嘅形勢﹐梗係都要讚埋一份兼翻譯埋老師嘅讚美比佢聽喇。不過見佢有少少驚魂未定咁樣﹐都未識笑咁款﹐梗係拿拿臨又大叫我嘅口號「三眼仔﹗得咗喇﹗一陣去買﹗加多個麥樂雞添﹗」此時﹐口水禧先知自己掂咗﹐嗰一刻終於識笑。
呢個就係口水禧挑戰自己嘅勝利獎品﹗呢期口水禧對太空野好鍾意﹐呢個三眼仔係佢嘅「飛佛」﹗下次再試D乜野﹖咪都係繼續玩泊車囉﹐我諗佢暫時只可以承受到泊車分離遊戲﹐自己返學嗰個挑戰重需要一D時間。正所謂欲速則不達﹐而家叫做開咗個頭﹐難得佢都算OK接受得到﹐咁就千其唔好一下子即刻比個最難度高嘅佢嘆。我寧願將泊車嘅時間一次比一次長少少﹐慢慢比佢適應﹐得到佢嘅信任之後﹐先至再同老師諗下口水禧自己返學應該點。
去到Walmart﹐揾咗好耐都揾唔到三眼仔﹐嚇得我吖﹐幾乎要喺自己塊面挖多隻眼出嚟扮住先﹗問口水禧如果真係揾唔到﹐可唔可以買第二樣﹐例如識郁識講野嘅巴斯光年呀﹖佢話唔制喎﹗(大佬﹐識講野識郁嘅巴斯光年貴過三眼仔架﹗)真係揾到我索晒氣之時﹐比我行嚟行去無意中揾到唯一一隻三眼仔﹐真係要多謝上天保佑﹗如果唔係﹐我真係要挖眼喇﹗
我諗﹐小朋友對買玩具同買獎品係分開嘅。買玩具係買件野返去玩囉。買獎品就唔同﹐係表示自己達到一個目標﹐覺得自己叻嘅認同品﹐所以話咗買咩就要買咩。我提咗佢無數次隻三眼仔唔識郁唔識講野﹐齋企喺度架喎﹔巴斯光年就唔同喇﹐比佢噤埋D制添﹐但最後佢一D都無動搖過﹐係都要買三眼仔。對佢嚟講﹐三眼仔唔係一件玩具﹐而係一個對肯定自己越過挑戰嘅勝利品。
買完佢嘅獎品就去咗食麥樂雞﹐未食野就已經拆咗隻三眼仔出嚟欣賞喇。
今日學校放咗兩隻guinea pig出嚟比小朋友抱同摸。口水禧摸完抱完真嗰隻﹐重要玩埋假嘅呢隻。或者有D家長會抗拒比小朋友接觸真動物﹐覺得佢哋帶菌﹐好污糟。但係其實小朋友見到動物嘅時候係完全唔同樣架。雖然佢哋係會過度興奮﹐但係佢哋會願意為嗰隻動物去改變自己嘅行為。就好似呢兩隻guinea pig﹐好細膽好怕我哋咁多人圍﹐於是老師叫我哋個個唔好大聲講野﹐唔好四圍咁走嚇親D guinea pig。原本興奮過度嘅小朋友都識得即刻細細聲講野同埋動作好慢咁坐低﹐等老師抱隻野比佢哋試抱。只要教佢哋唔好咁大力摸﹐要輕力D溫柔D﹐D小朋友係會改變。呢個係我以後如果要再去做雞販嘅時候要教小朋友嘅野。
禧婆婆成日話口水禧可能會因為mimi而氣喘﹐但係我覺得口水禧嘅氣喘問題可以有好多方法去治理﹐但係比佢知道相處咗三年嘅mimi比呀媽掉咗嘅話﹐呢個打擊我就真係唔知點樣治理喇。細個禧婆婆掉咗我D睽鼠﹐送走D狗嗰陣﹐我同肥玲喊到豬頭咁嘅樣﹐其實某程度上當住小朋友面掉動物確係好令佢哋傷心。佢哋同動物不知不覺間建立嘅友誼同感情並唔可以用一打三眼仔去彌補嘅﹐雖然口水禧喺屋企唔多會同mimi玩﹐但係佢睇電視﹑睇書﹑喺街或者嫲嫲爺爺屋企見到貓嘅話﹐佢係會好開心猛叫「mimi呀﹗mimi呀﹗」所以﹐學校會養咁多動物喺度係有佢嘅道理嘅。
勝利嘅口水禧今日寧舍囂﹗坐都坐得大豪客過人﹗
眼神幾輕挑﹗
口水禧近期嘅第二至愛係Mr Potato Head。自己砌返D眼耳口鼻。
完全唔離手
連同同學玩都要揸住
同Mr Potato Head一齊曬太陽添﹗E~~點解個嘴唇會喺則面嘅﹖因為比同學搶咗D耳同手﹐所以點都揾D野質住D窿先﹗
我嘅感冒已經無事。口水禧就麻煩D﹐要加多隻有類固醇嘅噴藥。家下一日要食一次鼻敏感+止咳藥﹑一次口服類固醇(連食三日然之後停食)﹑兩次止喘含類固醇噴劑(呢個要噴四-五個月)﹑四次擴張氣管噴劑(呢個好返之後可以停)﹑三次通鼻塞收鼻水藥(無事唔洗食)。而家有話敏感症季節又嚟料﹐唉﹗重要加埋返學件件都流緊鼻涕﹐點搞呀﹖
呢幾日喺屋企忙住將學校嘅文件釘裝好﹐真係自己讀書嗰陣都無咁忙﹗
無辦法喇﹐要做超齡preschool學生係咁架喇﹐頂硬上囉﹗
