美國嘅小朋友返學(以三藩市嚟講)﹐正常嚟講係hea爆型嘅﹐除非你去D私立學校返學或者去D好多亞洲人嘅學校返學﹐咁就同喺香港返學無乜分別咁濟。嗰D學校嘅競爭好大﹐D學生有D放咗學重要去補習﹑學呢樣嗰樣﹑功課同測驗量可能要多幾打手同頭先搞得掂。你問我會唔會送口水禧去嗰種學校呀﹖我都係嗰句喇﹐佢想去我梗比佢去﹔佢唔想去﹐我迫佢去盞家嘈屋閉﹐影響母子感情就得不償失喇。
呢篇blog講緊嘅家課係我嘅家課。容許我連續幾篇blog都爆廣東話﹐有D野係要用返我日常嘅于言講先過癮吖嘛﹗(實則可能無人care我用咩話寫喇﹐話之我用外星人話喇﹐係嘩﹖)自上次拒絕做班代表之後﹐我最後比分派做咗Staff Assistant,即係老師嘅助手。工作係負責幫老師準備上堂時候嘅教材或者小朋友要用嘅手工材料。另外就係提醒老師surprise can輪到邊個學生做﹑邊個學生生日等等大雜工嘅職務。相比起班代表﹐我覺得呢份職務經已係等同中咗六合彩架喇﹐我哋個班代表由被選之後到開咗學都未試過一日唔洗寫多過一個電郵﹐都未計接家長詢問﹑反應意見嗰D電郵﹗重要個個禮拜去開會﹐搞playdate呢樣嗰樣﹗我自問真係騰唔出咁嘅時間出嚟﹐你叫我寫E-Mail唔係唔識﹐不過要時間囉﹐總不能寫D好似我平時同朋友吹水嗰隻形式嘅E-Mail啩﹖唔笑死大家至奇喇﹗但係如果要我寫正經少少嘅E-Mail﹐確實係需要好多時間﹐自問真係才疏學淺﹐無謂顧得學校野顧唔掂自己屋企野﹐所以都無接到呢份職務嚟做。而家覺得好明智亦都凳其他同學同埋家長開心﹐唔洗有個辦事能力低嘅班代表喇﹗
既然應承得老師咯﹐咁就要做好人哋比我嘅野﹐雖然係無人工嘅﹐但係呢個係我有無責任感嘅問題﹐班中﹐我哋係少數民族﹐得口水禧同另一個男同學係中國人﹐其他都係外國人﹐我哋就更加要做好本份喇﹐係嘛﹖我唔係奉承其他人或者老師﹐只係覺得自己尊重自己﹐唔好比人哋有機會覺得中國人嚟美國都係貪乜貪物﹐好食懶非之類。中國人﹐好勤力架﹐you know?(唔係全部都勤力﹐但係至我唔做懶嗰堆。)
其實都唔係D咩難度高野﹐剪下紙啫﹐雖然我喺裁剪野方面確係有D障礙﹐不過都盡力剪好D喇。真係分分鐘重專心過做女嗰陣做自己D功課﹗
而家夜晚早D食飯﹐第二朝要返學嘅話就之前嗰晚八點到就踢口水禧去瞓。洗好D豌同抹好廚房之後就攤學校D野嚟做喇。呢堆係星期五老師比我做完星期一帶返去學校嘅﹐今晚星期六就做咗先喇﹐費事o聽日趕頭趕命亂咁剪就大獲。
我確係好怕剪野﹐因為通常都唔方會對稱。你睇口水禧個髮型就知喇﹗
呢堆重要唔係自己嘅野﹐就更加要剪得小心D﹐唔好嘥紙。所以次次剪都揸到D紙鬼咁實﹐幾乎有呼吸嘅野都比我揸到斷氣為止﹗
我嗰對強而有力嘅麒麟臂你估浪得虛名架﹖真材實料嚟架﹐唔係講笑﹐禧爸因為細個整真一隻手﹐家下都唔夠我大力﹗加上學過琴﹐平時喺廚房斬野﹑搓野﹑抱口水禧等等﹐所以我對手都幾大力架﹗無晒女人手嘅線條﹖晨早豁咗出去喇。
坐喺飯臺前密密剪﹐剪咗粒幾鐘﹐終於搞掂﹗其實都係講緊十六份野﹐係D蘋果多少少……一佰粒之嘛﹗唔知點解都要剪成粒鐘﹗都話咗我係裁剪障礙症架喇﹗
點都好﹐總算做好咗我嘅功課﹐星期一有野交。舒服晒。
有見口水禧再係咁食類固醇落去都唔係辦法﹐早前blog友ToTo Ma比咗條方比我試下煲比口水禧食。ToTo 仔(ToTo Ma個仔應該係ToTo仔喇﹐係嘩﹖
)以前都好似口水禧咁有喘氣嘅問題﹐食咗呢個湯再加游水之後就無事喇。聽完梗係想試下﹐所以問ToTo媽攞咗個方﹐有日我哋去咗China Town嘅中藥鋪執藥材﹐嘩﹐原來蛤蚧咁難買架喎。去咗兩間都話無﹐卒之去咗一間大嘅先有。個店員睇咗我張方之後猛話﹕「嘩﹗你D藥好鬼貴架喎﹗」連續講咗好多次﹐我心諗﹕「唔係話比我知要幾百蚊甚至要一千蚊美金呀﹖唔好嚇我喎﹗」原來蛤蚧一隻要USD12﹐成套藥執齊要USD18。個店員重話見我要幾份藥﹐計平D比我﹐一於每份藥USD17喇。重話可以翻煲多一次添。我要咗四份﹐可以煲八次。佢猛話翻煲多過一次D藥就會好燥。我聽唔清楚以為佢話D藥食多咗好燥熱﹐於是問佢一個禮拜可以食幾多次﹐佢話﹕「食幾多次唔係問題﹐係驚你唔捨得買嚟食咋﹐咁鬼貴﹗」
唉﹗大佬﹐唔通有得口水禧繼續喘氣跟住變哮喘都唔捨得洗呢D錢嚟買比佢食咩﹖醫得好嘅﹐再貴都要買架喇﹐如果唔係﹐真係得咗哮喘嘅話﹐我諗醫哮喘嘅錢重多過執呢幾十劑藥材喇﹗係咪﹖無辦法﹐醫生話我同禧爸都有鼻敏感﹐所以我哋嘅仔女都肯定好大機會會有鼻敏感﹐甚至係哮喘。上星期一開學喺學校惹咗傷風﹐一傷風感冒就會引發喘氣。所以醫生要佢食咁多藥﹐就係要佢停止喘氣同埋預防變得更嚴重。不過我覺得口水禧食咗有類固醇嘅藥之後會變得有D行為上嘅問題﹐頭先喺佢對腳度見到幾粒野﹐又唔似係撞瘀﹐幾點野唔知係乜﹐星期一又要去睇醫生比佢望下係咪藥物敏感。唉﹗好彩口水禧個醫生係識講廣東話﹐如果唔係聽一大堆英文嘅醫學名詞﹐我真係要攞埋電子詞典去先知醫生講咩﹗
對我嚟講﹐呢劑藥最恐怖嘅地方唔係USD17一份而係裡面嘅蛤蚧。禧爸去攞藥嘅時候話店員已經將D材料切碎咗。我一心諗住係切到最多咪方糖咁大粒﹐話明切碎吖嘛。於是今日攞出嚟倒落個兜準備浸下佢嘅時候﹐一倒就飛咗D蛇皮咁嘅野出嚟﹐重要有個型狀嘅添﹐頂﹗真係嚇到我幾乎倒晒落地﹗好核突呀D皮﹗哎呀﹗重要有紋架添﹐見到都起雞皮﹗倒完重要見到條尾喺度﹐真係驚嚇度爆燈﹗禧爸喺隔離笑我無膽﹐呢D我真係唔同你爭﹐好核突呀﹐大佬﹗又話切碎咗嘅﹖條尾咁完整嘅﹖﹖﹖﹖救命呀﹗
倒出嚟都未夠驚﹐重要落手去洗呀﹗唔掂呀﹐真係唔掂呀﹐真係麒麟臂都即刻嚇到手痺呀﹗禧爸嘅外公以前係開中藥鋪﹐所以禧爸細個見過蛤蚧做藥材個樣﹐於是條友就可以大大聲咁笑我瘀我喇。咁叻﹐佢去洗囉。洗完﹐我鼓起咗最大嘅勇氣用手指……甲掂下﹐唔掂﹐揩到下都即刻縮手。好核突呀D質地﹗我係咪應該即刻去揾間賣鱷魚皮手袋嘅鋪頭﹐係咁摸D鱷魚皮先練大到個膽呢﹖我肯定如果我攞呢包野比口水禧個老師睇﹐佢會即刻踢我哋出校﹗
本來準備開始煲﹐但發現陪煲嘅嗰舊豬肉有問題﹐唯有將D藥放住喺雪櫃﹐聽日去買過舊肉返嚟再玩過。喺執藥材落保鮮袋嘅時候﹐我點敢用手去執吖﹐淨係將個兜舉起擺埋去個袋口倒D藥材落去個袋裡面﹐點知倒得急得濟﹐條尾sir咗落去我揸住袋嗰隻手度掂到我D皮呀﹐蛤蚧皮掂人皮嘅感覺真係無得頂呀﹗
一個人喺極度驚慌嘅時候一係就驚到大叫﹐一係就驚到亂鬧﹐我頭先係後者。我竟然驚到係咁鬧條尾好sir落嚟掂到我隻手﹗呢個係發自內心嘅表現﹐俗稱「失常」。驚到唔知自己喺度做乜﹐唯有攞條尾嚟發洩我恐慌嘅情緒。真係不禁想講句「bye bye你條尾﹗」
望住廚房重有幾包藥材﹐禧哥﹐我保你大﹐唔該可唔可以當比條生路你呀媽行﹐食完呢幾份野就即刻好返﹐等我弱小嘅心靈從此唔再受蛤蚧嘅恐嚇呢﹖唔該晒﹗
