沙漠之舟/兵馬俑

今日co-op唔係做雞販﹐係去咗睇室外活動嗰班細路。以為立到荀野﹐點知……

室外個遊樂場原來都唔野少。淨係面積都大過雞籠幾倍。有滑梯﹑鞦千﹑沙池﹑單車﹑搖搖板﹑爬繩等等。初時兩個人睇自己班﹐晏D連隔離班都出埋嚟﹐好在多幾個人睇班大帝﹗但係……有D大帝爭單車﹑有D飛車落斜路﹑有D喺沙池開片﹑有D唔見咗對鞋喪喊﹑有D玩玩下食沙﹑有D行行跑跑PK﹑有D爭第二D野玩﹑有D比人推落地食泥……

左撲右撲﹐氹得呢個喪喊緊嘅﹐隔離有兩件打緊交﹗遠處見到有個隔離班嘅打鞦千打到就嚟升空咁濟﹐嚇得我吖﹗口水禧都算係咁﹐做獨家村﹐所以避開咗好多比人片或者片人嘅機會。我co-op嗰日係無乜時間睇口水禧嘅﹐佢自己會執生架喇。

呢班同學好難搞﹐重難過summer camp嗰班。話唔聽﹐circle time老師講緊野﹐個個好似夢遊發作咁四圍行。叫佢返嚟坐低完全無反應﹐過去拉佢會發老脾﹗見野就攞叫佢唔好即喪喊﹐重要大聲到幾乎隔離街都聽到﹗唔知重以為我虐兒﹗對住佢哋我寫個服字﹐對住呢班小爺喺完全唔柄得嘅情況之下﹐每當佢哋失控之時﹐最想喊嗰個應該係我先o岩。

有個發現﹐班中有細佬妹嘅同學最鍾意打人同爭野玩﹐乜都要霸住自己玩晒。人哋想玩就即刻推人﹐而且好野蠻﹐連大人插手幫拖都要比佢怒睥甚至連我哋都打埋。(未死過呀﹐我都敢打﹗)但係佢哋D媽媽個個都話喺屋企唔會打細佬妹架喎。梗係喇﹐個細佬妹係BB﹐有乜好打吖﹗我估可能係媽媽要湊BB﹐唔得閑教啩。

E﹐係喎﹐話明講沙漠之舟架嘛﹐做乜講咗唔知去邊﹖證明我已經魂遊緊……

話說今日我喺沙池同班細路挖緊窿比佢哋整水坑﹐本身已經不斷比佢哋有意/無意咁潑咗幾野水+沙過嚟﹐成褲都係﹗點知有個失驚無神兜面潑過嚟﹐當堂由頭到腳都係沙﹐唔通我鼻哥窿有駱駝咁大﹐佢哋當咗我係駱駝﹖

抑或係我成日阻住佢哋為所欲為﹐佢哋想將我制成兵馬俑咁呢﹖

重有﹐今日發現有幾個同學有綠色鼻涕喺鼻哥窿度出出入入(上個星期見佢哋重係透明架)﹐咁我知點解口水禧會病喇﹗口水禧今日開始有痰﹐唉﹐睇嚟聽日又要去派錢喇﹗如果口水禧唔係有氣喘嘅問題﹐我都唔介意同學嘅媽媽照比病咗嘅同學返學。之但係口水禧一中傷風感冒就送埋氣喘做贈品﹐已經成個星期都未有好轉﹐日日撈埋D綠色鼻涕同學一齊﹐都唔知幾時先好得返呀﹐大佬﹖佢一病=我唔洗有覺好瞓﹐咁咪即係我賴野﹗

谷鬼氣﹐D人咁無公德心﹗

頂唔順喇﹐廚房堆衫唔摺住喇……兵馬俑都要瞓架﹗