星期日係口水禧學校嘅Welcome Back Picnic﹐有D類似開學旅行嘅party。個野餐活動由朝早十一點開始至中午一點﹐喺屋企附近某個公園舉行。學校為我哋訂咗kinko BBQ野食﹐包括排骨﹑春雞﹑沙律同埋一D唔知係湯定係汁嘅野。盛惠每份餐USD12﹐當中USD4係當捐比學校做經費嘅。口水禧唔食得呢D野﹐我又唔知一份即係幾多﹐你知喇外國人餐廳一碟野有時大到可以食我幾日都食唔完﹐所以我cheap cheap哋訂咗一份咁大把。
好彩真係無訂多到﹐人哋十一點開始﹐我哋三條友嗰日十二點半先去到﹐重要食咗野先出門口﹐唔算好肚餓。本來以為重有半粒鐘就收檔﹐去到同完老師打咗招呼﹐口水禧見到遠處山坡上嘅滑梯﹑鞦韆已經連老豆姓乜都唔理﹐直颷上去喪玩。眼見攞野食嗰條隊好似人哋輪米咁長﹐心諗都係等陣先落嚟攞喇。還掂口水禧又真係幾耐無去過公園﹐夾硬要佢眼光光望住我哋兩個食﹐佢同D 「sir滑梯」就「只可遠觀不可褻玩」又幾虐待佢嘅﹐於是都同佢上去玩下先。
嘩﹐嗰個山坡真係吖﹐上到我扯蝦咁濟﹐都唔知真係扯蝦嗰個有無事添架﹗
既然係連老豆姓乜都唔理咯﹐咁撞見同學嘅話﹐口水禧都當人哋透明架喇。我重同其中一個同學嘅媽咪傾咗一陣計添。話說佢個仔就係成日唔肯去circle time嗰個小朋友。佢嗰日喺地下執咗一支樹枝攞住周圍咁行﹐佢媽咪驚佢篤到自己或者篤到人哋﹐於是要攞走佢支樹枝。佢兩母子喺遠處﹐個仔嘅哭叫聲遍蓋成個山頭﹐只見個仔係咁掙扎﹐個呀媽就係咁搶支樹枝。後來梗係呀媽贏喇﹐個仔咪喊都好似比人搶咗幾億身家咁囉。佢攬住佢呀公喺我隔離喊﹐佢媽咪就抱住個半歲嘅妹妹坐喺我另一邊同我吹水。佢媽咪話以前個女未出世嗰陣個仔都好哋哋﹐後來個女出咗世﹐個仔都無話對妹妹有乜野唔妥﹐亦無試過蝦妹妹﹐但係就變得好有行為上嘅問題。呢個小朋友我曾經喺雞籠嗰度同佢單獨相處過﹐都唔算好麻煩嗰隻﹐不過真係要同佢玩好多花臣先至會肯聽人講嗰種小朋友﹐如果你正正常常咁同佢講叫佢做咩﹐佢係唔會肯嘅。佢大口水禧一個月﹐重有兩個月就滿四歲喇。其實佢嘅行為問題都唔知係因為三歲半嘅反叛期抑或係好似佢媽咪話齋係因為妹妹出世令佢轉變。佢攬住呀公喊咗好耐﹐拆天咁大聲﹐佢呀媽就抱住妹妹無奈地望住我﹐本來我想請佢食餅﹐不過睇佢喊到收唔到聲咁款﹐我連吸引佢應下我都有困難﹐見佢呀媽都唔鬼理佢﹐我都無謂強人所難喇。
好彩口水禧自出世以嚟除咗有colic嗰排之外都未曾試過咁樣顛喊﹐其實都好少喊添﹐如果唔係﹐以我咁嘅脾性﹐肯定已經爆咗血管﹗
我諗有D小朋友係天生極度鍾意喊﹐或者係後天被「培養」變成超級喊飽﹐一有野唔順意就用喊嚟抗議﹐我最怕咁樣嘅小朋友﹐因為除咗同佢鬥喊﹐我都唔知有乜方法可以破到佢哋呢招。
唔知邊度可以買到對付佢哋嘅「攻略」呢﹖
當日口水禧重係咳﹐我連佢聞氣嗰D工具同埋藥都帶埋去。雖然佢係氣喘緊﹐但係我無可能叫佢一日到黑與世隔絕咁痞喺屋企完全唔參加學校活動架嘛﹐之但係又驚佢喺公園喪跑完之後會扯蝦﹐所以都要帶晒佢需要嘅物品出街以防萬一。真係一抽二lung﹐有藥有餅有水有玩具有衫有褲有褸有熱水有洗鼻哥野等等﹗
而家嘅天氣真係難捉摸。一時有太陽又熱﹐一陣陰天有風又凍。慎防口水禧再賴野﹐開頭都唔敢同佢除外套﹐因為喺山頭玩﹐間唔中一浸涼風吹埋嚟都有D凍凍哋﹐費事一陣又冷親就弊﹗雖然眼見其他小朋友都著短袖﹐但係外國人就係咁架喇﹐冬天都會照比D細路著短袖﹐有得佢哋兩行鼻涕流到去下巴咁濟。有blog友問D父母係咪唔怕D細路病﹐答案係YES。好多小朋友傷風感冒咳﹐佢哋嘅父母都唔會比藥佢哋食﹐莫講話帶佢哋去睇醫生。好似我呢D三日唔埋兩日就去派錢嘅真係有D怪怪哋架。以前我有個同事﹐個個月都病到死死下咁返工﹐佢話個女喺baby sitter嗰度惹咗D傷風感冒返屋企﹐成家的病晒﹐咳到隻野咁。我問佢有無食藥﹐佢望住我呆咗﹐佢話「咳同傷風啫﹐洗乜食藥呀﹐自己會好返架喇﹗」
咁你明白點解口水禧D同學流住綠色鼻涕都當無事發生喇。所以今日先同禧婆婆講﹐睇嚟齋靠食藥係無希望架喇﹐不如去學游水喇。之前見佢氣喘緊唔敢放佢去報名﹐而家睇嚟真係與其坐喺屋企等運到﹐不如自己強身健體博一博好過。呢個星期揾時間帶口水禧去拜師學游水喇喂﹗
點解唔學D外國人咁放縱口水禧有得佢自己好返﹖一來我唔想佢真係到最後會有哮喘﹔二來喺佢未自己好返之前相信我已經渴睡症渴瓜咗。我聽到佢咳或者猛咁索返D鼻涕入去我會好火滾兼瞓唔著﹐無謂搞到第二日唔夠瞓亂發脾四喇。所以呢方面我係唔能夠接受外國人嗰種style!
除咗同班同學﹐我重見到以前一齊上summer camp﹐家陣去咗下晝班嘅同學﹐包括對口水禧好死心塌地嘅Clara。佢一見到口水禧就飛撲﹐可惜口水禧當人哋透明。搞到Clara好無癮走咗去第二度玩。唉﹗我諗Clara都係無行架喇。
集體活動就唔會去參加架喇﹐口水禧喺佢老豆呀媽喪食嘅時候淨喺我哋附近嘅草地上面自己跑嚟跑去﹐執下呢樣嚟玩嗰樣嚟掉咁囉。如果你嘅小朋友係咁樣嘅話﹐唔好覺得佢哋唔正常﹐亦唔洗覺得係因為佢唔慣同人玩所以會咁樣。其實有好多原因令一個細路喺某個場合唔多合群。可能係周圍嘅環境太吸引小朋友去探索﹔又或者係太嘈﹐小朋友唔鍾意﹔又或者佢當時真係唔想同其他人有接觸﹐想自己做自己鍾意嘅野等等原因。
口水禧唔係猛黐住我哋兩個而係自己去睇野。所以我哋無規定佢唔可以走遠﹐只有自己睇緊D囉﹐小朋友自己點會同你步步為營吖﹐你唔放佢四圍行下睇下﹐佢點會有機會接觸佢未接觸過嘅野﹖我見過有D家長喺餐廳同朋友喪傾粒幾兩粒鐘﹐但係就一滴都唔比個小朋友落地玩。我覺得落地喺規定嘅範圍伸展下都好吖﹐唔阻人又安全嘅話比小朋友落地玩下無防啫。大人傾計傾咁耐﹐個細路點肯坐定定等吖﹗
口水禧話想試下face painting﹐喺塊面畫下野。問佢想畫乜﹐佢話要畫個枯髏頭喎。就嚟halloween﹐周街都係﹐口水禧又要驚又要睇﹐真係無計。家下重將佢嘅第一次比咗添﹐D口味果然係唔同D呀下﹗
上面張相當堂覺得佢變返兩歲嗰陣無頸個樣咁搞笑﹗
佢真係好比面架喇﹐平時同佢滴眼藥水佢對眼合到幾本上係滴唔到半滴入眼嘅。家下咁大犧牲比人畫到對眼成對熊貓咁都係縮咗條頸咁大把咋﹐真係算係咁。
其實本來應該喺塊面其餘嘅位置油晒白色嘅﹐不過我諗個auntie費事去得咁盡(或者係趕住收工)﹐所以就咁畫咗幾筆就比塊鏡口水禧照。口水禧望落自己個look同張相示範個樣唔同都有D R頭。不過都要收貨架喇﹐你估家陣登檯做大戲咩﹗
口水禧﹕E﹐點解我呢個樣望落順眼過平時個樣架呢﹖
差唔多兩點﹐我哋就啟程去探鐵金鋼無敵湊仔奶媽超人呔媽同兩位少爺喇。去之前走去買咗呔媽想食嘅麥樂雞先﹐然後再去打搞下人。嗰日朝早十一點幾打去﹐佢話佢哥哥晏D可能會去探佢。咁我哋都趁下熱鬧喇喂﹗點知搞到呔媽同呔嫲嫲特登執屋﹐真係唔好意思。話咗呔媽千其唔好執架喇﹐咁樣我哋邊好意思再去探佢哋呢﹖次次都要執一執嘅話幾煩吖﹗開嚟見我囉﹐那怕你show hand我都唔驚架﹐屋企有細路係咁架喇﹐重要有兩件添﹗有時間瞓下﹐爆下石﹐睇下電視囉﹐執乜鬼野屋﹗
講咁多﹐我哋係唔敢勞煩呔嫲嫲咋﹗
最憎同D後生女合照架勒。
中間嗰個就無問題﹐係唔係都細我幾廿年架喇。
細佬嗰日我哋入門口嗰下個樣有D驚訝﹐除咗無諗過我哋呢個件蛋散會喺佢屋企個客廳出現之外﹐重有某人個大花面喇梗係﹗
口水禧點解咁鍾意同呔仔玩呢﹐原因好簡單﹐就係佢哋都好有默契地一見面就會自動去巢對方嘅玩具嚟玩﹐完全唔洗打招呼唔洗單聲﹐自己郁手就得架喇。
喺口水禧喪玩呔仔D玩具之時﹐呔仔亦都好熟架步地巢口水禧平時帶出街嘅Thomas袋﹐因為呔仔知道呢個哥哥個袋次次都有玩具喺入面嘅。我覺得佢哋呢隻零交流但又熟晒對方D野好搞笑﹐唔怪之得話細路玩嘅是候係唔洗講野都會有默契喇。
呔仔好快就揾到口水禧個望遠鏡嚟玩。但係佢每次裝個望遠鏡嘅是候都係合埋眼嘅。
你以為佢睇唔到野呀﹖唔係喎﹐佢次次放返低個望遠鏡時係會笑得好開心﹐好似發現咗寶藏咁嘅樣架喎﹗
呔仔同佢表姐兩個都有對肥大嘅脾﹐果然係真係不露相﹗秘訣在於佢哋兩位見到野食係會主動出擊嘅。口水禧就掛住玩﹐叫極都唔食野。竟然係連佢最鍾意嘅麥樂雞同薯條都不敵呔仔嘅玩具﹐你話呔仔嘅屋企魅力幾沒法擋吖﹗
呢兩個情境無論喺我屋企或者係呔家已經見慣架喇。家下呔仔都識少少反抗喇﹐口水禧唔可以再扮晒大呀哥死扯住唔放或者隨手就咁老笠架喇。
呔仔﹕喺我地頭想扮技安﹖唔過幾招你睇都唔知我有幾猛料呀﹗
呔媽話一對二都OK﹐加多個都重得喎。後生女果然係後生女呀下﹐鬼唔望你下年生孖仔﹐雙拳難敵八手﹐到時我睇你有幾口硬﹗唔好打嚟揾我救命呀﹗
不過﹐講真嗰句﹐此女子可以頂得住湊兩件有餘簡直令我五體投地﹐餵夜奶(人奶BB重要食得好密下)﹐朝早要早起招呼大少﹐晏D要對兩個﹐最正係兩個午睡時間唔同﹐一個瞓完到另一個﹐所以呔媽係無晏覺瞓嘅。一路頂到夜晚﹐跟住半夜再繼續頂夜更……睇嚟少林寺十八銅人原來藏身喺呔家﹗
