宇宙的奧秘

今日返完學喇﹐勁爆熱﹐放學去攞車嘅時候係華氏104度(攝氏40度)。今朝泊車嗰陣趕頭趕命﹐唔記得整個太陽擋喺塊車頭玻璃度﹐所以曬到架車火爐咁熱﹗開晒D車門唔敢即刻「得」入去﹐咁熱嘅車箱真係焗熟我哋兩母子都似﹗企喺架車隔離曬住猛烈嘅太陽檢視下今朝嘅戰績(以為無野﹐點知一返到屋企就比禧爸發現車門凹咗少少﹐妖﹗)﹐抖咗咁上下先上車返屋企。

今日雖然揀咗去做雞販﹐不過因為天氣太熱﹐無人嚟玩雞同兔仔﹐我真係淨係負責拍烏蠅就得勒。雖然係咁﹐我諗都好過喺室內聽住每隔幾秒就一個大叫﹑尖叫﹑爆喊﹑失控喪喊等等嘅場面﹗唔知喺咪呢班陽盛陰衰嘅關係(得一個女同學﹐十四個男同學)﹐所以好多時都有打交嘅場面。唉﹗呢班小朋友真係搞到個個大人標晒汗﹐嘔晒白泡﹗如果話係因為三歲半嘅反叛年齡而D小朋友特別「long黎」嘅話﹐咁我哋呢班嘅同學仔真係代表作喇﹗有時佢哋離譜到我覺得佢哋已經去到更年期嘅階段﹐要食太太口服液﹗

我喺雞籠每隔幾秒就聽到遠處有叫聲同喊聲﹐真係慶幸自己淨係對住D雞同兔﹑對住D屎同烏蠅喺度發呆﹐咁咪幾好﹐夠靜。我唔係突然對學校無晒heart呀﹐我係對D細路投降咋﹗唔知佢哋嘅父母有無管教仔女﹐可能係有教不過未教得聽佢哋﹐又或者無教都唔定。

終於明白點解呢度成日有新聞講D媽媽一次過殺晒幾個仔女嘅慘劇﹐老實講吖﹐就算自己平時都要湊口水禧﹐不過之前都唔係好明點解會有媽媽忍心做D咁嘅事﹐而家見識過D小魔怪﹐即刻明晒。如果一間屋入面有兩件打緊交嗌到隔離街都聽到﹔呢邊有件發緊脾四喊緊唔知要乜野﹐間屋亂過亂葬崗﹐自己好眼瞓重要手抱住一件隔幾個鐘要餵奶……你唔顛﹖我寫個服字比你﹗(少林寺十八銅人呔媽除外)

所以今日嘅雞籠對於我嚟講係個世外桃源﹐遠離煩囂嘅清靜之地。

上個週末我哋帶咗口水禧去太空科學館。超級人多﹐重要係某個種族嘅人最多﹐所以場面爆亂﹐亂到想即刻走。但係梗係無咁做喇﹐事關呢度係我哋揾答案滿足口水禧成日問嘅太空問題嘅好地方。

裡面有D真嘅太空人返回地球用過嘅太空艙(成個波咁嘅樣嗰架野唔知叫咩﹖)﹑太空人嘅衫同隨身裝備﹑尿片等等。重有好多相同資料﹐好似口水禧成日問嘅點解有太空﹑點解有地球﹑點解有太陽等等R到我個頭無頭髮咁濟嘅問題﹐有心機揾嘅話應該係可以喺度揾到答案嘅。

由於有贈券﹐我同禧爸都唔洗比錢買入場券。口水禧要比﹐因為張贈卷淨係可以包兩個相同住址嘅人﹐口水禧入場費平D﹐咁梗係我哋兩個老野用贈券﹐後生仔比入場費喇﹗唔知係咪人人都有贈券﹐嗰日個停車場爆到無位﹐我要同口水禧喺場館門口先落車﹐然後排住隊攞票先﹐禧爸就去揾位泊車。

排咗唔夠半個鐘就入咗場。相機喺入咗場之後就開始霸工﹐嚇到我以為壞咗﹐點知返到屋企又影得返喇喎﹐不過就算當場無壞到都唔慌有心機影喇﹐咁多人又咁亂﹐行都無心機﹐莫講話影相。

某種族嘅人真係要再受公民教育先可以放出嚟﹐佢哋由大人到細路都係唔知咩叫守秩序同埋咩叫公德心。小朋友好奇心重唔係錯﹐見到D得意野衝埋去玩亦都好正常﹐玩極都唔肯放手讓比其他小朋友玩都唔奇﹐奇就奇在父母睇住都當無事發生甚至幫手搶埋一份嗰下奇。面對咁樣嘅場面﹐講真﹐真係好對口水禧唔住﹐我猛催住話走﹐有好多野佢都未攝到個身埋去就已經無得睇。但係入面好局好熱﹐我呢D無EQ嘅人真係頂唔到幾耐就會同人嗌交架喇。但係我答應口水禧第時閑日我再帶佢去過﹐重可以夜晚去順便用望遠鏡睇星添。

對太空好好奇嘅口水禧去到精品店點都要執樣野走。嘩﹐D野都唔算好平﹐閑閑哋都要幾十蚊一件貨仔﹐出面賣嘅差唔多反而平好多喎。所以左揀右揀﹐口水禧揀咗佢好鍾意嘅地球模型。都好﹐買個地球有用﹐事關佢一日到黑都問點解我哋而家係天光﹐婆婆嗰邊就係天黑嘅呢﹖我試過用個燈罩解比佢聽﹐點知佢以後就叫我房入面個燈罩做地球(因為個燈罩插喺個座上面有D似地球儀)﹐試過同佢老豆講「爸﹐個地球放歪咗呀﹗」個老豆R爆頭都唔知個地球喺邊﹐最後要口水禧指住個燈罩﹐佢老豆都係一頭霧水咁望住個燈罩。

呢個地球儀仔size o岩o岩好﹐又可以360度咁轉﹐口水禧好鍾意佢﹐重問呢個住邊嗰個住邊﹐要我喺個地球上面指比佢睇。至於佢成日問嘅點解見到太陽同月亮嘅問題亦都可以用個地球加個電筒同埋梨解比佢知喇。我已經掉底個書包好耐﹐其實個示範係咪o岩都唔係好肯定。不過係嗰日喺場館見到有個月球轉嘅模型﹐諗返起少少學過嘅野喇。有無教錯咗呀﹖有無geography/physic/science人喺度呀﹖