做好心理準備

開咗學半個月至今﹐有兩個同學退咗學。其中一個同學嘅媽媽話覺得學校唔適合佢個小朋友﹐所以要轉校。今日再收到另外一個同學嘅媽媽電郵話返埋呢個禮拜五就唔會再返。其實第一個同學話退學嘅時候﹐我已經同禧爸講話第二個嗰個同學可能好快都會跟埋一齊走人﹐其中一個原因係嗰兩個媽媽私底下係朋友嚟嘅。通常都會因為個朋友走而走埋一份架喇。

其中一個媽媽就係我哋嘅班代表﹐而另外嗰個就係負責財政嘅。佢哋嘅小朋友喺班入面係其中兩個好容易就郁手互片嘅小朋友﹐初初都無為意﹐後來發現點解佢哋成日都係打對方嘅時候尤其起勁﹐好始平時都有打開嗰隻。再後來先留意到兩個小朋友嘅媽咪係識得嘅。唔怪之得兩個細路打對方嗰陣咁熟手喇﹗

初初見佢哋打親交嘅是候我重心諗﹕「嘩﹗一定要叫口水禧小心唔好招惹佢哋﹐唔係嘅話真係比佢哋兩個打到豬頭

咁返屋企都似﹗」

其實想講嘅唔係關於佢哋兩個小朋友打交嘅野。我想講嘅係如果呢度有家長想送小朋友去Co-operative 學校嘅話﹐就真係要諗清楚自己有無時間去學校幫手。雖然話係一個禮拜一次﹐每次兩個幾鐘﹐不過重未計D返學以外每個家長要負責嘅職務。例如我最近先發現原來做Staff Assistant並唔係我想象中咁得閑。差唔多倒垃圾都關我事(事實上我係要倒垃圾同洗廁所嘅

)﹐重有要協助老師同埋其他學校謹有嘅職員做野。總之就係大打雜一個﹐老師唔得閑做嘅野就係我要做嘅野﹐好似我今日重要整埋廁所個水箱沖唔到廁嘅問題添﹗我唔單止係Co-op嗰日先要做野﹐平時都要幫手做。總之學校一日未執笠口水禧未讀完﹐我都要做。當然﹐我係無人工逗嘅。

係咪覺得有D揾笨呢﹖

老實講句﹐我就無咁樣覺得勒真係。其實學校嘅學費真係好平﹐有好多preschool嘅小朋友返緊一樣時間嘅學﹐但係要交多過我哋幾倍嘅學費﹐當然﹐換取嘅係家長唔洗點理﹐淨係掉低個細路喺學校拍下羅友就鬆人嘅快感。喺Co-Operative學校係無「得閑」兩個字嘅(隨咗D細路)﹐就算最唔投入嘅家長都要做野。不過當然有D好有心機嘅家長會真係好有耐性咁同D小朋友玩﹑教佢哋玩同埋執頭執尾喇。其實真係睇下你對自己係唔係學校嘅一份子咁睇﹐當你覺得學校嘅野都係你嘅野嘅時候﹐你就自然會上咗身咁乜都願意幫手做。相反嘅話﹐有D人可能就會覺得係一種折磨同被揾笨嘅感覺。

其實我係唔知點解嗰兩個同學突然唔讀。我都只係估估下﹐可能係兩位媽媽負責嘅職務超出佢哋想象中嘅煩重﹔又或者佢哋唔鍾意小朋友喺學校淨係玩而唔洗坐定定學野啩。

雖然有兩個同學退咗學﹐亦都唔知重會唔會陸續有人走﹐不過我仍然覺得送口水禧去呢度返學係絕對無錯嘅決定。揀學校﹐我睇老師唔睇名氣﹔睇自己小朋友反應唔睇其他人嘅口碑﹔從來都唔覺得返學係要坐定定寫字讀書先叫返學同埋學到野。玩都可以學野(其實喺我哋大人眼中就叫做玩﹐喺小朋友眼中可能佢哋覺得自己係做緊野架喎﹗)﹐不過唔同嘅只係學到嘅野未必同寫一隻字出嚟咁明顯啫。睇家長點為「學到野」作定論喇。

***************************************************************

呢排熱到爆炸﹐室外活動除咗游水之外都要暫停。去書局打書釘係一個幾好嘅節目。大人細路都o岩玩﹐重要有免費冷氣涼嗰下爽吖嘛﹗

帶口水禧去書局﹐佢會自己揀書嚟揭同望(無錯﹐係揭同望下唔係睇)

。佢比較鍾意攞有卡通人物嘅畫冊嚟睇﹐攞D唔知寫乜嘅書嚟望同揭。有卡通人物嗰D可以睇耐D﹐其他就快揭。印象中唔多有讀過書比佢聽﹐因為佢聽兩頁就會伸手嚟同我快揭﹐飛頁飛到顛。所以好多時都唔係逐行讀﹐而係要跟佢揭到邊就指下D圖畫講下有乜咁架啫。跟住佢就會引發一大堆同嗰本書無關係嘅問題嚟問﹐餘下嘅時間就係解答佢D問題囉。所以好少有本書係可以由頭讀到尾架。

如果你問我咁樣睇書法點會學識睇字呀﹖係呀﹐真係唔識睇架﹐不過唔係問題吖﹐呢個年紀識唔識字唔係最重要﹐應該係比佢知道睇書係幾咁過癮先至最重要﹗如果唔想睇字﹐可以淨睇圖畫。一樣可以滿足小朋友嘅求知欲。尋日我睇咗兩本比小朋友睇嘅書﹐關於太空嘅知識﹐家下我唔洗再驚比佢考我點解有地球點解有太空點解呢樣嗰樣喇﹐哈哈﹗叫做知少少頂得下咁喇﹗當然喇﹐你問到諾貝爾獎嗰D咁深嘅話﹐我梗係得個O喺口喇。夠頂一個三歲幾嘅咪算喇﹐係咪﹖

而家盡量刮D時間出嚟同佢玩下D玩具﹐一來同佢解下悶﹐增進下感情﹔二來等佢喺我亂咁玩嘅薰陶之下啟發下佢嘅創意喇﹐乜都玩下搞下先會有創意架嘛﹗

(呢個video唔該調細聲睇﹐有個街市婆好大聲嗌呀﹗)