有仇不報非君子﹖

我好多謝回應嘅blog友咁熱心﹐若然大家約埋一齊去一人中嗰個蛋散一拳﹐我諗佢要瞓醫院瞓到下年都未出得嚟﹗但係我可以做嘅就只係打電話去投訴咁多架咋﹐你叫我再日日追電話去睇下間公司係咪真係會警告佢﹐我諗我有咁嘅時間都唔會有人講真話我知喇。寫信去政府度投訴重衰﹐我屋企門前個坑渠窿﹐我住咗呢度七年喇﹐不知投訴咗幾多次話有樹葉同泥塞住個窿﹐搞到落親雨我屋企門前好似條河咁﹐隔離屋又唔掃D葉﹐掃街車淨係識一尾係咁掃D垃圾入去﹐而家個坑渠窿不單止係比D泥沙塞實晒嘅﹐重要有棵野生到半個口水禧咁高添﹗問你死未﹗就去市政府個網業投訴又試過﹐打電話去又試過﹐影埋相親身攞去都試過﹐但係係唔會有人理你架。就算應承話會派人嚟都係吹水呃人架咋﹐最多都係揾幾件蛋散嚟左望望右望望﹐跟住就鬆人架喇。試過一次真係有人嚟通﹐係因為嗰陣我有個鄰居識得人喺市政府入面做﹐咁我個鄰居因為都有份遭央﹐佢同佢個朋友呻開﹐個朋友返工嗰陣就真係揾咗人嚟係咁以通過下喇﹐唔洗幾日又塞返喇。而家個鄰居都搬走咗幾年﹐嗰個坑渠窿咪又係用嚟繁殖野草囉。你話政府有咩用﹖我試過自己想通﹐但係D泥實到我成個人跳起都隊唔到支掃把棍入去﹐試問有邊個會理你個丁屎坑渠窿吖﹗

嗰日同間公司對話嘅時候我要求佢個員工同我道歉﹐我要間公司出email比我﹐但係嗰個人話佢哋只會要求個員工同公司道歉﹐當我正想話﹕做乜同公司道歉﹖家下比人鬧嗰個係我喎﹐嗰個人已經即可駁我話佢代表間個員工同我道歉﹐兼且保證一定會開會傾同埋要嗰個員工簽野收警告信﹐嗰個人重問我”Are you Ok with that?”D語氣好似係「喂﹐家陣我都代表佢同你道咗歉喇﹐又保證會警告個員工咯﹐你重想點啫﹖公司信就無架喇﹐條氣順唔順就隨便你喇下﹗」就算我再日日打去又會有邊個理我吖﹖就算真係有封信寄嚟﹐都唔知係是但亂咁寫話警告咗個員工定係真有其事喇。不過咪lur到封信之前要同嗰個接電話嘅人炒一獲甘同雄辯一大輪囉﹐咁咪又係辛苦自己﹗唉﹗我喺度住咗十年喇﹐不知同幾多人嘈過﹐最後都係得個吉同自己嬲一大餐﹐我覺得好戇居同無謂﹐嬲完人哋又唔會少忽肉嘅。如果有時間﹐我第日講D經典D嘅經驗﹐你哋就會覺得尋日嗰件事真係好小事﹐嬲一陣就完架喇。

喺呢度﹐我唔相信我唔識嘅人﹐即使對方話會保密我嘅資料﹐但係你唔會知道佢係真定假。我有仔有老公﹐我唔想嗰個人從唔知咩途徑知道我地址嚟找我晦氣﹐大家當日就地當面嘈就無問題﹐嘈完咪拍下羅友走囉。但係比佢知道我住邊嘅話﹐你唔會知道佢呢種人會唔會比人炒咗顛起上嚟去我屋企放火或者攞槍fare我架。唔係我誇張嚇你﹐呢度周不時都有槍擊案架喇﹐學校有﹐喺街行行下無喇喇比個三唔識七嘅揸車經過嘅fare瓜都大把﹐我唔想連累我老公同個仔一齊賴野呀﹗

所以我聽到間公司條茂利同我道咗歉我就算喇。我奈得佢哋咩何﹖西片嘅正義之士喺真實嘅世界裡面你估真係周街都係﹐sorry﹐真係唔多囉。

當你身邊有大又有細﹐有老又有嫩嘅時候﹐你係要顧慮多D野﹐係無得型架喇﹗我無做君子好耐喇﹗