如果地球可以再轉慢少少

大家都知地球自轉一圈就係我哋嘅一日﹐即係廿四小時﹐圍住太陽轉一圈就係我哋嘅一年喇。原來有D星球圍住太陽轉一圈要幾廿年架喎﹗嘩﹗真係﹐轉多兩圈﹐我都摺埋咗喇﹗

唉﹗又講咗去邊呀大姐﹗

呢幾日都無時間寫blog﹐所以我話如果地球可以轉慢少少就好喇﹐咁我哋就可以有多D時間喇﹗(我諗我已經黐咗線喇……)而家口水禧一個星期返三日學﹐重要係隔日返﹐理應好過summer camp嗰陣連續返三日咁辛苦架嘛。何解好似都係唔夠時間咁架呢﹖我都唔知喎。總之放學返嚟就her her聲咁趕住食野﹑沖涼﹑瞓晏覺。佢瞓咗我就做家務囉﹐以前都叫做有得喺梳化暈低粒幾兩粒鐘﹐家下都無咁嘅時間比我暈喇。除非真係自己都控制唔到暈咗就有﹗(如果係嘅話﹐都應該被送去醫院喇﹗)可能有人會話有無咁多野做呀你﹖車﹗呃你做乜啫﹐我話有就有喇。其實我已經開始唔知呢篇野想講乜喇……淨係寫我呢幾日同口水禧做咗D乜喇﹐如果唔係重有乜野好講。

學校呢排好多野比我做﹐嚟緊嘅星期六要返學﹐係比D平時無機會嚟學校睇仔/女返學嘅家長嚟睇下佢哋D仔女上堂嘅情況。所以到時會每個家庭影張合照﹐我就要負責整晒全班嘅相架。一共整十五個。對於精於整呢D手作嘅人又有美術天份嘅人嚟講真係一份優差﹐不過對於我呢D無乜呢隻細胞嘅人嚟講就麻麻哋喇。上個禮拜我已經試整咗一個嚟睇下﹐自己就覺得算係咁喇﹐都真係整到咁架咋大佬﹐盡架喇我﹗靚唔靚就見人見智喇喂﹗

星期六返完學﹐星期日就要返學校幫手大掃除﹐每個家庭每年要供獻兩次大掃除嘅時間﹐每次大約要做四個鐘頭。好彩下個星期一唔洗返學﹐如果唔係﹐我驚我真係要食大力菜先起到身喇﹗

係咪覺得我有D攞苦嚟辛呢﹖報間咁嘅學校盞自己做到嘔白泡﹗都係嗰句喇﹐有收獲就要有付出架喇﹐邊有咁多著數周街攤喺度等你攞吖﹗做野啫﹐OK嘅我。最多咪做完返屋企攤C﹗

不過我最近真係有個疑問﹐遲D學校會有個叫rap session嘅時間比家長圍埋傾下計﹐我想攞出嚟傾。我個問題就係而家我哋班男仔嘅數目比女仔真係多好多﹐得兩個女仔﹐但就有十幾個男仔﹐重要十幾個男仔入面有幾個係特別難照顧嘅添﹐所以去co-op嗰日簡直係攞我命咁濟﹗嗰幾個真係我見過嘅小男孩之中嘅極品﹐自問如果是但一個係我嘅仔﹐我應該會短幾年命﹐因為會提早爆晒我D血管﹗

除咗搶野同打交鬧交呢D濕碎野﹐我最最最驚就係佢哋嗰種聲犀力竭﹐擘盡喉嚨大喊大尖叫嘅殺手鐧﹗有D重會亂咁打人或者撼自己個頭落地添。面對咁樣嘅小朋友﹐我真係R晒頭唔知應該點樣配合佢做我應該做嘅反應……除咗將我個嘴有咁「O」整咁「O」之外……

通常呢種失咗常嘅小朋友係唔會聽任何人講野嘅﹐佢哋只會竭盡所能咁大聲喊同亂咁跳亂咁彈﹐捉都捉唔到佢哋。如果係自己嘅仔﹐當然好易辦喇﹐dick佢出去慢慢泡製佢。喊吖拿﹗叫吖拿﹗打人吖拿﹗

但係好可惜﹐嗰個並唔係我個仔嘅時候﹐我都唔知點算好。

有時老師得閑嘅時候就梗係去同老師嗌救命﹐等佢嚟搞掂個細路喇﹔但好多時係老師自己都搞緊一個極品嘅時候﹐就唯有co-op嘅家長自己諗掂佢喇。有時真係要合幾個人嘅力量先搞得掂一個﹐氹完佢我都筋疲力盡﹐氣都未抖順又到第二個嚟料。一係就又係頭先嗰個唔知又同邊個同學爭野又嚟過發顛﹐真係佢顛時我重想顛﹐真係想大聲喝佢一野﹗(當然﹐想啫﹐邊敢吖﹗)

試過有一次個個小朋友都去咗circle time﹐淨返一個喺出面玩唔肯入課室。我叫極佢都唔肯入﹐係咁NO我﹐重要雙眼睥住我﹐我真係好慶呀當時﹐嗰日好Q熱呀﹐成九十幾度華氏(三十幾度攝氏)﹐嗰個細路竟然同我圍住個沙池跑﹐條路重要有斜路嗰隻﹐跑咗兩個圈我真係火都上晒頭殼頂﹐只好大聲講咗句I want you to go inside RIGHT NOW!哈﹗你以為佢會驚呀﹖梗係唔驚喇﹐咪又係NO一句咁應我囉。你話我D火係咪想噴出嚟咁濟﹗心裡面就已經鬧到七彩﹐嘴就梗係唔鬧得佢喇﹐我無辦法呀﹐唯有同佢講「我唔追喇﹐我直情入返去兼鎖門呀﹐Bye bye!」心諗：「你個死仔包重唔入嚟﹗」點知﹐佢真係唔入嚟。唉﹗天呀﹗佢唔入即係我要繼續陪佢喺出面BBQ自己喇﹗我無搽防曬呀大哥﹗

後來搞咗一輪﹐佢自己死死地氣入返嚟﹐但我已經熱死咁濟。你話我係咪好想拉佢埋一邊中佢幾野吖﹗入到嚟又唔坐低喎﹐重要嬲爆爆咁坐去第二度。我都費事睬佢﹐我即刻坐去口水禧隔離唔Q理嗰個衰仔包。點知佢坐坐下走咗去第二度﹐搞到我又要走去捉佢返嚟。好彩嗰日有得做下畫劇﹐個細路比我氹咗去做其中一個角色我先可以抖一抖唔洗四圍咁捉佢咋﹗

或者你會覺得好奇怪﹐點解唔係老師管學生架呢﹖其實呢種學校係老師同家長都要管學生嘅﹐老師做緊circle time嘅時候就要靠co-op嘅家長幫手維持秩序。因為老師做做下circle time走咗去捉學生嘅話﹐咁原本坐喺度嘅學生咪有樣學樣亂咁四圍走﹐咁就天下大亂架喇。所以﹐通常在場嘅家長都要管住D細路﹐打交搶野爭玩具或者喪喊﹐我哋都要幫手調停﹐如果唔係﹐其他小朋友要等嗰幾大天王收聲先可以繼續上堂嘅話﹐就真係放學都未開始上堂喇﹗

我真係可有興趣想知呢幾個大帝平時喺屋企係咪都係咁樣架呢﹖一有野唔順佢條氣就發作架呢﹖尋日有一個每日都喊嘅大喊十﹐喺沙池同一個同學有爭執﹐佢突然喺我面前一個插水式插晒成個人落D沙度﹐趴咗喺D沙上面喪喊同喪叫﹐佢雙手同雙腳係嬲到震晒﹐即係佢當時好激動﹐當我扶佢起身嘅時候﹐佢塊面已經變咗粒舔晒花生沙糖嘅糖不甩或者糯米籽咁成面都係沙﹐重要擘盡個喉嚨大喊緊﹐個鼻重有條青鼻涕出出入入﹐喊到七彩重要講野投訴﹐我真係半粒字都聽唔到佢講乜﹐望見佢個糖不甩面真係想笑﹐但係又唔知點算﹐望住佢﹐我真係只有唉唉唉唉唉唉唉唉﹗﹗﹗﹗我除咗可以幫佢洗返乾淨塊面﹐都唔知講D乜好。(只有喺心裡面暗暗恭喜自己﹐好彩佢唔係我個仔啫﹗)

其實咁細嘅年紀洗唔洗郁D就發咁大脾氣呀﹖咁樣發﹐容乜易十歲就爆血管架﹖佢哋嘅媽媽嚟接放學嗰陣都會問下老師佢個仔嗰日有無發顛﹐咁我真係唔明﹐點解明知自己個仔係咁樣﹐個媽媽又唔嚟睇住個仔呢﹖如果係我﹐我會嚟陪佢一段時間﹐起碼要佢習慣咗唔好郁下就發作我先會將佢交比學校。因為我唔想因為我個仔嘅失常﹐搞到其他家長怕咗我個仔。講真﹐我每次co-op﹐當我知道嗰幾個天王有返學嘅話真係好沮喪﹐因為我知道嗰日唔方會有好日子過﹐真係我個仔返學但我會重辛苦過佢﹗

我想知道究竟當呢D小朋友失控嘅時候我應該點做﹔circle time嘅時候如果有邊個搞搞震﹐話都話唔聽﹐老師就會要其中一個家長抱住嗰個細路比佢坐大脾。有個小朋友成日自己走嚟坐我大脾﹐咁都唔緊要﹐但係佢好鍾意坐坐下就揾佢對菠蘿蓋跪喺我小腿條骨上面重要不停咁顏嚟顏去﹐痛到我PK﹗叫極佢都係咁顏我D骨﹐真係想使出招化骨綿掌化咗佢對菠蘿蓋﹗再唔係就扯我D頭髮﹐整亂我個頭﹐我至憎就係人哋整亂我個頭架喇﹐試過一次直情將我個頭箍扯咗出嚟﹐搞到我個頭好似D欽犯咁嘅髮型﹐你話我係咪好想一掌推開佢吖﹗

重有就係佢可能見我同佢都係中國人﹐所以佢有時會當咗我係佢呀媽咁樣哄佢塊面埋我塊面度﹐我最驚口水禧見到呢個情境﹐唔知佢會唔會以為呀媽唔錫佢走咗去錫第二個小朋友。但我又唔可以好厭惡咁拒絕個小朋友咁做﹐唯有呃佢話我有傷風﹐叫佢唔好哄咁埋我費事傳染佢喇﹗

重有一個男仔把聲尖到長期可以維持住一把海豚音嘅聲線不停講野。如果佢喪喊或者喪叫嘅話﹐企喺隔離真係除時會失聰﹗

所以每次放學返到屋企我都散晒咁款﹐重要做學校D野。所以個blog嘅街數已經層層疊﹐疊到想還到還唔清﹐唔係我串呀﹐係無時間咋下﹗

無時間又打到呢篇野咁長﹖係囉﹐無架喇﹐聽日要同班細路去field trip﹐睇怕都係好似中咗化骨綿掌咁返嚟架喇﹐唔知幾時先再寫喇……除非一日有48小時比我。