學校旅行

又話今日去完field trip會好似中咗化骨綿掌﹖化骨綿掌今日就無中﹐不過做咗奴隸獸就係真嘅。已經N年無去過學校旅行嘅我﹐今日陪同從來無去過學校旅行嘅口水禧參加學校搞嘅Pumpkin Patch Field Trip (南瓜園觀光遊)。目的地喺學校附近嘅一個種植粟米﹑南瓜﹑重有唔知乜野菜嘅農田﹐由學校行路去只需大概十五分鐘。帶埋成揪細路就大約三十分鐘。

由於我哋兩母子每日都返「例遲」嘅﹐所以今日為免去到學校人哋走晒﹐今朝真係催到口水禧裙拉褲甩咁濟﹐可彩返到去都重趕得切第一個circle time。至於點解會例遲呢﹐真係唔識解釋﹐返9:15am﹐我已經係朝早7:30am起身開始準備早餐﹐有時重會早少少添。但係都係遲遲遲……由於我哋班人數比較少﹐本來每日都會有個叫e-parent嘅家長棟喺學校隨時standby﹐萬一有co-op家長返唔到學校做野就會由當日嘅e-parent替更。但係人太少﹐都好難編排到人做﹐於是老師好大膽咁派埋呢份工我做。每日要返去幫手set up野﹐所以我話老師真係大膽﹐竟然揾個無日準時嘅人嚟做呢個位﹗唉﹐頂硬上喇﹐盡力而為喇﹐盡趕喇我。

其實我係下晝班嘅材料嚟嘅﹐返上晝班真係……而家我揾到一個好方法令自己唔會一晚醒幾次﹐搞到第二朝好似無瞓過咁。好似前晚咁﹐我十二點瞓﹐結果一點半醒一次﹑三四點又醒一次﹑臨天光又醒一次﹐唔知重以為自己變返BB要飲夜奶呀﹗雖然都唔係一個好正常嘅方法﹐但真係用咗唔會半夜再係咁隔一陣又醒喎。個方法就係我盡量等到自己眼瞓到眼都擘唔開嘅時候即刻瞓﹐咁我就會瞓得好D﹐唔會再隔一兩個鐘又醒﹐醒咗又瞓唔返。一覺瞓到天光先起身。不過個代價係未必有足夠嘅時間瞓覺囉。再調節下喇﹐希望再揾到D更好瞓嘅方法喇。日頭如果頂到嘅話我都唔瞓晏覺﹐費事夜晚鬼咁精神眼光光望天花板。禧婆婆﹑我同埋肥玲都係瞓覺有問題嘅人﹐所以「尋晚瞓得唔好」呢句係我哋嘅寫照。

又講咗去邊呀……

講返今日吖嘛﹗朝早做完circle time﹐我哋就出發向南瓜農場出發喇。因為要過幾條馬路﹐我哋D小朋友有幾活躍應該好清楚喇﹐所以學校要佢哋坐晒喺呢D手拉車入面﹐由幾個奴隸獸拉住D少爺仔同小姐步行去目的地。其實點解唔叫D呀媽直接揸車送個細路喺嗰樹集合呢﹖

其實叫班細路自己行可能無咁辛苦。不過驚唔知邊個矜貴得濟行行下要抱就大件事。所以雖然拉車都不見得我哋D大人會有幾舒服﹐不過好過手抱喇﹐係咪﹖

口水禧前面嗰個同學好鍾意黐住口水禧﹐所以連坐車都要口水禧同佢坐埋同一架。不過由於禧哥大份咗少少﹐後面嗰位同學開頭成日鬧口水禧好坐住佢隻腳﹐口水禧又係衰嘅﹐直情當後面無人咁越坐越迫向後面﹐所以個小朋友好唔老嚟咁係咁推開口水禧個羅友。呢個情境真係想叫口水禧落車行﹐唔洗煩﹐但係個個都坐車﹐得佢一個行佢又點會肯吖﹗再講﹐一個落車﹐其他睇到即刻有樣學樣個個跳車就真係大件事。所以唯有叫口水禧坐前少少﹐咪坐住人哋對腳囉。

去嗰程係另一個家長負責拉﹐所以回程就輪到我拉。行咗一陣就到達個農場﹐其實成日揸車都有經過﹐不過唔知會開放比小朋友入去玩。聽老師講呢達地嘅主人喺18XX年已經開始喺呢度耕田種野﹐達地位於一個市中心嘅位置﹐一直都有好多地產發展商向達地嘅主人出價買地﹐但係個主人都不為所動﹐堅持要保住呢塊農地﹐有時我都好服呢種人﹐佢有堅持嘅理由﹐唔係見錢就開眼嘅嗰種人。佢話希望呢個地方保留一塊農地﹐等小朋友可以睇到農場係點樣經營嘅。其實我諗個主人都賺夠喇﹐做乜重要咁辛苦搞達地嚟種野呢﹖咪都係想堅持要小朋友繼續有得接觸農場嘅呢個理念囉﹗Salute!

每年萬聖節前幾個禮拜﹐去邊到都會見到周街大大小小擺滿南瓜。重會有南瓜重量比賽架添。唔講你唔知﹐有D南瓜唔知食咗乜﹐可以大到有口水禧踎喺度嘅身高咁大﹗你話比攞返屋企真係要食成年先食得晒……如果唔發霉嘅話……

擺到咁就預咗比D小朋友玩架喇﹐不過當然喇﹐都要叫佢哋唔好糟躂D南瓜喇﹐話晒都係食物嚟嘅。我有時萬聖節嘅時候見D鄰居屋企門口擺幾多南瓜﹐都唔知擺完過咗節﹐佢哋究竟食唔食得晒﹗

農場主人重安排咗我哋坐呢D車兜入去農田度參觀。等小朋友睇下平時粟米就食得多喇﹐點種出嚟架呢﹖臨開車前負責人再三提點我哋千其唔好伸手去拉人哋D粟米﹐一來D葉會整損手﹐二來個個都拉一拉嘅話﹐咁棵粟米就同超市入面比人搞到體無完膚嘅粟米咁架喇﹗

呢D車始終都係男仔嘅「飛佛」﹗口水禧睇得Cars多﹐見到呢種車識大嗌Tractor呀﹗

好彩面前嘅佢都算係鎮定﹐無話興奮開心到手舞足蹈﹐呢一車都係平時喺學校算係靜少少嘅學生﹐所以無發生過流淚事件。沿路見到粟米就指比口水禧睇﹐佢好鍾意食粟米架(好彩唔係濕米啫﹗)其實我鍾意帶佢去睇實物重好過睇書﹐實物夠立體又實在﹐而且成棵野比佢睇到D粟米係點生出嚟嘅。莫講話佢吖﹐就算我咁大個都唔知粟米係點生架﹗

擴濶眼界﹐由行萬里路開始……

農場主人重用禾乾草整咗D隧道咁嘅物體比我哋捐。入面重吊咗D萬聖節嘅裝飾。口水禧見到都不知幾開心﹐完全無驚過喎﹗見到隻蜘蛛﹐我諗起早幾個禮拜老師唔知喺邊樹捉咗隻蜘蛛養咗喺個盤度﹐盤裡面有D沙﹐有棵假樹比隻野爬。老師想D小朋友親眼睇住隻蜘蛛織網同點樣行。雖然我好驚呢D蛇蟲鼠蟻﹐但係當我睇到隻蜘蛛喺度織網同行嘅時候又覺得幾新奇喎﹐你話真係有幾河會見到呢D野吖﹖見到蜘蛛梗係第一時間拍瓜佢喇﹗理得佢點織網吖﹗但係你有無諗過點解蜘蛛咁犀利會織嚟織去都織同一個圖案嘅網架呢﹖又唔會漏針﹐風吹雨打都未必打得甩個網﹐重要有時可以織好大個網架喎﹐究竟係點織架呢﹖

呢D看似平常到無人會留意嘅野其實有科學家研究緊架喇。想問下有無人覺得研究一隻野點織網好無聊呀﹖係咪就係因為呢D同爭派位爭成績無直接關係﹐所以我細個學校無教呢﹖

穿過隧道﹐我哋就會進入粟米園喇。

右手邊嗰舊野就係粟米。一支幹上面可以有幾條粟米。

口水禧行行下失重心﹐一個羅友坐落D粟米度﹐成棵野即時倒地。比口水禧壓到唔識彈返上嚟。之所以個農場醒目要收定入場費先囉。

藐視同呀媽合照嘅口水禧喺樹望緊其他新奇有趣嘅野。

口水禧舊年已經識pumpkin呢個字﹐因為喺超市門外同南瓜影過相。望落佢個頭都成個pumpkin咁﹗唔怪之得見到D同類咁開心喇﹗

農場嘅一二角養咗一隻牛同三隻羊。口水禧坐車見到嗰陣已經不停話等陣要去睇羊。所以趁無乜人嘅時候就帶咗佢去睇下喇﹐話晒都未見過吖嘛﹐其實我又何嘗唔係第一次咁近距離望吖﹗所以我都好興奮呀﹗

第一次摸牛角﹐嘩﹗真係好硬架﹗重有隻牛真係好大力﹐輕輕一推真係手都比佢推到連個人都向後退。老師話有角嘅動物都好鐘意撼頭埋欄﹐所以D小朋友都唔可以企咁近﹐如果唔係比對牛角隊一野都幾大獲﹗

雖然口水禧成日都話要睇羊﹐但可惜嗰三隻羊喺莫明興奮到震﹐邊向住動物欄跑跳邊大叫羊呀羊呀﹗嘅時候﹐D羊即刻散水﹐有咁遠退咁遠﹐避開呢個朝住自己方向衝緊埋嚟嘅顛佬﹐之後一路都縮喺角落頭唔敢上前。

口水禧問我點解D羊走開﹐我開佢玩笑話D羊聞到佢D臭狐所以散開晒﹐口水禧好認真咁對住D羊話﹕「喂﹗我有沖涼架﹐唔臭架﹗」但係當然喇﹐D羊又點會理你有無沖涼吖﹐最怕係你想BBQ佢哋架啫﹗

場地裡面擺放咗剷泥手推車比小朋友玩運送南瓜﹐不過D車好重﹐D細路都唔係咁容易推得郁。變相係大人推住坐喺車裡面嘅小朋友行。我負責影相喇梗係﹐留返D力一陣回程嗰陣慌我無得推餐飽咩﹗

睇下口水禧身後嘅媽媽推得幾咁想嘔白泡﹗車入面嗰個係佢自己嘅仔添呀﹐個媽媽都推到面容扭曲咁嘅面口﹐試想想如果推住成車天王﹐你話係咪好想自殺呢﹗

其實南瓜唔係淨係橙色同綠色架﹐重有白色同黃色。我估裡面D肉應該都係橙黃色啩﹖我淨係知南瓜皮好硬﹐上次批個南瓜嗰陣﹐幾乎比把菜刀切斷隻食指咁濟﹐搞咗兩個禮拜個傷口先唔痛﹗

臨走每個小朋友可以帶走一個南瓜﹐你睇口水禧個樣﹗

重呀呢﹗

幾經辛苦﹐終於舉得起喇﹗

即係咁﹐回程係我呢隻奴隸獸負責拉一車三仔加南瓜。有個同學帶走兩個西瓜咁大嘅南瓜﹐加埋三個仔﹐重唔拉到我斷氣﹗真係有種比法老王鞭住拉車嘅感覺﹗有D馬路邊個駁重要無斜斜哋比單車輪椅嗰種﹐所以重要成架車抬落馬路度﹐拉完條斜路我已經有就快捽C嘅感覺﹐綠燈過緊馬路之時﹐車上有個仔突然跳車﹐我架野又咁岩kick住D石屎﹐於是喺佢跳車﹑我大力﹑擢架車之時﹐幾乎跌咗嗰位人兄落街﹐真係比佢嚇到捽C都即刻醒返咁濟﹗返到學校﹐真係要向個天叩謝神恩﹐大佬﹗我無斷到氣呀﹗重有呼吸呀﹗