學校halloween 派對

其實正式學校嘅Halloween party我哋係無參加嘅﹐嗰日口水禧放咗學食完野返到屋企沖埋涼成三點幾四點先瞓晏覺﹐一路瞓到六點幾先起身﹐趕唔切去。學校嘅車位有限﹐嗰日又落雨﹐無位泊重要泊去隔嚟街﹐落雨C濕著住件costume行返去學校都咪話唔狼狽﹐所以選擇喺屋企包雲吞食。(係﹐食雲吞同萬聖節係無關係嘅﹐純粹係好耐無食﹐口痕整嚟食下架啫。)

不過﹐嗰日要返學﹐老師叫D小朋友著晒佢哋D萬聖節衫去學校慶祝﹐一個二個好搞鬼呀﹐我哋有警察﹑南瓜﹑消防員﹑公主﹑Thomas﹑蜘蛛俠﹑Star War(唔知叫咩角色)等等﹐重有老師悉心打扮過自己﹐將自己打造成一個白雪肥公主一樣﹐而我喇喎……

唔洗點扮﹐日日都係萬聖節裝咁出街示眾架喇﹗

嗰日碰o岩我要co-op﹐重要係負責整茶點食物﹐真係忙到唔得閒周圍影﹐加上唔知係咪張記憶卡壞咗﹐影完一張要等好耐先可以再影第二張﹐真係都無心機影。你知喇﹐D細路一秒上落幾廿個動作﹐邊個會停喺度定格比你影吖﹗所以有時間先貼相出嚟﹐淨係得video咋。(呢排肥玲部電腦跪低咗﹐禧婆婆同公公都無得睇blog﹐係求其咗少少架喇﹗

)

嗰日因為我係snack parent﹐所以可以泊學校車位﹐yes!因為唔想遲到整唔切野食﹐我嗰朝破紀錄六點幾就起咗身

﹐但係都係滾水淥腳咁同口水禧撲返去學校。

叫禧爸嚟睇順便影下相﹐因為嗰日老師會同D小朋友喺室外巡遊﹐點知人哋老豆竟然喺人哋巡完遊先嚟到學校﹐真係……早知應該話比佢知會有好多隔離中學嘅靚女著比肩尼嚟學校巡遊喇﹐咁我肯定人哋老豆晨早六點就去咗學校門口擔定凳仔排頭位喇﹗

好彩﹐喺我極度唔專心整D野食嘅情況之下都影到巡遊嘅video﹐如果唔係禧婆婆點會放過我呀大佬﹗

D細路係咪勁搞笑呢﹖呢個年紀已經唔會再比呀媽老豆老點佢哋著埋D nemo﹑winnie the pooh嗰D衫架喇﹐佢哋會揀D佢哋覺得好勁好型嘅角色嚟扮。口水禧呢排又睇返火車片﹐所以堅持要買嗰塊就咁笠喺個身嘅Thomas野﹐禧婆婆問我嗰陣﹐我好具體表達咗嗰塊野(拿﹐唔係一件呀﹐係一塊野嚟架咋﹗)笠咗落身之後就有D似你喺街見到有D人派傳單重要掛兩塊牌喺自己前面同背脊嗰款造型咁樣囉﹐靚唔靚就見人見智喇﹐著喺佢度又唔係著喺我度……

circle time老師同大家唱咗隻歌叫Looking for a Dracular﹐我又真係估唔到學校會同小朋友講關於吸血彊屍﹑骷顱骨呢D野喎﹐重教埋佢哋手語點做﹐連鬼呢個字嘅手語都有教。如果係我哋以前(可能而家都係)﹐學校唔會教呢D野﹐屋企唔比講呢D野﹐總之唔比提﹐咁就等如我哋唔會識架喇。(幾無知﹗)邊個話唔教就唔會識﹖周街D萬聖節擺設都係呢D野﹐唔通去街嗰陣矇住D細路對眼唔比望呀﹖口水禧都唔知問過幾多次點解萬聖節要擺個骷顱骨喺門口﹖點解會有巫婆﹑乜野係彊屍﹐我可唔可以叫佢唔好問吖﹖

學校有教﹐不過會講比D小朋友知嗰D野係假嘅﹐咁小朋友接觸咗都唔會驚﹐聽咗就算囉。其實越唔講﹐D細路就越想知﹐講咗反而佢哋聽咗就算﹐滿足咗好奇心佢哋自然就轉移目標去玩其他野架喇。

當日茶點我整咗用粗米粉(brown rice flour)做嘅muffin﹐唔洗用奶或牛油﹐淨係用水同橄檻油加埋D muffin mix就得。因為班中有小朋友食咗普通麵粉會疴﹐有個食咗乳類產品會敏感﹐次次茶點都無野食得﹐人哋個個食乳酪食芝士食到lam lam脷﹐嗰D小朋友就淨係得餅(有時連餅都唔食得)﹐生果同水。小朋友點會明白自己唔食得嗰D野嘅原因吖﹐見人哋有得食梗係想食架喇﹐所以真係好慘架﹐望住人哋食自己就無得食﹐我頂唔順喇﹐嗰日走去超市揾咗盒gluten free兼夾無麵粉無奶嘅muffin mix返嚟自己焗﹐加D乾果入去﹐咁就大家都有得食喇﹗其餘三樣野係提子﹑乳酪同芝士﹐咁嗰兩個細路唔食得乳酪同芝士﹐至少都可以食muffin同提子﹐唔洗齋飲水咁慘吖嘛﹗講出嚟唔係想讚自己(都無野好讚)﹐只係覺得既然我係負責整茶點野食﹐咁就應該考慮埋有食物敏感嗰D小朋友喇﹐你諗下如果嗰個係我個仔﹐人人食緊野嗰陣﹐佢就坐喺度得個睇字﹐係咪好殘忍先﹖上兩個星期六我哋要返學﹐嗰日老師話係整薄餅﹐不過就用D 鬆餅做底﹐放D芝士同蕃茄上面去焗。有個小朋友喺檯前猛望實D焗好咗嘅鬆餅﹐佢猛話好想食﹐好肚餓。但佢係唔食得麵粉嘅﹐所以無比佢食。佢都算係咁﹐無話伸手去夾硬搶﹐淨係望住猛話想食。嗰一刻我企喺佢隔離﹐見到個細路又渴望又失望咁望住D鬆餅﹐細細聲求大家比佢食﹐真係慘過乜。我心諗﹕「細路﹐唔洗驚﹐星期五我整茶點一定預埋你嗰份﹐如果唔係﹐我正契妹﹗我話嘅﹗」結果﹐梗係唔洗做契妹喇﹗

嗰兩個細路嘅呀媽知道D muffin佢哋個仔可以食好開心﹐拿﹗咁又做咗件好事囉﹐爽﹗

放學之前﹐老師要早走﹐因為佢個仔都有halloween parade﹐佢要去個仔學校睇﹐所以交低野就走咗。放學嘅時候﹐co-op家長詐詐第第一個二個鬆人﹐留低我洗廁所拖地抹檯兼吸塵。

佢哋11:45走晒﹐我﹖12﹕30先走囉。下晝班D co-op家長問我係咪想做晒先走﹐拿拿臨劈比佢哋我都走喇。我諗佢哋梗係心諗﹕「呢個人咁戇居都有架﹖一個人做晒﹐唔通想自殺﹖

」

係呀﹐你就當我係一個「自殺式co-op媽媽」喇﹐有D野﹐過到人但過唔到我自己﹐我寧願做「自殺式嘅人類」﹐心安理得﹐我數學唔合格﹐無謂斤斤計較喇。