Halloween

自從halloween學校派對之後﹐我哋兩母子又喺學校「收咗大禮返屋企」﹐兩條友你食藥呀我食藥﹐爭在未攞D藥嚟猜枚架咋﹗細路由開始返學之後﹐就係我哋做家長「收禮」之時﹐個個月都收﹐每兩個星期都總有一日要白交學費幫補學校開支﹐家下每次返學都係抱住明知山有虎﹐偏向虎山行嘅心態去返囉﹐唔通為咗驚比人傳染就鎖住口水禧喺屋企咩﹖無架喇﹐有同學咳呀﹖超﹗口水禧都咳喇﹔有人流鼻水呀﹖車﹗口水禧都有貨喎﹗重加埋耳仔因為有鼻水倒流而有少少發炎添﹐真係睇下邊個D菌惡D吖拿﹗(傻喇﹐講下笑啫﹐我有無咁無公德心呀﹐個仔病重推佢返學去播菌﹗)星期一就真係無返學﹐星期三好返好多﹐咁咪一大一細去返學囉。嗰日有幾個同學都無返﹐睇嚟o聽日學校D菌又係一番龍爭虎鬥﹐睇下邊個頂唔順先﹗算喇﹐或者真係咁樣去學校食下菌﹐我哋先會更加強壯﹐正所謂遇強越強吖嘛﹗

幾日無開工﹐我已經唔知由邊度開始寫起好喇。其實重有成堆saturday school嘅相都未整﹐隔離班已經整好咗D相架﹐連相都曬埋﹐我就……唉﹗

嗰日喺學校巡遊完之後﹐星期六我哋去咗Winnie屋企大食會。口水禧重有支好靚嘅糖同一個好大嘅Thomas汽球收添﹗襯晒佢今年嘅造型﹐重話去mall攞糖嗰陣要帶埋個汽球去添。(唔係呀嘛﹖即係我拎﹗)

今年嘅萬聖節喺正星期日﹐mall嘅trick or treat時間比往年早咗一個鐘頭﹐因為呢間mall逢星期日係閂六點嘅。嗰日原本想帶口水禧去拍鄰居門攞糖﹐不過見佢病病哋﹐費鬼事喺條街逐門逐戶咁行﹐盞食完西北風返屋企病上加病架啫﹗於是就做咗一個更錯嘅决定 — 去mall。

見到嗎﹖墟撼嗎﹖我呢D有人群驚恐症嘅怪物而家好怕見到呢D場面﹗硬係覺得人群中有世紀惡菌喺度周圍散緊貨﹐我一抖氣就會中毒﹗口水禧嘅身高就更加唔洗講喇﹐直情係聞屁嘅身高喇﹐毒上加毒﹗

口水禧係從來都無買過糖食嘅「不幸之中大幸」嘅小朋友﹗你就當我係專制喇﹗自己就食﹐個仔就無得食。個人認為咁細個唔洗急住食﹐第時無皇管嗰陣多多有得佢偷食。所以佢嘅零食到目前為止只有乳酪﹑芝士﹑水果﹑餅乾呢D悶棍野。亦都因為咁樣﹐佢暫時對糖都未算好狂熱住﹐去trick or treat都淨係齋行同睇玩具﹐真正想攞糖嗰個係佢呀媽唔係口水禧。

行咗幾行﹐攞咗D糖﹐有人轉個彎就貢咗入去Disney入面睇玩具。手上嘅糖果籃完全變成道具或者飾物。懶理出面排山倒海嘅人群排隊與唔排隊之間爭住攞糖。呢位少爺就成個富豪咁喺鋪頭入面閒逛﹐睇下呢樣又睇下嗰樣。幾咁不食人間煙火﹗

見有靚女重即刻飛身埋去扮一齊睇野﹐借D意越行越過﹐索性企喺隔離添。嗰一刻﹐我相信佢已經進入咗老豆呀媽係邊個都唔知嘅境界。

睇下﹗D收獲幾咁「豐富」﹗拎咁大個桶嚟把鬼咩﹗

全程嘅相係禧爸影嘅﹐啊﹗而家先知我老公原來鍾意呢隻口味﹗春麗頭﹐我唔識紮架喎﹗

就喺老嘅掛住望春麗﹐細嘅掛住望仙女嘅程況之下﹐我決定打道回府。(呢D咪叫做唔識做人囉﹗)

返到屋企成六點鬆D﹐要準備個trick or treat糖果籃喇。一陣人哋嚟拍門無糖比人嘅話﹐容乜易我門口多幾隻臭雞蛋架﹗口水禧開頭唔知發生乜事﹐淨係識喺度玩糖。將D糖分牌子放入兩個桶仔﹐跟住又倒返出嚟再分顏色﹐如是者倒嚟倒去﹐D朱古力唔散就假﹗睇下佢老豆﹐大爺咁攤喺梳化度重回味緊呀春麗姐姐嘅一顰一笑幾o答糖﹗唔洗去trick or treat都飽晒喇﹗