自私

其實我唔介意去幫手做野﹐但係好介意同練精學懶嘅人一齊做﹐重要當我工人咁點嘅話﹐我就真係好想鬧爆佢﹗

入得嚟呢間學校就要應承每個家庭每年要攞出八個鐘頭嘅時間去學校幫手大掃除﹐學校係無校工嘅﹐我哋唔去做﹐咁D小朋友又點會有個乾淨嘅環境返學呢﹖況且呢排周街都有人病﹐我哋班每日都有幾件返唔到學﹐個個都話呢排有D菌喺度四圍咁傳染﹐作為一個家長﹐盡下責任去清潔下學校﹐你自己嘅仔女都有好處﹐咁就好心唔好偷懶喇﹗唔好諗縮數喇﹗唔想做咪唔好入呢間學校囉﹐又要貪平﹐又唔想付出﹐呢個世界有無咁著數嘅野呀﹗preschool唔一定要讀﹐唔想比成千蚊嘅咪唔好讀囉。想比一百幾十就有得讀呀﹐咁就出D力幫下手做野喇﹗

尋日十二點半就開工﹐大會寫明要做到四點半先可以走人﹐大家做得幾多就幾多﹐咁當然無話一定要每個角落頭一粒塵都唔准有﹐如果唔係就要食咗佢咁嚴謹。不過自己問良心喇﹐自己嘅小朋友都有份用﹐你唔抹乾淨嘅話﹐你估淨係得我個仔要食塵咩﹖你嗰個咪一樣要食﹗車﹗大人懶﹐賴野嗰個咪係小朋友囉﹐係咪先﹖

當人人喺度捽緊野嘅時候﹐其中有D人帶埋呀媽爸﹑老公老婆﹑或者甚至係仔女嚟。其實根本就唔應該帶小朋友嚟﹐周圍都係清潔用品﹐萬一睇漏眼比小朋友攞咗去飲去玩去噴人塊面﹐我都唔知佢呀媽老豆點算﹗況且個個都做緊野﹐周街都係塵呀﹑藥水味呀咁﹐小朋友聞得多真係唔知會唔會high咗﹗本來都唔明點解D父母要咁樣做﹐後尾就明晒。

原來嗰D帶埋屋企人嚟幫手嘅喺度諗縮數﹕每次每個家庭要做四個鐘頭﹐咁佢哋就覺得如果老公老婆﹑呀女呀媽﹑新抱奶奶兩個人嚟呢﹐每人做兩粒鐘加埋就等如四個鐘勒。所以十二點半開工﹐佢哋兩點半就可以拍羅友鬆人。

咁都得架咩﹖咁我下次帶四個人去﹐每人做兩個鐘加埋係八個鐘﹐咁我咪成年唔洗再嚟囉﹗咁如果我哋四條友做足四個鐘﹐咁加埋就係十六個鐘﹐咁我咪連下年都唔洗嚟﹖

呢樣都算﹐就當佢哋真係嗰兩個鐘出盡力咁做﹐都叫做的確係多咗對手做野嘅。

但係其中有兩母女真係唔講由自可﹐一講把幾火﹗當大家做緊野嘅時候﹐佢兩母女就好似巡場監督咁周圍行行企企﹐點解我會知呢﹖因為成日都聽到佢哋D腳步聲囉﹗人人都係揀一個地方跟住就將嗰個位置抹乾淨晒先去做第二個位架喇﹐我都唔明佢兩個做D乜野要走笛得咁頻能﹐行嚟行去。抹野就輕輕抹下﹐正確係“了”下咋﹐無力水可言﹗你話呀婆邊有力捽吖﹖咁就唔好帶呀婆嚟喇﹐我唔係蝦呀婆﹐咁佢真係手腳超慢超求其吖嘛﹐佢做嘅野﹐人哋十五分鐘就做完喇﹐洗鬼做兩個鐘咁耐咩﹖咁佢個女帶呀婆嚟係咪呃鐘先﹖我真係唔想咁樣話佢哋﹐不過呢兩母女唔止係行行企嗰下黑我憎﹐重要專揀D唔洗點抹﹐唔係好污糟嗰D野嚟做。真係污糟嗰D梗係留比其他人做喇。

兩點幾嘅時候﹐呢兩母女就去吸塵﹐人哋講明吸塵抹地係最後先做。人哋重喺度抹緊野﹐掃緊櫃入面D塵出嚟﹐你吸乜Q野塵呀喺度﹗我心諗你咪吸囉﹐一陣都會通地係架喇﹐咁鍾意吸﹐一陣再吸多次喇傻仔﹗

當我喺度抹緊無人想抹嘅雪櫃之時﹐我重清緊裡面D過期野﹐發霉野﹐我將有D放喺裡面嘅樽放喺我身邊一張枱上面﹐然後先抹到個雪櫃裡面架﹐嗰個呀婆走埋嚟叫我攞走D樽﹐因為呢佢要將D凳放上枱﹐佢要抹地。如果佢唔係一個呀婆﹐我就已經問候咗佢﹐黐咗邊條線呀佢﹖睇唔到我抹緊野咩﹖地下又話要抹﹐唔放得野﹐枱又話要放凳﹐我又唔放得野﹐咁我係咪應該攞自己個頭頂住嗰幾個樽﹐然後去抹雪櫃呢﹖呢個死自私精﹐莫講話張枱大到擺晒D凳上去再放埋佢成個人上去都夠位﹐就算真係放唔到凳﹐咁佢係咪唔識用手推開D凳然後抹地﹐跟手再拍返埋D凳吖﹖妖﹗佢中東嗰邊係咪無教呢樣技能呀﹖真係比佢激死﹗我同佢講﹐我抹埋就會放返D野入雪櫃架喇。令返轉頭都費鬼事睬佢。

佢重要一路見我掃雪櫃D垃圾出嚟嗰陣眼睥睥﹐好似我搞到個地下又污糟晒咁﹐咁咪所以人哋叫最後先吸塵抹地咪就係咁解囉﹐STUPID !!!!!到我企咗上凳抹緊雪櫃頂﹐佢又話叫我吸咗地下D垃圾先﹐因為佢要抹嗰度地下。你話係咪真係想大巴車到佢個包頭巾都飛甩咁濟﹗點完我呢樣﹐重叫我吸埋另外一個位﹐頂﹗死八婆﹐見唔見我抹緊野呀﹖佢真係好似老奉咁﹐大姐﹗我唔係你跟班呀﹗我都有比學費架﹐曲街﹗重要叫我收好部吸塵機﹐唔好阻住佢抹地喎。真係火都嚟﹐我唔Q理佢﹐心諗﹐鬼唔望kick鬼死你個死八婆﹗(對唔住﹐我真係好慶﹐我知老人家係要嚟尊重﹐不過呢D人渣﹐我疑得一部吸塵機吸咗佢條頭巾﹐再吸埋佢件黑色袍﹐等佢光脫脫無面見人然後襯地林﹗天呀﹗原諒我咁衰咁樣鬧呀婆﹗)

佢要我做咁多野﹐目的係佢想快D抹完塊地﹐咁佢兩母女就可以鬆人勒。抹完地﹐佢個女唔知重搞緊D乜野﹐呢個呀婆﹐竟然可以翹埋對手喺度睇我做野﹐真係做夠兩粒鐘就停手﹐話之你。

人渣人渣人渣人渣人渣﹗﹗﹗﹗﹗﹗我實投訴你兩母女﹐不知所謂﹗

重有個呀婆﹐見我清緊個雪櫃嗰陣走埋嚟同我講話佢頭先都想抹雪櫃﹐不過唔知應該掉D乜野喎。重話費事掉錯咗比人鬧﹗唉﹗點解世界有咁多豬精﹖佢梗係長期都食自己個雪櫃嘅過期野食到家下變咗低B喇﹗唔知掉乜﹖真係想同佢講﹕「你咁豬咁懶咁怕人哋鬧你掉錯野﹐不如自己瞓埋入去雪櫃喇﹗」(對唔住﹐我口賤﹗但﹐我真係忍唔到﹗﹗﹗)結果﹐我清咗兩包2004年到期嘅腸仔(大佬﹐六年以嚟負責抹雪櫃嗰D人做咩架﹖﹖﹖)﹑幾包過咗期幾個月嘅野﹑執返好亂七八糟嘅野﹐分返類擺返入雪櫃度。睇下聽日返學有無人斬我怪我掉咗佢兩包2004年嘅腸仔吖笨﹗你話個呀婆係咪揾嚟講﹖唔想做就唔想做﹐唔好亂咁o翁當我白痴咁呃吖﹗我寧願佢話無帶老花眼鏡睇唔到D過期日子﹐咁我都信吖﹗呀婆唔係大晒架﹗

有個呀媽一嚟到就同我講I hate doing these things!(我最憎做呢D野架﹗)﹐oh!乜佢覺得有人好鍾意成頭塵﹑成身汗﹑爬高又彎腰﹑掂D污糟野架咩﹖咩呀﹖憎都要做架喇﹐你個仔嚟唔嚟返學吖﹖呢D叫食得鹹魚抵得渴﹐你揀咁樣嘅學校就預咗要負出架喇﹐如果唔係﹐咪比成千蚊揀嗰D全包嘅學校囉﹐咁你咪可以拍下羅友乜都唔洗理囉﹗車﹗

呻完﹗又要繼續整相架﹗(係咪終於知道我原來唔係好人有D﹖)