校園「小型」暴力事件

主角﹕梗係有口水禧份喇+俄羅斯男同學

道具﹕一列每架有我半條手臂兼小腿咁粗嘅木製火車

時間﹕clean up time之前

案發經過﹕當時我同老師做緊野﹐離我大約十幾二十呎嘅口水禧喺度玩緊嗰列火車(有六架野一架跟一架扣住)。突然我背後傳出有男孩大叫”No! No! Stop! Stop please!No!”嘅聲音﹐我令返轉面嘅時候見到俄羅斯同學將口水禧玩緊嘅火車扯甩﹐逐架逐架周圍定﹐跪喺地下嘅口水禧身體衝前推咗俄羅斯同學一野﹐口中重講緊”No!Stop please!”﹐同學仔當然繼續定火車喇。我行埋去嗰陣先停﹐話咗俄羅斯仔兩句叫佢唔好定野﹐會整到其他人﹐佢dup低頭玩佢面前三架火車。於是我咪去睇下都係玩緊火車嘅口水禧囉。佢面前得返三架野﹐諗住佢都無大叫咯﹐各自各玩﹐咁即係無野喇。點知行到埋去﹐佢已經係U型嘴﹐心知不妙﹐問佢係咪痛﹐佢話塊面比火車定親﹐側面近耳仔位紅咗少少。我諗痛就係痛﹐不過傷勢唔嚴重﹐過咗一陣都無晒紅﹐不過我諗佢係比同學嚇親多D。

發現佢食指有達紅色似血嘅野﹐於是我帶佢去到俄羅斯仔面前比佢睇下口水禧隻手指﹐同學仔見到似有血嘅手指加埋口水禧一面眼淚鼻涕個樣已經嚇到呆咗﹐縮埋一舊就快想喊埋一份咁嘅樣﹐呢個時候﹐口水禧話手指上面嗰D唔係血﹐係頭先畫畫high到嘅紅色油﹐咁都無咁驚﹗

話咗俄羅斯仔幾句放走咗佢。口水禧重喊緊。佢話一定要報串比老師聽喎。面前有summer camp教過佢嘅老師﹐但係口水禧點都話要話比班主任知﹐咁佢覺得有需要咪有得佢講囉。咁啱老師行埋嚟﹐我同老師講口水禧話有野要同佢講﹐口水禧唔識講﹐淨係指住D火車同個俄羅斯同學﹐咁我幫佢話比老師知同學仔定火車定到口水禧塊面。於是同學仔比老師話咗幾句﹐跟手老師出去後園叫咗同學仔個呀媽入嚟再話多個同學幾句﹐俄羅斯仔個樣已經好似輸咗馬輸晒股票咁款。此時嘅口水禧已經無喊﹐走咗去玩其他野。

記得以前口水禧未返學嘅時候﹐我成日都擔心佢返學會比人打。嗰陣我成日同禧爸講﹕「邊個夠膽打我個仔﹐我實第二日帶埋麻包袋去笠佢拉佢入廁所打獲甘佢嘆﹗」於是我哋日日教口水禧如果比人打﹐一定要同老師講。重教佢如果人哋打佢﹐記住要擋面﹐千其唔好比人插眼。重有要大聲叫NO同STOP﹐如果對方唔停手重繼續打﹐老師又唔知嘅話﹐咁就……(未受專業訓練嘅小朋友咪學呀…..)就一腳伸開對方然後快閃﹗不過呢招真係要喺必要時候先好用喇。

結果﹐口水禧做咗講NO同STOP同埋同學繼續打嘅時候佢出手推開人。不過反應唔切比火車中咗一野塊面。重有就係要報串。

其實呢篇野唔係想講小朋友有幾好身手或者被人打應該點做。我站在做家長嘅立場﹐重要係我個仔比人片嘅立場﹐我有一D體會。

如果我無親眼睇到事情嘅經過﹐相信喺我接放學嘅時候﹐假如口水禧或者老師講比我知口水禧比人片嘅話﹐我肯定即刻揾對方同佢呀媽對質﹐唔道歉即鬧爆。個個媽媽都會心痛仔女比人打﹐有傷無傷都好﹐都一定慶到七彩。但係﹐當我尋日親眼睇嘅時候﹐好奇怪喎﹐我一D火都無﹐我亦唔嬲個小朋友。點解呢﹖

部份原因係我平時喺學校嘅時間多﹐每一個小朋友嘅特性都有少少了解﹐俄羅斯仔唔係一個難搞嘅小朋友﹐其實佢從來都無打過同學。我相信佢尋日定火車係因為口水禧見佢攞自己玩緊嘅火車嗰陣大聲鬧俄羅斯仔﹐於是對方都嚇咗一嚇﹐繼而發顛亂抽D火車嚟定。即係你識發火﹐我都識發火架。我相信佢未至於咁變態咁暴力會用火車兜口兜面片同學﹐只不過係亂咁定嘅時候唔小心片咗落口水禧塊面度啫。如果係有心定同學﹐口水禧應該已經爆咗鼻骨﹐甩晒門牙喇﹐D火車架架的係用實木做﹐比人正面咁車埋嚟﹐有乜理由會唔爆缸﹖但係口水禧淨係傷咗側面﹐咁應該就唔係兜面定喇。

當我話佢整親口水禧嘅時候﹐俄羅斯仔見到口水禧手指上面疑似血嘅野﹐加埋口水禧喊爆嘅樣﹐對方都驚到呆咗﹐繼而頭dup dup﹐縮埋一舊想喊咁嘅樣。其實小朋友打完人﹐見對方喊嗰陣﹐打人嗰個都會驚﹐如果見埋整損咗人哋嘅話﹐打人嗰個面上都會有知道做錯咗野嘅表情﹐唔敢出聲﹐頭dup dup咁樣。與其鬧到佢喊﹐不如解釋比佢知頭先應該點做﹐定野係好危險嘅事﹐下次唔好再犯。呢個年紀應該聽得明﹐相信小朋友會記住﹐可能都會重蹈覆轍﹐不過我唔信講廿次都唔明啩﹖

由始至終﹐包括佢媽媽入嚟柄佢嗰陣都無同我哋道過歉。呢個係有少少怪﹐如果係我一定會捉個仔去同人哋個仔同埋人哋家長道歉。然後再拉個仔埋一邊柄喇。

其實我心裡面多謝個俄羅斯仔幫口水禧上咗寶貴嘅一課。等口水禧知道搶人玩具有幾黑人憎﹑亂定野有幾危險(之前口水禧都有鋪喺學校亂定野嘅習慣)﹑做錯咗事要道歉(雖然同學無做)﹑比人打要點反應等等。呢D得個講字小朋友係唔會明架﹐唔試過實戰點會知應該點做。不過當然﹐我唔希望個仔日日返學都被人打嚟累積經驗喇﹐不過暫時都無見過佢打人都係一件好事。

所以﹐下次如果你知道自己嘅小朋友比人打﹐千其唔洗覺得好慶﹐覺得老師唔搞大件事﹐其實日日見咁多細路爭野玩打交真係會麻木﹐我自己親眼睇住個仔比人打我都唔嬲﹐你話老師會有幾嬲﹖就當係一個比自己小朋友學野嘅機會。衰D講句﹐家長無可能教自己嘅小朋友點打人﹐但又怕自己嗰個唔識還拖好蝕底。咁當佢哋比人打過之後﹐佢哋就會學識點還手架喇﹐我覺得教佢哋小心塊面唔好比人打係最重要嘅﹐傷到眼你話幾大獲呢﹗

重有就係﹐如果自己嘅小朋友真係打咗人﹐乜野理由都好﹐打人就係錯。道歉囉﹐就算係因為對方搶玩具都好﹐出手打人嗰個就係唔啱囉﹐講句對唔住有幾難﹖搶人野嗰個嘅家長都應該話返自己個仔﹐唔係自己話鍾意就可以一手去搶人哋玩緊嘅野架﹐雖則我哋成日都話要教D細路要分享玩具﹐但係都要尊重人哋想唔想分享同幾時想分享架嘛﹐想玩咪問下人哋可唔可以比你玩﹐或者攞野同人交換﹑講定大家玩幾耐就交換囉﹐唔係一句Share就要即刻投降讓比你玩架嘛﹗