一年一度嘅聖誕節又嚟喇﹐舊年禧爸落重本為咗氹口水禧歡喜嘅聖誕樹亦要再度出場。通常過咗萬聖節之後幾日﹐我哋D鄰居就會陸續搞聖誕佈置﹐喺自己個前園裝晒聖誕燈飾咁。不過我哋無整燈飾喺出面﹐因為而家正值瘋顛落葉之時﹐我哋個前園D樹葉多到可以拍武俠片咁濟﹐真係呢頭掃完﹐嗰頭又成地係﹐好似無掃過一樣﹗成個人咁高嘅垃圾桶都裝唔晒D葉﹐可想而知有幾多葉喇﹗如果D葉會變銀紙嘅話﹐我驚我D錢多過芭菲特﹗
可惜葉只係葉而已……
前日﹐口水禧已經急不及待嗌住要砌聖誕樹。嗰日朝早佢做咗「驅魔人主角」﹐瞓醒覺之後食咗D芝士同飲咗奶﹐跟手又飲水﹐點知就噴返晒D野出嚟﹐重連之前一晚食過嘅麵豉湯入面嘅豆腐都噴埋出嚟﹐無錯﹐係噴唔係嘔﹐真係同套戲個女主角噴野有得揮。最正係佢早唔噴遲唔噴﹐我一喺房行出嚟埋去同佢講野﹐佢一見到我個樣就即刻發射﹐結果佢自己一身都係﹐比佢挨住嘅老豆又成身係﹐最大獲係條梳化嚹都係﹐抹到我都想嘔﹗
好彩touchwood﹐淨係嘔咗嗰一次﹐聽學校D同學呀媽講呢排有D菌﹐好多同學仔都嘔﹐有D重半夜嘔到天光添﹗(嘩﹐真係3D版嘅驅魔人﹗
)所以去到邊都帶住消毒紙巾抹抹抹﹐食肆又幫人抹枱﹐公園又幫人抹凳﹗真係勞碌命呀﹗
E﹖講緊聖誕樹都會講咗去驅魔人嘅﹖
嘔完沖乾淨涼就同佢去咗食晏﹐返到屋企就叫佢去瞓晏覺﹐睇佢嘔完個樣都有D虛脫咁款﹐唔瞓晏覺驚佢未到晚飯時間就要去揾周公。唔食晚飯驚佢半夜肚餓彈起身要食野﹐咁咪大件事﹗所以冒住瞓咗晏覺可能夜晚遲少少瞓﹐第二日未必起到身返學﹐但都要佢去瞓晏覺喇﹐嘔完個人都好辛苦﹐唔叉下電又點得呢﹐係咪﹖
半推半迫之下﹐佢終於上咗床﹐唔夠五分鐘就已經上晒「釣魚臺」喇﹗
就喺佢瞓緊覺嘅時候﹐佢二十四孝老豆梗係即刻攞返D聖誕樹手手腳腳﹐裝飾物出嚟準備一陣大少起身嘅時候就動手砌樹。往年棵野係放喺廚房門口附近﹐但禧爸話好迫﹐今年要放過第二個位置。於是佢就揀咗門口位近窗口(其實係直情幢喺個窗口喇﹗有D騎呢﹐不過無第二個位可以容得下咁大棵野喇﹗)
大少瞓醒覺之後﹐我哋重以為佢會唔記得咗棵樹﹐點知佢一喺房行出嚟就即刻問砌得未﹐令本來諗住可以側側膊唔多覺嘅老豆要即刻開工。呢D咁粗重嘅野梗係留比佢兩父子喇﹐我加入埋個戰團﹐咁夜晚嗰餐邊個煮喎。只聽見一個喺樹猛嗌「咪搞喇﹐嗰枝唔係插嗰度架﹗」「拿﹐你再亂咁整我唔砌架喇﹗」「喂﹐都話唔好亂咁插咯﹗」咁當然﹐叫得口水禧做「一言九頂」嘅就梗係唔會咁順灘比人話完唔駁嘴喇﹐所以每次聽完禧爸嗌完﹐就實聽到一把細路聲即駁﹕「呀﹗係插呢度架﹗」「呀﹐唔係亂插呀﹗」「爸﹐你砌好D呀下﹗」我咪喺廚房>>>
﹗
當佢哋兩個麻甩仔/佬砌好棵樹之後﹐就係我出場掛裝飾物嘅時候喇。呢D野﹐禧爸絕對係無耐性同你逐樣野掛上去﹐如果要佢掛嘅話﹐我諗佢掛十個八個波之後就會話「夠喇﹐好靚勒。」同埋﹐我肯定棵野嘅頂係唔會有野嘅﹐因為條懶蟲絕對會因為唔想擒高擒低而懶得掛野上去樹頂嗰度。
所以呢D咁艱巨嘅野梗係等我嚟做喇喂﹗
口水禧都好enjoy掛野上樹嘅過程﹐只係佢竟然將全部野掛晒喺棵樹嘅裙腳位嗰度﹐重要一枝樹幹掛幾個裝飾物。枝樹幹比D野聚到幾乎掂地下咁濟﹗佢重要覺得自己掛得好靚添﹐我幫佢掛高D佢重好不滿咁堅持要掛低D。最後當然係比我靜雞雞掛返晒上去喇﹐樹腳有火車要行架嘛﹐撞到D裝飾物架火車就會出軌﹐咁咪下下都要去幫佢整架火車囉﹗大佬﹐家下我哋唔係十八歲吖嘛﹐成日要趴喺地下整火車真係腰都斷呀﹗唉﹗D後生仔係唔會明架喇﹗
中途又話要同佢列火車合照﹐重要打側身企添﹐洗唔洗咁嬌美呀先生﹗
******************************************************************
近日天氣開始凍﹐呢個週末重話我哋呢度最低會降到零下添﹗火爐長開﹐好處係可以猛借D熱氣嚟烘乾D衫﹐唔洗用咁多乾衣機慳返煤氣費﹔不過個人就會乾D囉。所以嗰日一路砌樹一路齊齊飲檸蜜。檸檬喺後園摘嘅﹐自家野organic﹐包無農藥(梗係喇﹐水都幾乎唔淋﹐邊有咁得閑落農藥吖﹗)﹐支蜂蜜喺中國人超市買﹐其實唔知呢D同嗰D咩12+/16+嘅鬼佬蜜糖有乜分別。淨係知鬼佬嗰D就叫你一羹羹咁吞﹐呢D唐人野就要嚟沖水飲。
************************************************************
幾乎唔記得講﹐多謝咁多位喺度留咗咁多生日嘅祝福過我老豆呀媽﹐代佢哋多謝你﹐並且讚你乖﹗
