嘗試 – 口水禧日記

前兩日收到肥玲對Thomas 筷子﹐口水禧重當咗做挖耳屎支野﹐話佢知呢對叫筷子﹐佢非常好奇地望住我問﹕「呀﹐咩叫筷子呀﹖點解係筷嘅﹖」真係比佢考起﹗老實講﹐我細個無呢D學習筷子﹐淨係知呢兩支野總之夾到餸咪叫做用筷子囉﹐理鬼得佢點解叫筷子咩﹗所以好自然地我揸筷子嘅手勢係錯嘅。

正確嘅揸筷子手勢係隻中指要夾喺兩支筷子中間﹐跟住就唔知點樣用邊隻手指控制兩支野開合嚟夾實食物。好抱歉﹐在下夾野嗰陣隻食指係會豎起嘅﹐好彩係食指唔係第二隻手指啫﹗如果唔係晨早應該喺茶餐廳比人斬咗手指九年喇﹗

試過一次同一大班人食飯﹐比人話我錯手勢揸筷子﹐嗰個人重要喺度猛學我點揸點豎起隻食指﹐又真係幾核突嘅﹐自己揸咗咁多年真係唔覺得﹐但係人哋一講起重要做埋比我睇先知原來我食親飯都手指指人﹗

好彩有呢D學習筷子﹐如果唔係我相信口水禧一係就唔識用筷子﹐一係就好似我咁手指指﹐因為我自己都唔知點樣揸筷子。更加唔知點樣教人左手揸筷子添喇﹗試過想改但係真係好難改﹐通常都係夾到一半就跌晒喺枱﹐一係夾到一條麵咁大把囉。夾得重少過人哋柏甘遜手震嗰D人﹗所以呢D都係一開始用嘅時候就學正統手勢﹐大咗慣咗好難改返啱。

今晚食麵﹐開頭叫口水禧用下筷子﹐點知佢唔肯﹐係都要用叉。心諗﹕「唉﹐算數﹐費事迫佢用喇。」點知我行咗去「筆」湯嘅時候見到有人自己攞起對筷子夾麵﹐都叫做夾到喎。某程度上叫做夾得個姿勢好過我添﹗所以又讚下佢﹐等佢唔好怕咗用筷子喇。喺呢度﹐如果你唔比機會﹐小朋友點會主動用筷子﹐個個都揀用叉喇﹐易D吖嘛﹗所以當小朋友肯用而又夾到野﹐我覺得都算係咁架喇﹐話晒第一次用都夾晒成豌麵喎﹐又無乜跌落枱或者地﹐算係咁架喇﹗(其實平時用叉用羹跌得重多﹗)

************************************

話說呢副積木買咗都有一段時間。曾經佢只係傢具嘅一份子﹐當時口水禧只係攞佢嚟定﹐所以都無比佢玩。呢幾個月見佢無再有定野嗰鋪癮發作﹐有時做好家務有時間乘都會攞副野出嚟同佢砌下。無話一定要砌乜﹐鍾意點砌就點砌囉。有時當層層疊咁玩﹐不過有人有時好鍾意惡意破壞﹐襯你砌到好高嗰陣一野掃跌晒D積木﹐真係要提佢喺學校千其唔好咁樣掃跌人哋玩緊嘅積木﹐如果唔係後果自負﹗

積木係培養創意﹑聯想力﹑邏輯﹑耐性嘅好幫手。到而家我都未能夠知道口水禧砌乜野﹐不過唔同時期嘅佢由求鬼其疊高兩舊積木到慢慢向上發展﹐再到而家嘅立體野﹐其實都見到小朋友嘅轉變同進步。我哋睇到嘅可能係一堆唔知乜嘅野﹐但對佢哋嚟講﹐又要平衡﹑又要啱位夠位﹑又要夠力﹑又要有形狀﹐其實真係唔容易。個底砌得唔穩陣﹐上面好難砌得又高又穩﹐體積唔同嘅積木點樣食住度力去頂住下一舊呢D野都係要靠不斷試﹐又跌又砌﹑再跌再砌慢慢自己揣摩返嚟嘅﹐四歲人教佢乜野係力學都唔知我講乜喇﹐況且我自己都唔知喇﹗

我相信invisible learning多過夾硬嚟質野入細路個腦。有時小朋友玩玩具當中自己學咗野未必咁明顯即刻可以睇到個效果。但係佢袋咗落袋嘅可能係你同我都唔識嘅高深野都唔定。而且佢自己袋嘅記憶更加深﹐迫佢記嘅話﹐即使記到咪都係短暫記憶﹐好快就會唔記得。早排收到blog友To To Ma嘅一篇文章﹐關於美國教育嘅方法﹐睇咗好認同個作者寫嘅野。

美國教育著重啟發學生嘅思維同創意。論背書﹐外國人真係唔係我哋亞洲人嗰皮。一D公開嘅國際數學比賽通常贏嘅都係亞洲人。但係一講到要考創意嘅野之時﹐我哋亞洲人即刻輸人成條街。所以死記﹑背書只係等如喺一個框裡面不停咁走﹐無咗個框嘅話我哋就會無晒方向﹐個腦唔識諗野。人哋有創意嗰D就不停創造D新野出嚟令世界進步﹐而我哋咪繼續係樹不停咁背人哋發明嘅理論囉。

所以﹐多D同小朋友天馬行空﹐亂o翁廿四﹐車天車地﹐你會發現原來小小嘅腦袋真係唔簡單。尤其呢個年紀開始會有幻想﹐我屋企嘅口水禧成日自己作D野出嚟講﹐一時又話攞咗學校隻guinea pig返嚟﹐重同我講﹕「睇下﹐而家我用手抱住咗guinea pig喇﹗」遞高對手其實得兩梳蕉﹐加入佢嘅幻想同佢一齊老作囉﹐我有時會問佢﹕「嘩﹐你隻guinea pig喺度做緊乜呀﹖」佢話﹕「check緊email同埋飲咖啡。一陣我哋同埋mimi去starbuck飲野傾計。」有時又話自己有對翼可以飛上棵樹度睇貓頭鷹﹐問佢貓頭鷹係貓定鷹﹐佢話係貓﹗總之呢個年紀係鍾意講到自己飛天遁地﹐上太空潛入海底﹐識人話識動物話﹐又係生物又係死物﹐有時話自己係一架火車要燒煤﹔一時係隻蜘蛛要食飯添。(食飯﹖﹖﹖)

童真係天生嘅﹔老成係後天迫出嚟嘅。我寧願有得佢繼續佢應有嘅童真﹐好過四歲人講野好似四十歲人咁樣。成年人就係因為無咗童真﹐所以好難有創造力。童真一瞬即逝﹐走咗想捉都捉唔返。

火雞嘅羽毛原來係生喺個嘴度架﹖定係口水禧隻火雞比人綁架呀﹖

喺學校﹐老師叫小朋友出去貼返D火雞毛落隻火雞度﹐好多小朋友會貼D毛喺隻火雞塊面度﹐貼到成塊面連埋對眼都唔見埋。老師有得佢哋咁貼﹐唔會話佢哋貼錯位置。你有無習慣一見到小朋友做D唔係常人所做嘅野嗰陣都會忍唔住即刻更正佢呢﹖例如小朋友畫畫嘅時候家長會叫小朋友呢個應該畫喺邊應該點畫﹐如果小朋友畫咗一筆大人覺得唔啱嘅野﹐大人就會即刻擦返或更正﹐並且話小朋友畫錯呢﹖

跟咗口水禧返學之後我學咗有時要忍口﹐明知口水禧估surprise can嘅答案係錯都有得佢照講﹐有時D小朋友真係估到九唔搭八﹐但係老師一樣都會先話good guess but……其實小朋友接觸世界萬物都係得嗰幾年嘅時間﹐喺佢哋嘅腦裡面真係知嘅野唔多﹐但係佢哋都會盡力諗主動嘗試估﹐其實都未嘗唔係一件好事。有時口水禧都好懶﹐佢問我野時我問返佢﹐佢求其答唔知就算。我通常都鼓勵佢試下估下點解喇﹐好似好耐之前有一次佢問我點解D雲唔會跌落嚟嘅﹖我叫佢估下點解﹐佢話因為貼咗膠紙喎﹗大人當然覺得好荒繆﹐但係喺小朋友嘅角度又唔係錯得晒喎﹐咁膠紙的確係可以黐實D野吖嘛﹐咁舊雲喺個天度唔跌落嚟﹐梗係比野黐住咗喇﹐咁咪即可用膠紙黐囉。咁都未嘗唔係一個good guess喎﹗

*************************

個仔作出咁多嘗試﹐做呀媽嘅都要進步架。早排買咗部麵包機返嚟﹐而家朝朝早都有新鮮方包食。一起身行入廚房就已經聞到啱啱焗好嘅麵包﹐真係香到流口水咁濟﹗但係最弊嘅一樣野就係熱辣辣嘅包係好難就咁用刀切片嘅﹐因為個包實會因為把刀砌緊嘅時候噤得大力得濟而最後切完個包亦都係佢變晒型嘅時候。變咗型係唔會變返方型嘅﹐只會繼續不規則型狀嘅啫。但攤凍個包先切就無咗新鮮出爐嘅味道。

早幾日比我喺walmart見到把電動切麵包嘅刀賣﹐於是買嚟試下得唔得。