車呔禧感恩節的晚餐

無相呀呢度唔想齋睇字就等呔爸媽嗰邊喇。

對上幾次我哋都係出街食﹐有感帶住三條細路出街其實即係等如無啖好食﹐所以最好都係留喺屋企食﹐三條豆靚有野玩消磨時間﹐四件老野就可以有安樂茶飯。

連最細嘅細佬都開始加入D哥哥嘅活動﹐攞桶玩具出嚟嘅時候﹐再唔淨止係口水禧或者呔仔會半個人都入咗個桶入面「巢」玩具﹐家下連細佬見到個桶都識得唔執輸撲埋嚟爭住「巢」野﹐可想而知三個後生仔開始挑戰呔爸媽兩位步向中年嘅成人同埋已經步入咗中年嘅我同禧爸兩條老柴嘅活動能力有幾弱﹗唉﹗後生仔果然係後生仔﹐我真係望塵莫及﹗

記得晚飯中我問呔爸媽﹐如果比佢哋再揀﹐會唔會隔咁近再有小朋友定係隔遠D好﹐佢兩個不約而同都話仍然會想近D好過隔幾年之後又要從新再嚟過。2字頭即係2字頭﹐我呢D 3字頭嘅人係無辦法理解究竟佢哋係點樣湊兩個年紀咁近嘅﹐重要係男仔添﹗

唔怪之得D人成日話有仔襯嫩生﹐我家下就明喇。

呔爸媽重可以安慰自己話﹕「好快我哋就可以自由架喇﹐好快就會好似你哋而家咁樣可以有安樂茶飯食﹐唔洗再半夜起身餵奶﹐唔夠瞓。」(生多個喇﹐你哋實捱到嘅﹗

你話我幾衰﹗

)

講返尋日﹐半來呔爸第二日要返工﹐所以上次約嘅時候重話不如早D入嚟﹐早D食晚飯﹐咁就唔洗搞到呔爸唔夠瞓去返工喇。於是就叫咗佢哋中午嚟﹐我哋去食晏然後返去我哋度玩一陣﹐五點食晚飯喇。

其實帶住小朋友出街﹐真係好難話有一定嘅時間表﹐永遠都會有一D預料之外嘅事發生﹐所以如果你無小朋友﹐而你又約咗有小朋友嘅朋友出街嘅話﹐將就D唔好諗住準時呢家野喇﹐比多少少時間人哋喇。呢個係我一個朋友當我有口水禧之後講嘅﹐我哋次次去佢屋企食飯﹐佢哋都會就口水禧瞓晏覺嘅時間﹐無話一定要喺約定嘅時間到達﹐因為小朋友成日都會喺出門口嗰陣突然有D事擔誤下你。

尋日帶住三件細路﹐食完晏返到屋企都三點幾﹐如果照舊五點食晚飯﹐我諗大家都會想嘔。所以最後都係成七點先有得食喇(其實係我手腳慢﹐揾D細路嚟做籍口啫﹗

)。

好彩有D野食前一晚已經醃好或者整咗一大部份﹐如果唔係我驚九點都未有得食。本來諗住有南瓜湯﹑焗排骨(BBQ baby backribs)﹑牛扒﹑炒豆角﹑焗薯仔同埋甜品。諗住呢幾樣野都好容易架喇﹐點知打頭陣嘅南瓜湯衰咗﹗煮同聞嗰陣都覺得實無死喇﹐咁鬼香﹐點知加完cream之後試味﹐簡直O嘴O到甩「較」

煲野苦過 De De﹗蒙住對眼飲會以為飲緊苦瓜湯﹗澀到爆炸﹗

比呔媽同禧爸兩個試下﹐禧爸試完重即刻要啷口添﹗可想而知係幾咁難飲﹗我條氣真係唔順﹐雖然我第一次整﹐但無理由會咁樣架嘛﹐又無落過D乜野苦野落去﹐何來苦味呢﹖

初時重以為係上次口水禧去個南瓜場幾時候揀咗個壞南瓜返嚟﹐上網揾答案﹐原來南瓜湯煮多過十五分鐘就會開始有苦味﹐咁我明白點解喇。我尋日煮嘅時候﹐為咗想D南瓜林D﹐所以就煮咗好耐。唉﹗南瓜同我真係八字唔係好夾﹐上次整南瓜炆排骨就喺切皮嗰陣切埋自己隻手指皮﹐幾乎止唔到血﹐搞咗兩個禮拜有多先唔洗再包住隻手指﹐痛咗我幾耐呀﹗

南瓜呀下﹐我唔服呀﹐我一定會再泡製你﹗

好喇﹐無咗一個餸﹐覺得有D唔老嚟。尤其有客人嚟食飯嘅話就更加驚其他嗰D野食都會有問題﹐最後無野比人食。好彩其他嗰D雖則唔係好好食﹐不過都過到我條脷喇﹐過唔過到其他人就唔知…..

希望OK喇。

呔仔由於沉迷喺D玩具度﹐而呔爸媽好想可以有餐安樂茶飯食﹐所以就暫時有得呔仔喺地下玩住玩具先﹐諗住之後先比佢開餐。加上之前比咗D生果呔仔食﹐佢應該都未肚餓住﹐佢個樣似餓玩具多D﹗

開頭細佬都肯坐喺BB凳度玩下食下餅餅同baby food﹐點知食完之後就唔肯坐要爸媽抱﹐連落地玩具都唔肯﹐喺呢個時候呔仔又好似有D眼瞓﹐於是呔爸媽乘機一人負責一件暗瞓覺。唔洗十分鐘﹐KO兩個。細佬由媽媽邊食邊抱住瞓﹔呔仔就喺我哋飯枱隔離鋪野比佢瞓﹐呔媽話如果比呔仔瞓口水禧間房﹐驚呔仔瞓醒唔見晒D人﹐又唔知自己瞓咗喺邊會喊﹐咁又係﹐小朋友一瞓醒唔知自己身在何方﹐爸媽又唔喺隔離確係幾驚嘅。於是呔哥就一路聞住我哋D野食味一路喺我哋四件顧食唔理仔嘅父母談話聲之中瞓咗一陣叉下電。

最開心當然係呔爸媽喇﹐終於可以坐定定食到餐飽飯之餘﹐重可以同我哋吹下水添。

話你知﹐前幾次喺街食飯﹐佢哋個豌入面永遠都有好多野未食﹐連凍食都無足夠時間﹐莫講話想襯熱食喇。我同禧爸完全明白﹐以前帶口水禧出去食飯﹐我哋永遠都係食冷飯菜汁﹔一係就要喺十分鐘之耐食晒面前重冒緊煙嘅野食﹐因為小朋友去到八﹑九個月開始識得要求睇野嗰陣就會不停要求大人抱佢哋去睇野或者伸手去搞枱面嘅野。你唔合作嘅話﹐無野嘅﹐佢哋咪大叫大喊大吵囉。呔仔同細佬都算重有一刻肯坐下食下野﹐口水禧就……

所以我同禧爸練咗佛印個嘴咁耐熱

(唔知我講乜呀﹖有無睇羅家英喺大內密探007個角色呀﹖)想襯熱食就要咁架喇﹗真係食咗都唔知乜味﹗

後來唔知幾時﹐我喺廚房準備甜品嗰陣﹐車呔兩兄弟就起咗身。當然係繼續玩玩具喇喂﹗

唉﹗個甜品都唔知做乜﹐應該係我尋日都唔知做乜﹐繼南瓜湯賴咗野之後﹐連個「心太軟」都衰埋。

佢哋問我係咪第一次整﹐唉﹗我整過好多次架喇﹐陰公﹗都唔知我係咪手抽筋定乜野黐咗筋呀﹗個樣核突不特止﹐件野有D鹹味嘅﹖連平時無味覺嘅禧爸都話食到有D鹹味﹐重問我係咪唔小心落咗鹽﹗天呀﹗我唔係真係有老人痴呆呀嘛﹖搞乜鬼呀我﹖

呔爸媽實在敬老﹐佢哋話﹕「我哋好滿意架喇喎﹗」真係安慰到我有D熱淚盈眶咁濟﹗本來諗住感恩節又適逢呔爸28號生日﹐整餐大家食下﹐點知個湯同個甜品搞成咁……

食甜品前﹐車呔兩兄弟已經沖好涼﹐咁就唔怕夜媽媽返到屋企又要同兩條靚仔沖涼喇。其實佢哋一上車應該都去咗揾周公喇﹐返到屋企最好就係即刻送佢兩個上床去瞓喇﹗唔知點解呔爸次次同呔仔喺度沖涼都會比我哋個花灑濕身嘅。

其實不如下次帶埋衫嚟沖埋涼喇﹐大佬﹗還掂都濕身咯。唔爭在洗濕個頭喇﹗呔爸尋日一落車就即刻鼻敏感發作﹐睇見佢都辛苦﹐不停包雲吞﹐眼又標眼水﹐樣又戇居居咁款﹐比咗粒藥佢食﹐比佢洗埋鼻都唔掂﹐最後要走去藥房買支野嚟索先好少少﹐但係都係猛流鼻水。我都有鼻敏感﹐所以我明當發作嗰陣真係好難頂﹐個鼻又痕﹐想打又打唔到乞痴﹐搞到谷洗眼水﹐個人又發軟(我有時重會打冷震添)﹐重要睇仔﹐你話佢個樣幾咁謝﹗