今日又去出糧比醫生喇。
尋日聽到口水禧個鼻塞塞哋﹐已經心知不妙﹐點知無幾耐就開始聽到佢痰上頸嘅聲﹐真係不禁一句oh shit!
其實除咗藥材湯之外﹐都一路有比佢用埋噴劑。不過呢排總係覺得噴完好似唔多覺有野噴過出嚟﹐但係支野係新架喎﹐無理由會無野。問口水禧聞唔聞到有藥噴出嚟﹐佢又話聞到﹐咁就諗住可能係我噤得唔夠大力啫。點知……
本來無諗住去睇醫生﹐屋企有化痰通鼻塞嘅藥﹐諗住醫生都係會叫我比嗰D藥口水禧食架喇。但係今日見口水禧D痰多咗﹐唔理咁多﹐都係即刻帶佢去見下醫生先﹐我驚佢個肺又喺度奏交響樂吖嘛。好彩真係有去到﹐醫生聽完口水禧個肺話有聲(即又唱晒歌嗰隻喇﹗
)﹐重問我有無比藥佢聞﹐我話我一路都有比﹐不過係呢排覺得噴極都好似無藥咁﹐但係我有清潔過個噴嘴嚟喎﹐應該唔會有野塞住架嘛。點知原來個噴嘴係重有一個出口喺裡面﹐唉﹗唔怪之得喇大佬﹗
不過醫生都比咗一支口水禧即刻噴﹐話都無咁快﹐噴完唔洗一分鐘﹐醫生再聽佢個肺就話好好多。真係玩C人喇支野﹗我究竟應唔應該慶幸定唔慶幸我無氣喘嘅問題呢﹖因為我完全唔知支野究竟可以點check先知道有無塞。我又唔係醫生﹐我唔知點樣先可以知道口水禧個肺有無唱歌架喎﹗
除咗肺唱歌之外﹐兩隻耳仔都有中耳炎。尋日問佢耳仔有無唔舒服佢又話無。每次一有鼻塞﹐瞓覺嗰陣鼻水就會倒流去佢耳仔﹐所以成日都有中耳炎要食消炎藥。我覺得佢最勵害係獲獲都好似唔關佢事咁完全無感覺﹐照玩照食照瞓。
都好嘅﹐總好過鬼殺咁嘈又扭計﹐起碼我淨係準時比藥佢食﹐唔洗照顧一個成日發脾四嘅佢。
呢兩晚都無覺好瞓呀大佬﹐口水禧瞓覺頻頻「煎魚」﹐反嚟反去﹐我簡直係通宵更咁濟﹗
真係好彩當日同口水禧報唔到個室外泳班﹐後尾發現咗屋企附近嘅室內泳池游泳班咋﹗今年好似顛咗咁﹐晚晚都低過50度華氏(10度攝氏)﹐以前40幾華氏已經嘩嘩聲﹐家下係有4字頭都偷笑喇﹗夜晚通常都係得返30幾度﹐有時連朝早起身都係得30幾度﹗無暖氣嘅話都真係無勇氣離開張被﹗
都唔敢諗如果口水禧要喺室外泳池學游水會唔會變咗冰條﹗
莫講話係室外﹐連室內暖水泳池加埋暖氣都唔夠﹐條友仔上水嘅時候口都震埋﹐嘴唇都幾乎變棗紅色咁濟﹗其實佢上身已經有著野﹐但係可能都唔夠厚﹐所以訂咗件有2mm厚嘅泳衣過佢試下夠唔夠暖。今日試咗﹐佢話暖喎。咁得喇﹐呢個冬天就著住呢件泳衣游喇。
