啱啱過去嘅星期六﹐雞雞學校搞咗一年一度嘅聖誕籌款派對﹐除咗係同學校籌務經費之外﹐亦都同大家慶祝聖誕節就快嚟臨。嗰日雖然分咗兩場﹐但係每一場嘅人都幾乎迫爆個場咁濟﹐都叫做大家都幾支持。
朝早我先去學校幫手做野﹐負責包禮物。因為學校擺咗個攤位比小朋友買聖誕禮物﹐每件一蚊﹐有興趣可以行過隔離叫我哋包﹐小朋友見有得玩﹐梗係乜都要我哋幫佢包一大餐﹐買比呀爸呀媽嘅又包﹐買比屋企隻狗嘅又包﹐連買比自己嘅都要包﹐真係包到我要幾核凸有幾核凸﹗我唔係特登包得核凸架﹐之但係我嘅手工藝係乜野程度﹐大家睇過我車窗簾嗰單野都略知一二架喇﹐其實我包花紙嘅level同車野係有過之而無不及嘅。都唔知係整蠱我定整蠱D小朋友﹐定係整蠱收禮嗰個﹗
拿﹗睇到嗎﹖有資勢但唔多實際就係咁樣勒。張枱係平時小朋友茶點時間用嘅枱仔﹐有D似野餐嗰種樣﹐所以要我咁肥大嘅身驅迫入去真係有D難度。又因為係小朋友嘅size﹐所以張枱同張凳係好近嘅﹐所以我坐咗落去﹐如果要剪D花紙嘅話﹐我一定要打側個身再上半身有少少傾後先剪到﹐有幾次真係幾乎失重心﹐連人帶凳反艇﹗
但係如果要彎住腰﹐好似張相入面咁樣企喺度剪又太低﹐未剪到一半條腰都就嚟斷咁濟﹗所以唯就住就住﹐坐喺度個身唔好挨得太後﹐免得忘形地剪花紙之時向後跌反艇咁瘀﹗
超多人要包禮物﹐真係做到無停手。有D不規則或者林林哋嘅野就最難包﹐包舊狗骨都已經叫最易架喇﹗我包過一盒圓形嘅曲奇餅﹐真包完自己睇到都唔想食﹗
個邊包到不知所謂﹐好彩有D粗絲帶比我扎下個邊﹐當堂好少少。隔離等緊嘅老細(小朋友)本來眼超超都即刻順返條氣咁嘅樣。
就係咁﹐我就做咗花紙小姐﹐包咗四粒鐘嘅禮物。本來重有多一個呀媽同我一齊看檔﹐加多幾個舊生(而家已經上晒小學)幫下手﹐點知嗰個呀媽包包下唔見咗人﹗搞到我無得陪口水禧去玩下攤位遊戲﹐谷鬼氣﹗重要比我見到佢喺課室入面嘆茶食餅吹水﹐我埋去話佢知我個仔嚟咗我夠鐘收工﹐佢又話佢都要走喇喎﹐重點我去揾人頂檔﹐我半來應該早佢半粒鐘收工﹐結果重遲過佢。頂﹗搞到收完工﹐口水起已經玩過晒D野﹐完全無興趣再同我去玩多次。
禧爸喺完全唔知做乜嘅情況之下唯有陪住亂咁四圍走嘅口水禧去玩。
我尋晚執下D相嘅時候真係忍唔住要問下禧爸﹐點解佢次次同個仔影D相都係個仔頭髮凌亂﹑嘴爸微開﹑眼神虛浮﹐鼻窿大大咁樣衰架﹖成個顛佬咁呀﹗
聽禧爸講﹐口水禧玩呢個保齡球玩意嘅時候亂Q咁掟D波﹐搞到D攤位哥哥執波執到包公面咁喎。乜野叫包公面﹖包公面係乜野顏色吖﹖明喇﹖
飛呢D圈圈之時﹐當然亦係搞到包公再現之時喇﹗禧爸話口水禧嗰日好曳﹐走嚟走去唔理老豆嗌破喉嚨叫佢著衫﹐跟住又手多搞人哋嘅裝飾物﹐拎咗去又唔擺返好﹔倒晒人哋D波落地又走咗去﹐搞到要個呀婆執……禧爸話﹕「都唔知點解咁鬼曳﹐又唔見你喺度嗰陣會咁曳﹔我叫佢就越叫越走……」無乜點解﹐你估做衰人咁易架﹗車﹗
重有呀﹐一個字 – 悶囉。禧爸嗰日於場內有如蠟象﹐佢話見到咁多人怕怕喎。我話嗰日都叫做大部份係鬼佬﹐叫做舒服架喇﹗你話如果係好似之前去科學館嗰日咁大部份係亞洲人﹐哈﹗我諗禧爸唔知要揾幾多條血管嚟爆先得﹗我唔係自己踩自己人﹐事實係亞洲人喺呢D場面實在太積極地唔守規則﹐乜都迫乜都搶乜都要霸住﹐攞少D著數好似蝕咗成副身家咁緊張﹗我自問EQ奇低﹐面對呢種場面好易血壓上升﹐情緒激動。所以學校嗰日嘅場面算係咁架喇。
入場費就每個家庭USD25(包父母同仔女)﹐要帶親戚朋友就另外每個比多USD5。買禮物要先買飛﹐每張USD1。每樣聖誕禮物要一張飛﹐即係每件禮物收USD1。野食任食。遊戲任玩。
呢個細路搞緊破壞。攤檔入面攞咗人哋D野未比飛就走人。踎喺地下執樹葉﹐將購物籃當採葉用嘅籃。無視睇檔哥哥三番四次請佢入去比錢(飛)嘅要求。最後當然有比返飛比人喇﹐大佬﹗都係為學校籌錢啫﹐唔比錢學校咪蝕錢﹗
兩點幾有circle time﹐從來都未試過課室裡面咁焗咁暖。平時返學﹐尤其呢排咁凍﹐著幾多衫都好﹐對手都係冰嘅。但嗰日真係熱到標汗﹗
老師旁邊著綠色衫嘅小朋友係舊生﹐即係佢哋N年前都係度留低過腳毛﹐賴過尿架﹗
聽講每年呢個節目都會有好多舊生或者舊生家長打電話去學校自動請英嚟幫手。所以嗰日D攤位都係呢D小朋友幫手睇檔。circle time就幫手唱聖誕歌。後面嘅聖誕老人係唔知邊個嘅呀公/爺嚟幫手扮嘅。唔好講笑﹐佢嗰日大大話話都抱咗唔知幾多小朋友合照﹐難怪佢大合唱嗰陣都唔識企咁濟﹐大佬﹗一分鐘平均要舉幾件上自己個身度﹐真係唔講得笑架﹗
之所以如果情況許可嘅話﹐千其咪獨留D細路比個老豆湊﹐你睇口水禧個髮型﹖完全係無梳頭就出街咁嘅樣。加上佢嗰日成隻盲毛咁亂衝亂撞﹐有邊個唔想中佢吖﹗禧爸就係自己唔洗梳就連個仔都唔洗梳﹐兩條友就咁就出街喇。
坐咗一陣﹐口水禧已經標汗﹗無辦法﹐入面著咗件棉背心。唉﹗我哋呢度就係咁﹐室外凍到爆﹔室內又熱到顛。習慣喺咁凍嘅日子出親街就比佢著件棉背心﹐咁就算佢喺學校嘅時候走咗出室外玩而唔記得著外套都唔怕佢會冷親。其實平時喺學校咁樣著係OK嘅﹐因為室外同室內都一樣凍﹐只不過係室外就加埋有風吹。所以佢就算有件棉背心喺裡面﹐都唔會標晒汗咁嘅樣。不過嗰日實在多人﹐室內好焗﹐所以佢都熱到出汗。
唱完歌散水嘅時候撞見班主任﹐叫佢同老師合照﹐點知佢個樣……介乎喺願意同唔願意之間!邊有學生咁串﹐唔肯同老師影相架﹖
場內有face painting攤位﹐但因為太多小朋友排隊﹐而口水禧根本都無時停﹐邊度肯同你企定定排隊吖﹐所以都係得個睇字。不過真係畫得好靚﹐同上次學校野餐口水禧面上個鬼咁馬六嘅相比﹐果然係差好多皮﹗
我最有興趣係想知呀婆婆自己嗰個係點畫架呢﹖如果係自己畫﹐畫完咪邊咗射呢眼﹖﹖﹖
茶水冷熱飲食物免費供應。個個老豆呀媽得晒喺度hea。
見唔見兩幅野呀﹖聽見有兩個C9研究點整。幾乎想搭嘴……
無錯﹐係我整嘅。
老師又再一次喺唔知情嘅情況之下﹐交D勞作仔比我做。如果佢知道我以前讀書嗰陣美勞攞幾多分嘅話﹐可能佢會寧願自己做算鬼數。不過﹐我總算都叫交到貨﹐重見得下人吖﹗
話說星期三返完學﹐老師就交咗一咋野比我做。課堂上小童工已經將D蠟筆磨成碎﹐我只需要將少少蠟筆碎夾喺兩張蠟紙中間﹐再用燙斗燙一燙﹐D蠟紙就會黐埋封口﹐同時D蠟筆碎亦會溶溶地﹐再黐預先剪好嘅聖誕鹿圖案喺上面﹐再穿條繩就大公告成喇。
星期四晚﹐做晒家務﹐等口水禧去咗揾周公之後﹐亦係我開檔之時。唔好講笑﹐講落好容易﹐不過都做到我成兩點先整完。講緊都係整十幾個﹐不過又要燙又要黐又要貼又要剪再寫名穿埋繩﹐係咁上下喇。致命點係我真係喺呢方面無天份呀嘛﹐剪得核凸又驚﹐燙得太多又會整到D蠟溶晒核凸﹐重之就係步步為營﹐小心行事喇。
登登登登﹐算係咁喇﹐出盡力架喇﹗
星期五中午開始焗曲奇餅比學校義賣嘅。每個家庭一係出餅一係出錢。唔焗餅嘅就捐USD20。派對當日就攞出嚟賣﹐聽講好似都係賣兩蚊咁上下﹐真係得嗰雞碎咁多﹗
星期五送完餅去學校又要趕去覆診﹐好彩眼壓非常好﹐已降到15。醫生話過多兩個月再覆診。
當日重頭節目係大抽獎環節﹐每班捐D野出嚟湊夠一個禮物籃﹐大家買飛抽獎。我買咗六張飛﹐都係USD10。最貴都係USD20有十五張飛。檯上面有各班嘅禮物籃﹐我哋班今年買晒gift card﹐抽到嘅話就可以攞住呢D現金卡去所屬嘅商店買野。所以我都好想抽到呢個籃。成個籃嘅總值係USD210﹐你話係咪盞先﹗不過而家諗係真係笨﹐咁想抽到呢個籃﹐點解唔大包圍﹐掉晒D飛落呢個籃個彩池度呢﹖我嗰日可能係利慾薰心﹐走去分散投資﹐所以我諗都係凍過水lu。唔知幾時會公佈得獎名單呢﹖
上面張相入面有個男人跪喺度填緊D飛﹐我喺佢隔離填﹐我填六張都跪到膝頭哥軟﹐佢填20張直頭想死咁嘅樣﹗佢話真係想捐晒D飛比人﹐又要跪又要填名/電話/班填足20次﹐都唔知個老婆買咁多飛做乜喎﹗我真係想同佢講﹕大佬﹐你望下D價錢﹐件件二佰幾蚊架喎﹐二十蚊換二佰幾蚊﹐抵喇﹗
呢籃係成籃兒童圖書
園藝工具籃
雖然美中不足就實有﹐但係我覺得呢個winter wonderland真係我參加過嘅學校聖誕派對最好玩最有心做嘅一個。所有野都係老師同家長義工逐樣逐樣咁整。場地佈置﹑食物﹑遊戲攤位﹑禮物等等都係我哋一人一分力整嘅。(當然亦有D人渣會置身事外)但係睇到學校好有心搞呢個活動﹐雖則亦係幫緊學校籌款﹐但係真正可以袋落袋嘅真係唔多﹐睇上年嘅財政報告﹐上年嗰個得千幾二千蚊落袋(扣除買材料之後)。但係所費嘅心機同心血真係無價架。講你都唔信﹐上年學校學期尾嘅盈餘竟然係USD5﹗﹗﹗﹗無睇錯﹐係五蚊﹗﹗﹗﹗雖然係有政府資助﹐不過數目少得可憐﹐而且唔會好似香港嘅直資學校咁一次過攞筆大數﹐呢度係逐樣逐樣申請﹐段次比錢。一直以嚟學校都無宣傳﹐所以收生唔多。今年做咗D宣傳(其實我都無見過佢有廣告)﹐收多咗學生﹐所以預算今年會有多達萬元嘅盈餘﹐家下學校已經諗緊幾時可以減學費﹐等多D人可以比得起錢嚟讀﹐因為學校嘅宗旨係想幫助多D社群﹐等多D小朋友可以有讀preschool嘅條件﹐有個快樂嘅學校生活經驗。救命呀﹗聽完都想喊﹐學校點樣敲詐家長同政府嘅錢就聽得多﹐視學生需要為零亦都唔少﹐有幾何會有學校乜野都係以細路嘅利益為出發點架﹖全校三個老師﹐人工少到三個加埋都係多過我以前少少(我已經唔係人工高架喇)﹐但一份人工三個人分﹐舊年重要每人減薪USD100﹗﹗﹗
希望如果今年真係有過萬盈餘嘅話﹐除咗減學費之外﹐希望加返少少比老師喇﹐咁有心嘅老師﹐絕晒種架喇﹗
我而家明白點解咁多舊生返嚟幫手﹐學校比咗愛佢哋﹐當佢哋有能力嘅時候就返嚟饋贈返比學校﹐為D學弟學妹出一分力﹐第時口水禧升咗上小學﹐我都想每年夾佢返嚟幫手﹐還返D比學校﹗
我無揀錯學校﹐呢間學校確係有愛﹗
