由細到大﹐成日都聽到「活動教學」呢四隻字﹐究竟點樣活動點樣教學﹐我好似未真正領教過箇中嘅樂趣。以我自己對字面嘅見解﹐即係屏除揸住本書係咁「唸口枉」博老命咁讀D課文嚟教書嘅方法﹐用輕鬆嘅形式如做話劇﹑小組討論﹑小組功課﹑遊戲等等嘅方法教學﹐等學生可以喺自己揾資料嘅時候﹐自己先對題目理解一下﹐消化下資料內容﹐然後用自己嘅方法去表達返自己所知道同明白嘅野出嚟﹐無一定嘅答案模式﹐學生諗到乜野都可以講。比起死背書﹐我相信後者會容易入腦D﹐因為學生要自己落手落腳去做準備功夫﹐唔可以等老師塞野落你個腦袋度等你去死記。
我所諗嘅活動教學大致上係咁喇﹐我靠估架咋﹗
就快四歲嘅口水禧﹐開始可以玩下遊戲喇。唔洗成日再淨係玩車仔咁dry。
佢唔覺得嘅﹐係我覺得啫。無兄弟姐妹嘅佢﹐屋企長時間都係得兩個玩伴 – 佢老豆+佢呀媽。基本上禧爸陪佢玩多D﹐我已經比家務圍到我眼花﹐真係好難「必」到時間出嚟同佢玩。同常我最得閑嘅時候﹐就係口水禧瞓咗之後﹐所以真係無計無計。
叫我哋陪佢玩車﹐真係唔知應該點樣去配合佢至好。所以有D遊戲玩下嘅話﹐咁起碼叫做無咁悶。
近來除咗對對牌之外﹐佢重多咗個新歡﹐唔知點形用呢個遊戲好。
首先將D膠籤穿入去D窿度﹔
最好就係縱橫交錯咁穿﹔
穿到個火箭成棵仙人掌咁﹔
曾經令口水禧著迷嘅三眼仔
將D三眼仔由個火箭頂度掉入去﹔
口水禧好著迷做呢個步驟
掉晒D三眼仔入去就可以開始玩﹐首先係擇骰揀自己要抽嘅膠籤顏色﹔
睇呢張相應該都知點解頭先穿D膠籤嗰陣要縱橫交錯咁穿喇﹐如果唔係﹐當你抽D膠籤嘅時候﹐D三眼仔就會好易直sir落嚟架喇。邊個越跌得多三眼仔嘅咪輸囉。
千其唔好比口水禧個「諗樣」呃到﹐條友仔絕對係無經過深思熟慮就亂Q咁扯D膠籤出嚟﹐因為佢開頭以為越攞得多三眼仔先係贏嗰個﹗玩完重會數自己有幾多隻添﹗(真係豬到無人有﹗)
後來終於知道跌得越多三眼仔會輸﹐佢就轉行穩陣路線﹐專扯最底嗰層嘅膠籤﹐諗住D三眼仔喺晒上面﹐最低嗰層嘅膠籤無比D三眼仔掂住﹐真係任攞都唔會有事喇。傻仔﹗最底嗰層D膠籤攞走晒﹐上面D三眼仔一郁咪直跌落嚟囉﹐無野晾住﹐玩幾鋪就跌晒出嚟喇﹗
攞到三眼仔﹐開心得佢吖﹗
係咪呢﹖跌咗落嚟喇﹐執喇傻人﹗(睇下右邊嗰張相﹐口水禧幾疊馬D三眼仔﹗)
我有七隻﹐口水禧係我幾倍。
但係有時真係唔到你唔服﹐佢雖然係亂咁扯﹐不過有好多次諗住佢一扯完實有大把三眼仔跌落嚟﹐之不過又無喎。而我同佢老豆就成日懶醒咁揀過度過先扯﹐點知一扯就一Q清袋﹐全數嘅三眼仔跌鬼晒出嚟﹗簡直將「千揀萬揀﹐揀著個爛燈盞」演譯得淋漓盡至﹗
啱嘅﹐做人簡單D好。傻人有傻福﹗
輸咗條氣唔順﹐噴口水洩憤。
呢篇野講嘅活動教學並唔係上面第一段講嗰D﹐而係想講最近同呢個豆丁玩遊戲時嘅少少領會。玩遊戲﹐可以訓練小朋友用腦﹑訓練佢哋身體四肢活動協調等等﹐但係我覺得最大嘅功能係要小朋友學識遵守遊戲規則。你哋有所不知﹐呢個四歲人仔﹐個樣望落戇居居﹐都唔自點解咁鬼奸詐。話說上個禮拜同佢玩對對牌﹐有幾次佢好迅速就揾到兩隻相同嘅牌。開頭我重以為自己個仔咁好記性嘅﹖幾廿張牌反轉晒都認到邊張同邊張一樣咁勁﹖後來先發現有人喺D牌度做咗手腳﹐有D記號。例如有張牌係爛咗少少嘅﹐有張就有D顏色喺背面嘅﹐當口水禧揾到呢兩張牌嘅另外一張之時﹐佢就會即刻周圍瞄下揾下嗰D做咗手腳嘅牌喺邊﹐結果好容易就比佢揾到出嚟。
另外﹐前幾日我喺廚房煮飯﹐禧爸同口水禧喺廳玩對對牌﹐我不停咁聽到禧爸叫口水禧攞返D牌出嚟﹐兩個嘻嘻哈哈唔知笑乜鬼。後來問禧爸﹐佢話口水禧預先收埋定幾對一樣嘅牌喺袋﹐到最尾大家攞出嚟計分嘅時候﹐條友仔就會攞埋嗰幾對佢收埋嘅牌出嚟當埋係自己揾到嘅牌﹗
將呢兩件事講比禧婆婆聽﹐禧婆婆笑得不知幾開心﹐重猛讚自己個孫好聰明添。連禧爸比人千完都笑口筮筮唔反抗﹐有得個老千鋪鋪都收埋D牌。
當日﹐我知道有人出千之後﹐實在不能容忍屋企有個老千喺度。行出廚房﹐叫口水禧攞個袋比我睇(佢將D牌收埋喺佢個袋入面)﹐我見到裡面有幾張牌喺度。於是﹐我認真地同口水禧講﹕「禧禧﹐你唔可以咁樣玩牌﹐你唔遵守遊戲規則﹐咁樣以後就唔會再有人鍾意同你玩。你想keep住呢D牌唔係唔得﹐不過計分嘅時候唔可以攞出嚟當埋係自己贏嘅。你要贏﹐就靠你自己記住D牌﹐自己揾返出嚟。唔可以用呢D方法去贏。」
父母有邊個唔想自己嘅仔女係個聰明仔聰明女﹖有邊個唔想同仔女玩嘅時候見到佢哋笑﹖有時我哋同口水禧玩﹐會就住就住﹐明知有兩張牌係一樣﹐明知口水禧知道嗰兩張牌一樣﹐即使未輪到佢反牌﹐我哋都會特登唔反嗰兩張牌﹐專登留返比佢去反﹐等佢贏多兩張﹐叫做氹下佢開心喇﹐況且﹐大人贏細路﹐有乜咁威﹖但係我覺得絕對唔可以縱容口水禧用旁門左道嘅方法去贏遊戲﹐輸贏事少﹐養成呢個壞習慣事大呀﹗呢D小聰明千其唔好恨﹐細時收埋牌﹐大D就出貓﹐再大D咪去出老千囉﹗重記唔記得我講我以前讀嗰間中學嘅人呀﹖有D就係用埋晒D旁門左道嘅方法去贏成績﹐係好叻呀D成績﹐而家可能做緊女強人揾好多錢添﹐咁又點呀﹖咪又係小人一個﹐「光明正大」點寫都唔識喇。
唔好因為口水禧得四歲就覺得佢呢D係童真﹐係可愛﹗千其唔好咁諗﹐一定要佢改﹐早改早著﹐因為當一個人對勝利著迷嘅時候﹐佢就會為咗贏繼續用旁門左道去贏。等到口水禧上小學出貓嘅時候﹐我先再去鬧佢嘅話﹐佢一句得埋嚟﹕「媽媽﹐我一直都係咁架喇﹐細個玩遊戲都係出貓架喇﹐你都無話唔啱﹐點解而家又話我錯啫﹖」到時﹐你叫我點答佢好呢﹖
記住﹐要贏﹐就要靠自己實力。將來社會上有無正直不阿嘅人﹐就係靠我哋做父母嘅由小朋友細個開始教導架喇﹗
