夜片

想覆回應架﹐不過立場唔同嘅會變咗好似辯論會﹐所以…..講生仔大家傷感情﹐D意見唔係我一個人獨霸嘅﹐我相信有D媽媽睇咗咁多個回應可能都會有D改變當初嘅諗法﹐總之都係嗰句﹐啱用嘅攞去﹐唔啱用嘅留比第二個囉。

不過好搞笑﹐我攞得出嚟呢度講﹐其實梗係預咗人人都有唔同嘅睇法架喇﹐唔洗驚我會唔高興喎﹐所以唔洗括晒弧表明係個人意見或者千叮萬囑「你唔好介意呀」嗰D喇﹐我唔會買兇滅你口嘅﹐放心﹗

近來﹐口水禧開始有「唔想用尿片」嘅念頭。瞓晏覺之前同夜晚上床嘅時候會要求唔好同佢著尿片。當然﹐講就天下無敵﹐又話自己唔會疴又話條片一定會乾嘅﹐但係做就……唔講由自可﹐講嗰晚嘅第二朝不單止條片係濕嘅﹐重濕到漏尿添﹗指定動作 – 洗床單洗床褥護墊洗被

曾經﹐我半夜起身同佢換片﹔

曾經﹐我半夜禧身抱佢去廁所交水費﹔

曾經﹐半夜太凍﹐我條腰太痛﹐抱佢唔起又怕佢冷親﹐我半夜起身喺度「o殊」佢疴喺片﹐然後我再同佢換片﹔

又曾經我半夜起身之後多數都瞓唔返﹐第二日人都散咁濟﹐於是我捱到半夜同佢換埋片先瞓﹐但返咗學之後無呢支歌仔唱﹐除非日日做逃學威龍或者揾間有下晝班嘅preschool。

醫生話﹕「半夜起身去廁所疴完第二朝條片都係有尿嘅話﹐即是個小朋友未識控制瞓覺時忍尿。就算起幾多次身都會照疴喺片。如果係喺廁所疴咗之後第二朝條片乾嘅話﹐就可以試下夜晚叫佢起身疴囉。」重要笑笑口加多句﹕「中國人係急D要細路仔戒片﹔鬼佬有得佢自己戒。」

望住眼前同我一樣都係中國人嘅醫生﹐我都忍唔住笑咗出嚟。

早講吖嘛大佬﹗凍到我吖﹗條腰痛到吖﹗

之後﹐我放棄再嘥時間半夜起身抱佢去廁所﹐決定等。

等到星期一下晝﹐佢瞓晏覺之前話唔會疴尿喺片﹐結果真係無尿。我滿心歡喜﹐心諗﹕「嘩唔係咁益我呀嘩﹖完全不費任何功夫佢就自己戒咗﹖」夜晚瞓之前﹐佢又話唔會疴喺片會忍住。真係唔好開心得太早﹐第二朝就有尿床單尿被尿底衫尿睡衣等緊我。之後呢幾日﹐日日都話唔洗再包尿片﹐但晏覺夜晚覺都一律濕片。我唔知道佢係咪去到廁所疴一次就唔會再濕片嘅境界﹐但而家冬天太凍﹐唔係測試佢腎功能同膀胱功能嘅好時機﹐等暖少少嘅時候再擇個好日同佢再試喇。

報告完畢﹐戒夜片任務mission impossible – 失敗。