成日都聽人講﹐家下嘅細路精甩辮﹐唔係再好似我哋細個嗰陣咁成舊蕃薯咁(OK….OK﹐淨係我薯囉﹐好未﹖
)﹐都唔知真係喺肚裡面嘅時候已經吸盡日月精華定係出咗嚟之後食奶粉補過頭﹐莫講話駁嘴駁到曉飛﹐個膽勁過豹子膽﹐記性好到不得了﹐得罪過佢哋﹐你都唔洗旨意諗住側側膊唔多覺呀﹗細個嗰陣唔識反抗就任你鬧都淨係識喊﹐到大D嘅時候先嚟同你算返D舊賬﹗
話說好耐之前﹐應該係迷失自我嗰篇blog提過我有時唔知發乜野神經會突然迫口水禧做一D佢唔識嘅野。結果就梗係扯晒火鬧到顛﹐佢又喊到爆嘅收場喇。有一次都唔知點解我會叫佢學扣baak鈕﹐可能係諗住第時返學﹐萬一要自己著褸﹐去完廁所著返條褲時要扣鈕﹐所以就叫佢睇我示範﹐然後叫佢做一次比我睇。
當然﹐佢邊有咁好耐性學﹐亦都因為年紀細﹐對眼未必真係睇得咁清楚我點樣扣D鈕。於是佢睇咗兩﹑三次就想鬆人﹐但係我堅持要佢扣到為止﹐結果佢唔耐煩發老脾﹐就係咁樣就點著咗佢呀媽我把火﹐眼見佢扣嚟扣去都唔識﹐我示範嗰陣佢對眼又望第二度﹐跟住到佢做嘅時候就發呆望住我﹐真係火都嚟﹐於是一路鬧一路教﹐佢就一路喊一路猛嗌唔識﹐又話對眼好辛苦。重要比我錄咗video添。
之後唔知點樣﹐究竟係我同佢道咗歉定係佢偷聽我同佢老豆講野﹐條友仔成日攞起部video機就猛睇自己扣唔到鈕比呀媽鬧嗰段片﹐重要一路睇一路當笑片咁係咁笑﹗開頭以為佢純粹係貪玩架啫﹐不過佢每播一次﹐我都內疚一次。唔知係咪母子係有心靈相通架呢﹖佢好似睇穿睇透呀媽諗乜咁﹐總之就係我越唔想佢睇﹐佢就越係不停咁重播又重播﹐笑完又笑。
前幾日食緊晚飯﹐佢突然轉頭問我﹕「呀﹐點解嗰陣時禧禧唔識扣鈕﹐媽媽鬧禧禧嘅﹖嘻嘻﹗」講完重要奸笑﹐斜眼望我。真係無喇喇比佢考起。到底我應該兇返佢責怪佢唔識扣鈕吖﹐定係即時道歉好呢﹖
結果﹐我當然係選擇咗即時道歉喇。如果我重死雞撐飯蓋﹐堅持我無做錯嘅話﹐咁就真係一錯再錯喇。明明係我唔啱﹐迫佢學D佢年紀同能力未到嘅野迫到佢喊咁口﹐如果我重企硬嘅話﹐咁我肯定以後當佢長大之後﹐我呢個呀媽對佢嚟講真係野蠻人一個喇。所謂﹐錯要認﹐打要企定﹐大人做錯都要識得認錯﹐咁先可以令到細路信服。人哋錯我就鬧﹐自己錯我就唔認嘅話﹐真係第時揾鬼睬我都似。
比佢問完之後﹐我就話﹕「係媽媽唔啱﹐對唔住喇。我唔應該迫你做你未有能力做嘅野嘅。嗰次媽媽真係唔啱喇。」聽完我同佢道咗歉﹐佢又繼續笑笑口食佢嘅飯。隔日﹐又係食緊飯嘅時候再問多一次﹐咁我咪又道多次歉囉。
呀仔﹐呀媽知錯喇﹐可唔可以比餐安樂茶飯過呀媽食咗先﹐然後先同我計呢﹖
出嚟行﹐預咗要還。
鬧完仔﹐記得洗底。
