呢幾日都不停落雨﹐我嚟咗呢度咁多年﹐除咗第一年之外﹐都未見過咁多雨水﹗有好有唔好﹐好就係夏天嘅時候唔洗制水(望就咁望)﹔唔好嘅梗係無晒戶外活動喇﹐出入買餸又麻煩﹐帶住口水禧就煩上加煩﹗雖然出入都有車代步﹐但係落雨揸車都好煩架﹐成日都塞車﹐一時又驚自己冼呔﹐一時又驚隔離會打白鴿轉炒埋嚟﹐所以除咗返學放學﹐都好少帶口水禧出去。
早喺四﹑五年前﹐禧爸試過一次落雨揸車返工﹐喺一條落斜嘅五線高速公路打白鴿轉﹐由最左手邊嗰條自轉咗唔知幾多個圈﹐最後去咗最右手邊嗰條線。中間有見過後面嘅車同自己面對面衝緊埋嚟﹐最後架車停低嘅時候車頭又向返啱嘅方向﹐好彩當時佢唔急尿﹐若果唔係﹐我諗佢應該都賴咗喇。佢返到公司之後打電話比我話比我知發生咗咩事﹐當時其實我都唔知驚﹐因為無親歷其境﹐真係唔知係點樣驚險嘅﹐直至我都賴野先知原來個感覺係好空洞嘅……
禧爸件事之後無幾耐﹐有一次到我自己揸車返工﹐嗰日又係落雨﹐但係只係毛毛細雨。當時我都唔算揸得快﹐因為正在落緊斜路﹐加上條路好多急彎﹐所以都好小心咁揸。我亦都係喺最左手邊條線上行緊﹐去到其中一個彎位﹐突然覺得架車好似行緊喺沙上面﹐都未嚟得切諗下咩沙嚟架﹐就喺呢個時候﹐架車已經自己向右飄﹐一直飄到去最中間嗰條線為止。慶幸平時同禧爸重有幾條麻甩佬同事食晏嘅時候成日聽佢哋講揸車嘅事﹐知道冼緊呔嘅時候最忌踩死個剎制或者一手拉hand brake﹐因為咁樣只會飄得重勁﹐分分鐘猛龍特技加成家班龍虎舞師上身咁飄移﹐所以當時我可以做嘅只有噤著對死火燈﹑少少少少咁踩剎制﹑望天打掛希望後面嘅車千其唔好炒埋嚟我度。其實過程只有幾秒﹐但係當你置身當中嘅時候就會覺得好耐﹐腦袋係空白嘅﹐個人係未識驚嘅﹐唔知自己喺嗰幾秒入面有無呼吸﹐當停定咗落嚟嗰下就開始會驚﹐心跳到想爆出嚟咁制。
好彩當時係落緊雨﹐其他嘅車都揸得慢﹐咁佢哋見到前面有人飄移都會彈開。亦都好彩我無打白鴿轉而反車(因我揸嘅車車身高而窄)。架車停定咗幾秒之後﹐我先識得郁﹐然後就一路以龜速揸返去公司。同事話呢度嘅高速公路兩旁成日都會有沙石或者凼仔﹐風和日麗嘅時候就好哋哋﹐但一到落雨嘅時候分分鐘就會送你一程。包你即刻變咗頭文字D個騰原托海……車入面嘅爛豆腐﹗
自嗰次之後﹐落親雨揸車即刻變咗呀婆揸車﹐有咁慢得咁慢﹐見到水凼就盡量避開或者行慢D﹐一眼關七﹐因為就算自己唔冼呔都驚其他人冼呔飛埋嚟架嘛(有D人落雨都揸得好快)。得閑就check下架車四條呔有無光頭﹐定時調呔。
天雨路滑﹐載住個細嘅更加要小心﹐我唔想喺個仔面前表演「呀媽飄移」呀﹗
