聖誕假期中

自從口水禧返咗學之後﹐呢個blog就開始債台高築喇﹐街數越疊越高﹐相信當中有唔少已經慘變壞賬﹗經已連爆石嘅時間都一心幾用﹐唔怪之得呢個世界有利搭利喇。無計喇﹐影咗口水禧相如果唔盡快post出嚟﹐一來禧婆婆無野睇﹐二來拖下拖下就會不了了知架喇。望見blog友嘅留言﹐有時重水蛇春咁長﹐我諗都花咗唔少時間打咁大篇留言過我﹐唔覆真係好似有D過意唔去﹐所以閣下可能會半個月後(或者更長時間)突然收到一個傻婆嘅回覆﹐可能當你收到嘅時候已經唔知我講緊乜﹐因為你連自己留咗乜比我都唔記得咗﹐若然無set到電郵通知有回覆留言嘅話﹐咁個會覆更加就會變成石沉大海添……點都好喇﹐留咗言嘅blog友﹐我全部有睇﹐邊個打邊個我都記得。(連邊叉個成日﹐係日日﹐都嚟落廣告留廢話嗰D我都會記得……delete你添架﹗)

呢個禮拜口水禧開始放假﹐日日嘅時間就好穩定地……夜訓遲起。晏晝覺成四點幾先去訓﹐想夜晚早D叫佢去瞓都難。無辦法喇﹐下晝要出去買餸﹑買聖誕野﹑搞呢搞路﹐搞完到四點幾五點﹐晏晝飯又遲食﹐五﹑六點無可能食得落晚飯喇﹐見佢個樣又呆﹐都係推佢去叉下電好。反正我都要煮飯做家務﹐有個人成日喺度纏住要我同佢玩﹐我邊做到野﹗佢瞓咗就係我專心做野或者小休嘅時間﹐佢唔瞓嘅話﹐莫講話小休﹐連片刻耳根清靜都好難喇。

而家好鍾意一日到晚纏住我或者佢老豆陪佢玩﹐老豆邊忙工作邊應酬佢。有時老豆唔得閑﹐咪炒緊餸嗰個負責應酬囉。真係手口並用﹐隻手就係咁炒﹐個口就係咁答佢﹐幾咁充實﹗

今日諗住氹咗佢去瞓晏覺﹐我就可以繼續出去買埋D聖誕禮物野。天都黑先出到門口。好彩個mall都唔算迫爆。其實一早就有心理準備﹐唔慌會少人架喇。不過入到去都總算OK﹐人群驚恐症都唔算厲害﹗搞掂咗D gift card﹐見到A&F有六折﹐腳唔聽洗﹐自己行咗入去。平時正價嗰陣邊敢入去呀﹐盞空手出返嚟。見到有幾蚊一件嘅短袖T-恤﹐係咁架喇﹐冬天就執夏天嘅平野﹔夏天就執冬天嗰D。永遠都唔會著人哋掛緊出嚟嗰件架喇。之後走去GAP睇下有無口水禧嘅野。六折再加會員折扣﹐變咗半價﹐揾到一件折咗之後USD10嘅抓毛外套﹐原價係USD24.99。小童衫﹐USD10樓下尚算合理﹐買大一個碼可以著耐少少﹐心理上覺得抵咗。係咪100%稱身﹖話之佢喇﹐唔係太過份咪得囉。所以我執咗件五歲嘅外套過口水禧嘆。其實都唔會大好多﹐條友手長腳長﹐過多兩個月即刻變啱啱好。買剛剛好嘅size﹐著一﹑兩個月就要bye bye﹐咁咪即係每個月USD5﹖我認我係cheap﹗)

以前覺得香港嘅野好平﹐返親去都掃街咁掃。但係呢兩年好似再無得我掃。試過有一年同口水禧返港﹐禧婆婆叫我唔洗帶咁多衫﹐去到香港先買﹐肯定抵過美國買。於是我淨係同自己帶咗六件衫﹐諗住香港有平野執。結果嗰個月我就係以嗰六件野維生﹐完全買唔到平野。而家終於明白點解有朋友話返去香港無野買﹐嫌貴吖嘛。(中咗六合彩嗰D梗係唔同喇。)連出街食野都係去茶餐廳﹐一來想飲奶茶同食魚旦河﹔二來價錢平囉。我去嗰間都OK﹐唔迫又多野揀。美國食唔到嘅野就梗係喺香港嘅茶餐廳補返數喇。

講返頭先喺GAP排隊等比錢嘅時候﹐我前面企咗一個西人男人同一個中國人女仔(廿幾歲)。佢兩個唔係拖友﹐個女仔猛咁講野﹐把聲好高音﹐好似開籠雀咁猛咁講野。佢嘅英文口音話比我知佢肯定唔係呢度大嘅﹐聽落好似係講國語嘅人(講廣東話嘅人同講國語嘅人所講嘅英文口音係唔同嘅)。講講下﹐佢兩個就企到面對面咁傾﹐我由睇到佢哋嘅背脊變成睇到佢哋嘅側面。我唔算企得好近佢哋﹐不過個距離係可以聽到佢哋嘅交談內容。多數都係個女仔發言﹐個男人就單字咁應佢。企企下﹐我聞到有D口臭嘅味﹐應該係超級熱氣嗰種嘅口氣﹐研究過唔似係個男人嘅﹐因為佢應個女仔嘅時候無味﹐但到個女仔講野嗰陣﹐D口氣味又出返嚟。

唔怪之得個男人淨係單字咁應佢。可能其他時間要閉氣。我企喺後面都有D頂唔順要令轉面﹐難為個男人重要應佢。佢哋重喺度講緊送乜野聖誕禮物比對方﹐我想搭嗲叫個男人不如送李C得林漱口水比個女仔喇。

*********************************************

下晝喺屋企嘅時候﹐我摺衫之時﹐就有件麻煩友攞我D衫嚟玩。而家明點解我要襯佢瞓咗先做家務喇。

條友仔少見媽媽著裙﹐見到我著嗰陣不停問我點解著裙﹐重好單刀直入咁話我知我著褲好睇D。嗰日我重有legging喺入面﹐唔算露咗對甲組腳吖﹐有無咁嚴重要話我著褲好睇D呀仔﹗

佢話佢又要試下著喎。著飽佢囉。學校份守則叫我哋D家長如果喺學校見到男仔著咗D公主裙都唔好阻止佢哋吖嘛﹐咁我都唔阻止面前嘅口水禧著呀媽嘅短裙喇。點知﹐估唔到﹐我嘅腰圍竟然大過佢嘅上圍﹐當tub top唔掂﹐當裙就更加唔掂喇。繼話我著褲好D之後再度傷透我心。佢成個人有如企喺一個英式紅色郵筒入面﹐條裙係可以由頭sir到落腳﹐中間完全係唔會kick住嘅。